Assalamualaikum w.w.
 
Dunsanak ambo di lapau,
 
    Kadang-kadang, bagi awak nan ci'inan nak mangatahui adat awak, taraso kawalahan dek banyaknyo nan musti dikatahui.. dari ma ka dimulai? Jadi kalau ado katarangan nan agak sistematis mungkin raso kamanolong. Rasonyo pulo.. satu bab dari buku Pak Amir MS, Adat Minangkabu, (Bab 7. Pola Pikir) rancak dijadikan pintu masuak atau sabagai starting point. Ambo cukiekan barang sadonyo..
  • Adat
    • Alue dan patut
    • Anggo -tanggo
      • Cupak nan duo
        • Cupak usali
        • Cupak buatan
      • Undang nan ampek
        • Undang-undang luhak dan rantau
        • Undang-undang nagari
        • Undang-undang dalam nagari
        • Undang-undang nan duopuluah
      • Kato nan ampek
        • Kato pusako
        • Kato buek/kato mupakat
        • Kato daulu
        • Kato mamudian
    • Raso jo pareso
    Itulah outline atau kerangka adat minang. Tantu mungkin juo ado  sudut pandang nan lain, atau caro pangalompokan nan babedo.
   
    Pepatah-petiti nan manjadi dalil bagi tiok-tiok item diateh adolah sbb.
  • Tungku nan tigo sajarangan
    • Alue dan patut
    • Anggo -tanggo
    • Raso jo pareso
 
Alue dan patut
Urang makah mambao taraju
Urang bagdad mambao talua
Talua dimakan bulan pusao
Rumah gadang  basandi batu
Adat basandi alue
Alue itu kaganti rajo
Manarah manuruik alue
Nan baukue nan bakarek
Nan babarih nan bapahek
Manumbuak di lasuang
Batanak di pariuak
Jawi malanguah
Kambiang mambebek
Anggo -tanggo
 
Cupak nan duo
Cupak usali
Cupak buatan
 
Undang nan ampek
 
Undang-undang luhak dan rantau
Luhak bapangulu
Rantau barajo
Tagak samo indak tasundak
Malenggang samo indak tapampeh
Undang-undang nagari
Nagari ba kaampek suku
Dalam suku babuah paruik
Kampuang nan ba tuo
Rumah gadang ba tungganai
 
Basosok bajurami
Balabuah batapian
Barumah batanggo
Bakorong bakampuang
Basawah baladang
Babalai bamusajik
Bapandam bapakuburan

 

Undang-undang dalam nagari
Utang dibaie - piutang ditarimo
Salah batimbang - kusuik disalasaikan
Nan bautang nan mambaie
Nan mancancang nan mampampeh

 

Barek samo dipikue
Ringan samo dijinjiang
Ado samo dimakan
Indak samo dicari
Ka bukik samo mandaki
Ka lurah samo manurun
Tatilantang samo minum aie
Tatungkuik samo makan tanah
Kok jauah kana mangana
Dakek jalang manjalang
Undang-undang nan duopuluah
 
1. Tikam bunuah, padang badarah
2. Sia baka, bapuntuang suluah
3. Upeh racun, siso dimakan
4. Maliang curi, taluang dindiang
5. Samun saka, tagak dibateh
6. Umbuak umbai, tabu dibibia
7. Dago dagi, mambari malu
8. Sumbang salah, laku parangai
 
1. Bajajak bak bakiak, bauriah bak sipasin 
2. Anggang lalu, atah jatuah 
3. Kacondongan mato rang banyak  
4. Bajua bamurah-murah,  bajalan bagageh-gageh   
5. Dibao pikek, dibao langau
6. Tasindorong jajak manurun, tatukiak jajak mandaki
7. Tatumbang taciak
8. Tatando tabukti  
9. Tacancang tarageh  
10. Taikek takabek  
11. Talalah takaja  
12. Tahambek tapukua
 
Kato nan ampek
 
Kato pusako
Hiduik dikanduang adat
Mati dikanduang tanah
Adat hiduik tolong manolong
Adat mati janguak manjanguak
Adat lai bari mambari
Adat tidak basalang tenggang
Kato buek/kato mupakat
Bulek aie dek pambuluah
Bulek kato dek mufakat
Tuah sakato nan basamo
Kato daulu
Janji ditapati
Ikara dimuliekan
Kato mamudian
Alang indak sakali inggok
Pikiran indak sakali tumbuah
Raso jo pareso
Raso tumbuah di daro
Pareso tumbuah di kapalo
Bajalan paliaro kaki
Bakato paliaro lidah
Kaki tataruang inai padahannyo
Lidah tataruang ameh padanannyo
Bajalan salangakah madok suruik
Kato sapatah dipikiri
Lamak di awak katuju di urang
 
Catatan: Nan diateh indak sodonyo persis jo nan di buku Pak Amir MS; diramu juo jo bahan lain.
 
Salam dan banyak maaf kok ado khilaf jo khilafait.
 
Wassalam
 
Adyan
PS. Kalau mareply tolong dikuduang. Mokasi.

Kirim email ke