Assalamualaikum w.w.
Nan barikuiko nan agak slow lah ambo cukiekkan dari buku Angku Dt. Majo
Indo.
Judulnyo "sagalo tangguang"
Adyan
LXIX. SAGALO TANGGUANG
Anak anduang katitiran
Anak barabah ampek-ampek
Nan dikanduang bacicieran
Nan dikaja indak dapek
Sikucapang sikucapeh
Sikue tabang sikue lapeh
Anak urang Silaing tinggi
Dibubuik capo dihampehkan
Harok diburuang tabang tinggi
Punai di tangan dilapehkan
Batang kamuniang jo batang kapeh
Bungkuak marunduak balingkaran
Arok dikunian gkuah kambeh
Cangkuak tarubuak ditinggakan
Baburu ka pinang data
Dapeklah ruso balang kaki
Kalau baguru kapalang aja
Bagai bungo kambang tak jadi
Gulai patai campue karadu
Bumbu garamnyo dipiriak-piriak
Kok pandai tak baguru
Bak manyalam tak sampai ka kasiak
Lampok daulu baru dijahik
Dikilie baru disopan
Maharok guntue di langik
Aie di payan ditumpahkan
Hari Salasa pukue satu
Urang malapeh layang-layang
Lai sarawa tak babaju
Jo apo dilawan dunie urang
Bak mangganggam-ganggam baro
Raso kahangek dilapehkan
Angek-angek cirik ayam
Nan hitam indak kabakuran
Nan putiah indak babalang
Karih disangko jo gadubang
Tuak disangko aie tabu
Maso suto imbalan banang
Lauik gadang kalau dihadang
Sadiokan sampan jo pandayuang
Kok hiduik mangapalang
Sagalo karajo kumari tangguang
Bak mamakan buah simalokamo
Dimakan induak mati
Tak dimakan bapak mati
Umpamo jawi balang puntuang
Didaulukan inyo manyipak
Dikudiankan inyo mananduak
Urek malang pangka cilako
Urang pamberang gadang utang
Urang pandareh lakeh kanai
Urang pancameh mati jatuah
Urang pandingin mati hanyuik
Urang pamnggok lapa paruik
Urang parentak gadang kanai
Sayok pendek tabang nak tinggi
Tarapuang tak hanyuik
Tarandam tak basah
Sampan ado pangayuah tidak
Sanduak gadang tak manganyang
Tasingguang kanai miangnyo
Tagisie kanai rebehnyo
Umpamo makan buah kapayang
Dimakan mabuak dibuang sayang
Satapuak sa-ameh
Duo tapuak sa-ameh
Elok ditapuak bana
Bacampue lama jo galeme
Tak bedo sadah jo tapuang
Pipik pinang makan di hujan
Indak dihalau padi habih
Kok dihalau kain basah
Katabuah pendek kagandang balabiah
Tal siriah pinang mamaln
Tak pasin angguakpun tibo
Piciang kato murai
Kukuak kato ayam
Salah dimamulai
Rusak dimangayam
Sayang digaram sacacah
Busuak kabau sabalango
Sarueh tabu nan baulek
Kasabatangannyo nan dibuang
Takuik di ula takajuik dek bingkaruang
Talampau cadiak takadiak
Talampau rapek mangganggang
Talampau tinggi patah
Tapalampau panggang anguih
Sio-sio manjariang angin
Taraso lai dapek tidak
Gadang bungkuih tak brisi
Bungkuih elok pangabek gacue
Tak pandai manari
Dikatokan lantai tajungkek
Bak balaki tukang ameh
Bak mananti laki pai maliang
Udang tak tahu dibungkuaknyo
Urang tak tahu diburuaknyo
Tangguak rapek karontong bubuih
Takui di mayik tapaluak di bangkai
Saikue kabau bakubang kasadonyo kanai luluaknyo
Urang makan cubadak awak kanai gatahnyo
Tacancang pua tagarik andilau
Bak sudu-sudu di tapi jalan
Dipanjek kanai durinyo
Disingguang kanai rabehnyo
Ditakiak kanai gatahnyo
Barakik mambao papan
Papan diapik tigo-tigo
Di langik tadanga hujan
Di bumi satitiak tido
Rumah nampak jalan tak tantu
Angan lalu paham tatumbuak
Bak sibisu barasian
Takana lai takatokan tidak
====================
Kato-kato sulik:
capo =
dikilie =
mamalan =
pasin =
gacue = lungga?
pua =
andilau =
rabeh =
