Assalamu'alaikum,
Mamak-mamak, Angku-angku, dunsanak kasado-alahe, di Balairoang !
Alah agak lamo juo ambo indak singgah ka "lapau-ko", namun baitu ambo indak
absen mancaliak-caliak dari jauah. Iyo sabana rami "lapau" kito kiniko.
Sabalunko ambo indak pernah manyabuik milis awak-ko sebagai "lapau". Ambo
labieh suko manyabuik sebagai "baleroang". Karano apo, ambo punyo pangalaman
buruak tantang "lapau". Baiko curitonyo :
Wakatu itu, kiro-kiro tahun 1970, ambo di suruah dek mande ambo mambali
goreang pisang jo katan ka "lapau". Di sinan sadang banyak urang maota
sambie minum kawah jo makan goreang pisang. Sebagai surang nan mudo, ambo
mancubo untuak manyapo sado urang nan ado di "lapau". Nan patuik dipamamak
ambo imbau mamak, nan patuik dipakakak ambo panggie kakak dan nan patuik
dipabapak ambo sapo bapak. Di bagian agak ka suduik ado surang pangulu,
bagala datuak. Ambo sapo baliau, "Assalamu'alaikum, Bapak Datuak" kecek ambo
sambia maangguak kaciek. Mamburangsang baliau mandanga ambo manyapo baliau
jo panggilan Bapak Datuak. "Bilo wa'den balaki jo mande wa'ang, tanyo-an ka
mamak wa'ang sia bana wa'den ko" kecek baliau di muko urang rami nantun.
Sirah muko ambo mandanga burangsang Datuak ... itu, jo muko baliang, ambo
langsuang pai dari "lapau" tanpa menghiraukan lai apo nan manjadi tujuan
ambo pai ka "lapau". Baitu kajadian buruak nan ambo alami labieh dari 30
tahun nan lalu. Sampai kini kajadian itu indak pernah lupo.
Ado kajadian lain, masih di sekitar wakatu itu. Ambo dimintak deh mande
untuak maimbau mamak kanduang ambo supayo datang ka rumah beko malam.
Kabatulan nampak baliau dek ambo sadang duduak di "lapau". Ambo turuik
baliau ka sinan dan ambo kecek-an pasan dari mande tadi. Baliau indak
manjawek, hanyo malanguah, "Hh..." tanpa mancaliek ka ambo. Sudah tu, ambo
pai. Ruponyo ambo di turuik-i dek Kakak Mudo (Ketua Pemuda) di kampuang
ambo. Baliau mangaja ambo dan maimbau, "Dam, tunggu nta, pai ka maa wa'ang".
Ambo baranti. Setelah dakek, kakak mudo-ko maraieh bahu ambo dan kami
bajalan sairiang. Baliau batanyo, "Ado apo di rumah, sampai-sampai mamak
kanduang diimbau?". "Ambo indak tahu, tadi mande manyuruah saroman-tu",
kecek ambo. Akhienyo lambek-lambek baliau mangecek-an: "Dam, lain kali, kok
mamimbau mamak, jaan di lapau. Jalang ka rumah baliau".
Baitulah kajadian nan ambo alami. Ambo yakin : "ALUN TAKILEK LAH TAKALAM"
Pulang maklum kabakeh Angku-angku, Mamak-mamak, Dunsanak kasadonyo.
Wassalam,
Damrus Lukman Pk. Sutan
Bekasi
-----Original Message-----
From: [EMAIL PROTECTED]
[mailto:[EMAIL PROTECTED]]On Behalf Of Benny Yustim
Sent: Sabtu, 15 September 2001 22:52
To: [EMAIL PROTECTED]
Subject: Re: Usulan ka balerong Re: [RantauNet] Dek alun tau (Re: []
Islam, Minang dan Malin Kundang)
assalammualaikum wr.wb.
sabalunnyo ambo minta maaf, kalau saandainyo ambo turuik ikuik campua pulo
masalahko ko..
ambo yakin, indak ado sorangpun di rantau net ko yg punyo niek untuk babuek
sakalamak paruik se di milist ko do, tapi mungkin caro dari uda/uni se yg
babeda-beda..
... dikarek nak nyo singkek, diambiak sado kaparalu....
RantauNet http://www.rantaunet.com
Isikan data keanggotaan anda di http://www.rantaunet.com/register.php3
===============================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
ATAU Kirimkan email
Ke/To: [EMAIL PROTECTED]
Isi email/Messages, ketik pada baris/kolom pertama:
-mendaftar--> subscribe rantau-net [email_anda]
-berhenti----> unsubscribe rantau-net [email_anda]
Keterangan: [email_anda] = isikan alamat email anda tanpa tanda kurung
===============================================
