Laporan dari Kampung.
Assalamu�alaikum wr. wb.
Mamak Shahir Kadir dan dunsanak sadonyo. (batua juo dugaan ambo, kironyo mamak
Shahir jo mamak Firdaus ko dari �production house� nan samo� :-))
Ado duo hal nan ka ambo �carito�kan di siko,
1. PERBAIKAN JALAN LINGKAR DANAU MANINJAU.
Seperti nan lah ambo kamukokan bulan lalu, perbaikan jalan lingkar danau
Maninjau tahap I (dari pasa Sungai Batang sampai Tanjung Sani), dan Tahap II
(dari pasa Maninjau sampai pasa Sungai Batang) lah salasai, jalan lah mulus
dan rancak. Tapi nampaknyo perbaikan jalan ko taranti di siko dulu samantaro
manunggu dana turun untuk tahap salanjuiknyo.
Hanyo sajo manuruik Koran Singgalang beberapo hari nan lalu, Panitia Khusus
(Pansus) DPRD Agam lah berhasil memperjuangkan dana untuk perbaikan lingkar
danau ka Departemen PU Pusat untuak sapanjang 17 km. Jadi Insya Allah, tahun
ko juo, jalan-jalan nan lah rusak parah lapeh Tanjung Sani sampai ka Pandan,
bahkan sampai ka Sigiran akan di aspal ulang. Semoga janji pemerintah tu bisa
tarealisasi sacapeknyo.
Kalau sajo nantik, mulai dari Sigiran ka Batu Nanggai bahkan sampai ka PLTA
Antokan di muko-muko tu dananyo turun pulo, mako jalan sabalik danau lah ka
rancak baliak. Mungkin dengan baitu Maninjau manjadi tujuan wisata model dulu,
dan paket-paket wisata sarupo keliling danau Maninjau pakai roda duo bisa
semarak pulo baliak. Katiko panduduak sekitar banyak mambukak penyewaan sepeda
dan sepeda motor untuak turis mancanegara nan sabana banyak ingin keliling
danau Maninjau pakai roda duo. Bisnis penyewaan kendaraan roda duo tu saketek
banyaknyo mambantu juo ka sebagian penduduak.
Tapi dengan jalan rancak model kini, nan baru sampai Tanjung Sani, masalah
baru timbua pulo. Mobil/oto kalau bajalan sabana kancang-kancang bantuak di
jalan tol sajo. Samantaro nan namonyo kampuang pasti banyak anak-anak nan
bamain. Walaupun lah ditagahkan supayo anak-anak indak bamain di tapi jalan,
tapi tiok sabanta tadanga juo pakiak-pakiak urang tuo maliek anak-anak nan
tiok sabanta ampia tagiliang oto. Untuak �memaksa� oto bajalan labiah lambek,
ampia di tiok kampuang kini masyarakatnyo mambalintangkan kayu/batu di tapi
jalan dalam jarak-jarak nan cukuik dakek. Hal iko tantu sajo cukuik mangganggu
pamandangan dan babahayo pulo untuak kendaraan roda duo, karano bisa jatuah
tiok malintasi kayu nan mambalintang di tangah jalan tu. PU tantu sajo juo
mangaluah malieknyo.
Tapi walaupun ketua DPRD Agam lah mengeluh mamintak agar masyarakat agar
maanjakkan kayu-kayu nan jadi �polisi tidur� tu nan dianggap mengganggu
kelancaran lalu lintas, masyarakat ndak namuah. Masyarakat tetap keberatan
maanjakkannyo mengingat oto nan bajalan sarupo pesawat jet walaupun ditangah
kampuang dimano anak-anak dan penduduak sahinggo sawaktu-waktu bisa tajadi
kecelakaan.
Iyo lah kamari bedo. :-(
Baa ko �
Pak doktor kito di Banduang nan ahli giliang-manggiliang bumi, mungkin ndak Da
Fred, kito buek jalan raya nan rancak, tapi sopir tatap ndak �tagoda� untuak
manyetir kancang sakahandak hatinyo, sahinggo urang-urang nan sadang bajalan
di tapi indak mati katakutan pulo dibueknyo. Maklumlah dikampuang, indak ado
pulo ado trotoar tasadio
Atau baa caronyo mamintak para sopir (baik sopir umum/sopir pribadi) untuak
�manenggang� pajalan kaki tu?
2. PERPUSTAKAAN HAMKA.
Sasuai jo janji ambo dulu, untuak mancari informasi nan berkaitan dengan usaho
pendirian Pustaka Buya Hamka, mako hari Minggu, tanggal 13 Mei 2001 nan lalu
ambo bakunjuang ka Sungai Batang, taruih ka Muaro Pauh (labiah kurang 2 km
dari Sungai Batang tu). Tampek nan pertamo kali ambo kunjuangi adolah kuburin
�Inyiak DR� (Inyiak Doktor), yaitu kuburan Haji Abdul Karim Amarullah ayahanda
dari Haji Abdul Malik Karim Amarullah alias HAMKA. Kuburan Inyiak DR (ayah
buya HAMKA) ko lah dipugar/diperbaiki.
Salanjuiknyo ambo pai manamui ibu Salma Abdullah nan rumahnyo di sabalah
kuburan Inyak DR. Ibu Salma ko lah nan salamoko manjagoi siso-siso peninggalan
keluarga Inyiak DR. Baduo jo Ibu Salma ko, ambo pai ka rumah sabalahnyo pulo,
rumah pangguang nan lah kosong dan hampia runtuah. Lantai kayunyo lah
cabiak-cabiak, balubang-lubang gadang, dan atoknyo lah banyak nan
rumpang-rumpang pulo. Satu-satunyo ruangan nan masih utuh (walaupun lah bocor
pulo) adolah ruangan muko atau ruang tamu. Dek karano ruangan lain lah indak
bisa dipakai, mako diruangan tamu nan reot itulah sadonyo dikumpuakan
buku-buku Inyiak DR. Menyedihkan memang.
Sambia bajalan diantaro kayu-kayu lantai nan tajungkek tu, bacarito ibu Salma
ka ambo. Kato beliau, sajak Kutub Chanah (perpustakaan Inyiak DR) nan
bangunannyo saluas labiah kurang 8 x 7 meter tu runtuah, rato jo tanah,
(lokasinyo disabalah rumah kosong nan sadang kami masuaki), sadonyo buku-buku
Inyiak DR nan masih bisa disalamaikkan, dipindahkan ka siko, tapi kini lieklah
rumahko nan tingga cuma ruang tamu buruak sajo lai, buku-buku Inyiak DR
balungguak-lungguak sajo ndak cukuik tampek panyimpannyo.
Masih manuruik ibu tadi, pemerintah dari dulu lai bajanji ka mambangun baliak
perpustakaan Inyiak DR di lokasi nan samo, nan kalau bisa dijadikan sekalian
jo perpustakaan anaknyo (pustaka buya HAMKA), tapi mungkin karano keuangan
pemerintah sulik pulo, sampai kini nan janji tu tatap tingga janji. Ambo
sempatkan pulo maliek lokasi tampek ka dibangun baliak perpustakaan Inyiak DR
nan lah di tunggu masyarakat Sungai Batang tu. Tampeknyo persis di sabalah
kuburan Inyiak DR.
Dari Muaro Pauh, ambo taruih ka Tanah Sirah nan labiah kurang 1 km dari Muaro
Pauh tu (sabalun Tanjung Sani) untuak maliek sacaro langsung pembangunan
kembali rumah kelahiran Buya HAMKA. Rumah tu lah dalam tahap �finishing�.
Tanggal 30 April 2001 nan lalu, Menteri Pendidikan Nasional, pak Yahya
Muhaimin mengunjungi rumah tu. Manuruik masyarakat di Tanah Sirah tu, pak
Menteri sempat pulo membicarakan bahwa pembangunan Pustaka Buya Hamka nan
nampaknyo ndak bisa direalisasikan pemerintah dalam waktu dakek karano
terbentur dana dan fasilitasnyo. (Kalau ambo ndak salah, disabuikkan minimal
dana awal nan dibutuahkan sekitar Rp. 70 juta).
Rumah Buya Hamka nan dibangun kembali tu barupo rumah panggung, bagonjong
dengan luas 8 x 14 meter (ilun tamasuak dapua, dan halaman muko). Dibangun di
ketinggian di sabalah ateh jalan, sahinggo pemandangan ka danau begitu asri.
Ujuang Tanjuang di sabarang danau nampak baitu dakek (karano Tanah Sirah lah
masuak daerah Tanjuang Sani nan manjorok ka danau pulo, jadi sabananyo duo
tanjuang nan lah saling bahadapan). Rumah kayu tu kamar tiduanyo ciek, nan
lain ruangan lapeh. Hanyo sajo katiko ambo cigok kamarnyo tu, nan basuo tukang
cat sadang karajo� 
(Sayang kamera ambo tatingga di rumah, jadi ndak bisa ambo foto rumah Hamka
tu).
Manuruik informasi nan ambo tarimo, kalau rumah Buya Hamka lah siap (kini lah
90%), di situ akan dijadikan museum tampek manyimpan benda-benda peninggalan
buya Hamka, tamasuak buku-buku beliau, sahinggo ado pulo usul untuak
manjadikan rumah tu museum sekaligus perpustakaan Hamka.
Hanyo sajo sebagian lagi kurang setuju, mengingat kalau rumah cuma sagadang
itu ka dijadikam museum sakaligus pustaka, talampau ketek. Itulah sababnyo
mereka labiah cenderung kalau ka mandirikan pustaka, tersendiri pulo, apokah
memang di Muaro Pauah sekalian pustaka Inyiak DR, atau dibangun di Tanah Sirah
di dakek rumah Hamka, dan pustaka Inyiak DR nan pindah, atau pustaka Inyiak DR
tatap di bangun di Muaro Pauah, samantaro di Tanah Sirah di bangun pustaka
Hamka. Sadonyo nampaknyo masih dalam musyawarah dan rencana. Tantu akhirnyo
nantik tagantuang ka kesepakatan masyarakat, pemerintah dan dana nan tasadio.
Untuak itu nampaknyo masuakkan dari urang rantau iyo bana diharokkan pulo dek
dunsanak kito di kampuang.
Jadi�. Baa nan rancak?
Apo nan bisa kito sumbang/sarankan ?
Apokah mungkin kito bantu jo penggalangan dana?, atau pengumpulan buku-buku?
atau negosiasi/mambujuak pemerintah supayo gedung pustaka tu bisa diwujudkan
sacapeknyo?
Tapi mungkin labiah rancak awak bahubungan langsung dulu jo masyarakat di
kampuang tu, baiyo apo nan ingin dan mungkin dilakukan talabiah dahulu?
Kalau ado mamak-mamak atau dunsanak nan ingin bahubungan langsung jo ibu Salma
Abdullah bagai, bisa ambo agiah tahu alamaiknyo.
Sakitu sajo dulu dari ambo. Mudah-mudahan bamanfaat.
Salam dari kampuang,
Rita Desfitri
PS.
By the way �.
Kabanyo iko kisah sa urang mamak
Ambo dapek kaba hari tu lah patang pulo
Antah dek takaja atau wakatu sadang sasak
Sahinggo ka Padang lah malucuih sajo
Teh Talua kabanyo nan bamintak
Di Ulak Karang ndak salah restorannyo yo?
Mamak kanyang duduak basundak
Kamanakan kok talupo di pa �sorry� sajo yo?
:-) :-)
-----------------------------------------------------------
____________________________________________________________________
Get free email and a permanent address at http://www.netaddress.com/?N=1
RantauNet http://www.rantaunet.com
================================================Mendaftar atau berhenti menerima
RantauNet Mailing List di
http://www.rantaunet.com/subscribe.php3
ATAU Kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
Ket: [email_anda] = isikan alamat email anda tanpa tanda kurung
================================================WebPage RantauNet dan Mailing List
RantauNet adalah
servis dari EEBNET http://eebnet.com, Airland Groups, USA
================================================
