Assalamualaikum wr. wb. Dunsanak di lapau kasadonyo, Iko ado Ambo bao saketek informasi mengenai dagiang babi ka lapau awak, sakadar pauleh carito manga babi haram untuak awak. Salamoko nan awak pacik adolah, awak yakin Tuhan memilihkan nan terbaik bagi awak. Manga awak dilarang mamakan dagiang babi nan labiah tapek tantu tapulang ka Nan Maha Tahu juo, tapi sabateh logika awak tantu ado juo alasannyo, supayo jan panjang bana,ambo bagi duo caritoko, pangalaman ambo dan dari literatur nan kabatulan ado di ambo. Dalam masalah nan sarupo dunsanak alami terutama nan hiduik sebagai minoritas di dalam lingkungan agamo lain, banyak saketeknyo ambo iyo panah juo mangalaminyo, bahkan nan ambo alami mungkin labiah parah lai, kebetulan kolega ambo nan mangaku saagamo jo awak, bangso arab, dalam suatu jamuan resmi, lamak sajo diinyo nyoh dagiang celeang jo khamartu. Sahinggo kadang-kadang ado juo tanyo nan indak lamak tu, manga awak kok indak mamakan babi, sadang si anu tu, nyo makan juonyoh (tantu dek lamaknyo kecek mereka). Tapi antah manga lah dek sanak, disitu pulolah mulai taraso kebanggaan awak nan bisa batahan jo iman awak. Pertanyaan manga babi tu haram dalam Islam, bagi awak itu alah jaleh, Allah alah manatapkan bagi awak bahaso babi tu haram, ndak bisa di ago-ago lai. Haramnyo babi bukan sajo sajak Islam datang, bahkan sajak dari Yahudi alah Haram juo babi tu (Al-Quran, surat Al An'am, 146). "Orang Nasrani seharusnya mengikuti orang Yahudi dulu, sabab Injil menegaskan bahwa Nabi Isa datang untuak menggenapi hukum Taurat bukan untuak merobahnya. Apa-apa yang diharamkan di dalam Taurat telah dihapus oleh orang Nasrani, tanpa dihapus oleh Injilnya, mereka mau megikuti Paulus yang dipandang suci itu dalam masalah halalnya semua makanan dan minuman. Paulus memberikan alasan, bahwa semua yang suci halal untuk orang yang suci, dan semua yang masuk dalam mulut tidak dapat manajiskan mulut, yang menajiskan mulut ialah apa yang keluar dari mulut. Mereka juga menghalalkan babi sekalipun dengan tegas babi itu diharamkan oleh Taurat sampai hari ini" (dikutip dari Halal dan Haram dalam pandangan Islam, Syekh M Yusuf El Qardlaawi, alih bahasa Mu'ammal Hamidi, The Holy Koran Publisihing House, Beirut Libanon, 1980) Pernah juo dulu timbul pertanyaan di ambo dalam badiskusi jo kawan-kawan, baa ko lah yo situasinyo caciang pita pado dagiang babi di siko (Jerman) nan nagarinyo agak kariang dan alah ditaranakkan sacaro intensif, dan dek masalah caciang pitako ndak pernah sakali juo disorot media masanyo doh, beda ndak jo di tampek awak nan memang lambok/basah, karano si babi memang suko di nan baluluak balimang cirik. Dalam badiskusi kebetulan ado kawan nan manjawek, apo.... samo sajonyoh, karano kabatulan baliau baru baliak dari lapangan dari beberapa kandang babi di kota Ulm. Kasimpulannyo bara bana kabarasiah kandang babitu, tatap juo kandangnyo bacaciang pita. Sudahtu pernah pulo suatu kali jo urang rumah, ambo pai ka taman nan bahutan-hutan rimbo saketek, adolah tacium baun nan sangaik bana busuaknyo, yo sabana busuak, labiah busuak pulo dari kakuih nan baru babongka, indak manga-manga doh kalau dibandiang jo cirik jawi atau kubangan kabau di kampuang, kudian barulah nampak siceleang sadang bakubang. Antah ma nan makanan, antah ma nan cirik, yo sabuah sajo sadonyo dikubangannyotu. Dari situ batambah juolah aka ambo agak saketek, manga inyo haram. Pernah pulo ado laporan samacam dokumentasi di TV nan mangecekkan kironyo celengko lah ndak dipandangnyo juo dari sajak dulunyo dek orang Eropah doh, samo tau selah awak feodalnyo urang eropah, jadi babitu cuma dikonsumsi untuak urang bawah, dan memang sampai kini dagiang babi tu adolah dagiang kaki ampek nan paliang murah. Mungkin karano mereka punyo teknologi, banyaklah macam usaho untuak maangkek harago diri babitu, hinggo seakan-akan lah luxus pulo nampaknyo untuak sebagian urang. Sebagian ilmuwan urang Eropah (dan sebagian urang kabanyakannyo) bukan ndak tau bahaso babitu ndak elok, tapi produk-produk babitu alah manjadi makanan tradisi mereka sajak dulu, dan saketek banyaknyo tantu ado alasan politik pertaniannyo di balakangtu, karano memang indak hanyo karano di siko banyak petani babi, tapi banyak pulo nan hiduik tagantuang dari produk olahannyo, dari nan gadang sampai nan ketek, misalnyo sajo gelatin. Dalam masalah maangkek harago diri babiko, ado juo disiko nan bausaho mancari kalabihan dagiang babi, nan paliang acok disabuiknyo vitamin B1 nyo, tapi Vitamin tu rusak juonyoh kalau dimasak (mungkin dek itu pulolah mungkin, mereka makan dagiangnyo agak badarah saketek alias ndak masak, istilah urang di siko Steak nan lamaktu, di lua knusprig=badaruak, di dalam saftig & blutig =baraia & badarah), jadi samo sajo nyoh, dan masih banyak pilihan bahan makanan lain nan manganduang vitamin B1 ko (padi-padian, kecambah, kacang-kacangan sayuran dan lainnyo). Nan jaleh masih jauah labiah banyak keunggulan dagiang nan lain dari dagiang babitu. Diantaronyo, daging jawi menganduang mineral jauah labiah tinggi pado babi (terutama besi dan Seng) duo kali lipek, alun kandungan lain nan bisa bakali lipek. Baliaklah awak ka soal haramtu, sayangnyo banyak juo urang awak nan talalu picayo sajo jo makanan dan apo nan dibuek urang siko (yang lain agamonyo), gambarannyo urang siko jujur, barasiah karano lah bateknologi tinggi maolahnyo. Di Jerman misalnyo satiok produk makanan balaku ketentuan, suatu produk buliah sajo mamakai suatu namo (misalnyo sosis jawi) asa sajo isinyo indak kurang dari 30% bahan utamanyo (disiko tantunyo jawi), pado produk tertentu labiah parah pulo lai ado nan cuma 10% sajo nyoh, bahkan ado pulo contoh nan labiah parah : "Namo dan bungkuih nan rancak tu acok indak samo jo isi sabananyo. Sosis hati di dalamnyo hanyo 10 % sajonyoh nan hati, bahkan labiah parah pado Sosis hati jawi mudo nan indak jarang di dalamnyo indak ado samo sakali hati jawi mudo tu" (terjemahan dari buku "Handbuch der gesunden Ernaehrung, Von Ahornsirup bis Zusatzstoffe", Franz Binder dan Josef Wahler, terbitan dtv-verlag, Muenchen, 1993", halaman 353). Bahan nan indak 100 % ko sabananyo indak masalah doh, nan masalah bagi awak adolah siso bahan nan lain nan dipakai tu (bahan pengisi jo pancampua) adolah selalu babi, mulai dari gomok sampai dagiang-dagiang gaca nan alah tasiso (istilahnyo di siko dagiang separator), dan nan dari bahan babiko labiah gadang pulo dari bagian isi nan sabananyo. Keadaanko ambo raso di Eropah indak kajauah bana bedanyo doh, labiah-labiah kini sadonyo alah diatur dek EG(EC). Itulah sanak herannyo sebahagian urang awak atau urang nan saagamo jo awak di siko, talalu picayo jo teknologi, jo paraturan urang siko, dan mungkin dek terlalu picayo ko lah, satiok hal nan diragukan balendo sajo dan ndak bakainginan pulo untuak mancekyo. Padohal bukankah awak disuruah bahati-hati dek Tuhan dalam mamiliah makanan nan halal lagi elok untuak dimasuakkan kaparuik awak. Kalau awak caliak lo dari segi baa mangko haram, ado sabahagian urang bapandapek, "lah jaleh haram, manga babi diciptakan Tuhan juo, sedangkan alam semesta kan diciptakan kan untuak manusia". Andaikan sajolah kalau lai namuah urang bapikia agak saketek logis dan baprasangka baiak sajo ka Tuhan, insya Allah ado jaweknyo, bukankah satiok nan diciptakanNyo pasti ado gunonyo, memang ndak sadonyo elok di makan doh, tapi beko dibaliaknyo kasudahannyo untuak awak juo. Tapi bukan babi ndak ado guno, gunonyo banyak kalau awak lai namuah pulo mancaliak segi biologis dan ekologisnyo. Kalau indak ado babi, sia lai nan kamambaliak-mambaliak tanah di hutan dalam mancari umbi, makan cindawan tanah, keong, tamasuak mamakan bangkai bagai (bisa jadi paruiknyo tahan bana jo kuman bangkai), tamasuak kecek Guru ambo dulunyo diduga babi ikuik baperanan manyebarkan bungo langka Rafflesia nan ado dinagari awaktu, sudahtu dek anaknyo banyak, banyak pulo binatang buas nan nasibnyo tagantuang dek inyo. Sakali pernah juo ambo mambaco artikel tantang cirik babi, tanyato cirik babipun ndak elok juo untuak dijadikan pupuak tanaman doh, itu kecek urang di siko, alhasil memang ndak ado pupuak cik babi di jua urang di siko doh. Jadi nampaknyo babi diciptakan memang iyo bukan untuak dimakan, memang indak sadonyo elok untuak dimakan doh, untuak makhlukNyo nan lain, untuak kaseimbangan alam, tapi manga babitu populasinyo banyak hinggo awak paralu pulo baburu, itulah salah satu tando kaseimbangan alam awaktu lah rusak, ula gadang, harimau, dan binatang buas lainnyo indak bara incek tingga lai doh. Akhianyo baliak awak mancaliak ka alam, awak palaweh pandangan awak, awak pacangang talingo awak, ruponya jawabannyo ndak jauah-jauah banadoh, iyo nampaknyo batua pepatah awak alam takambang jadi guru. Dan dari carito diateh juo, taraso di awak, bahaso Tuhan memang lah manjago awak dan mamilihkan nan tabaiak pulo untuak awak, karano memang urang nan barasiah, makanannyo tantu nan barasiah-barasiah pulo. Itulah sanak nan anehnyo, urang siko kalau bacaruik untuak menhinakan urang mamakai kato babi, tapi barangtu lamak juo dek inyo. Sudahtu, mereka tau babi ndak sehat, hinggo untuk makanan kucing dan anjing kesayangan mereka boleh dikato indak ado makanan kaleng nan berbahan dagiang babi doh, tapi anehnyo dimakannyo juo. Untuak awak memang patuik awak syukuri, tapi baa mangko awak sajo, dibandiang jo umat lain walau alah bailmu tinggi bagai, palajaran nan paliang mudah tu ndak nampak dimatonyo. Jawabannyo tantu tapulang juo ka Nan Maha Maagiah Patunjuak . Carito babiko yo lah panjang leba, namun awak tantu yakin masih ado nan lainnyo dek dunsanak nan lain, kalau ado tolong juolah lewakan ka lapau awak ko. Tangguang bacarito sanak, takana dek ambo, dulu pernah pulo ambo tabaco majalah pegawai di suatu ruangan tunggu di Jakarta, kecek penulis tu nan kiro-kiro manyatokan "orang terlalu sibuk menghitung halal dan haram suatu jenis makanan yang sudah jelas, tapi banyak orang tidak mempersoalkan darimana jenis makanan itu di dapatnya (misal dari uang korupsi alias maling, menipu, riba, hak urang fakir/miskin/anak yatim). Semoga sajo iko manjadi salah satu bahan ranuangan awak kasadonyo. Salanjuiknyo dalam surek nan kaduo sangajo ambo tulis dalam bahasa Indonesia, mungkin sajo ado gunonyo bagi dunsanak awak nan indak babahaso(urang) minang, kalau lai ado nan kanai hati jo curito amboko dan ingin malewakan ka kawan-kawan nan lain silahkan. Sakali lai ambo mohon maaf kok tulisan amboko panjang bana. Wassalam Sutan Sati Batuah ------------------------------------------------------------ Bergabunglah dengan Free Email @mimbarminang.com Klik berita terbaru ranah minang di http://www.mimbarminang.com RantauNet http://www.rantaunet.com ================================================= Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke / To: [EMAIL PROTECTED] Isi email / Messages, ketik pada baris/kolom pertama: - mendaftar: subscribe rantau-net [email_anda] - berhenti: unsubscribe rantau-net [email_anda] Ket: [email_anda] = isikan alamat email anda tanpa tanda kurung ================================================= WebPage RantauNet dan Mailing List RantauNet adalah servis dari EEBNET http://eebnet.com, Airland Groups, USA =================================================
