Assalamu'alaikum wr.wb.,
Ota mak Marah nan sakali-sakali tadanga juo di Palanta.
Wassalamu'alaikum wr.wb.,
Lembang Alam
J A L A N
�Lai rancak ambiakan lado Marah mah yo. Alah bara kilo ambiakanno kini?� tanyo Sutan Mantari.
�Kan itulah Mantari. Lado sadang rancak, ambiakano sadang kaelok. Alah sampai salapan puluah kilo ari Salasa kapatang. Tapi aa nan kadisabuik. Aragono jatuah pulo saketek,� jawek mak Marah.
�Iyo, yoh. Jalan ka Pakan nan putuih, disiko turun arago lado. Di Pakan manintiang aragono dek jalan putuih tu,� kecek Malin Ameh maningkahi.
�Itulah ulah rang panggaleh. Dek batambah ongkoih angkuik, dek urang lalu ka Kiliran Jao pai ka Pakan, dinaikanno arago di sinan. Tapi disiko turun aragono dek barang sadang banyak. Bak kecek anak sikola iyo kanai tiori ekonomi namono dumah. Banyak barang, turun arago, saketek barang, banyak parmintaan naiak arago,� sato pulo Sati Bandaro urang lapau Randah tu manambah.
�Tapi aliah-aliah kaji, kalamo kolah jalan rusak ko agakno?� tanyo Sutan Mantari.
�Tadanga di den indak kalamo agakno doh. Alah dimuloi urang sakali mambuek jalan baru, panukai jalan lamo nan taban tu,� jawek Malin Ameh.
�Ado pulo curito den danga dari kamanakan den , nan bahaso jalan nan taban tu dek talatak di bukik nan agak jungkek. Bialah dialiah bana latakno kok indak dipiliah-piliah tampek nan baru ko, tibolo galodo gadang sakali lai alamaik kataban pulo baliak,� kecek mak Marah.
�Bukik jungkek baa kaono goh?� tanyo Sutan Mantari.
�Jungkek, murah taban, dek tanahno bapasia, ditampek nan agak bajurang-jurang pulo. Di tabiangno indak ado kayu tumbuah. Tibo ujan gadang, gambuang tanah tu dek aia banyak marasok kadalam. Itu nan taban, nan jatuah kalambah di bawah,� mak Marah manjalehan sacaro rinci.
�Jadi baa mukasuikno tu kini? Urang nan salah mamiliah lokasi atau salah dek bukik-bukikno bapabiaan sajo indak ba batang kayu?�
�Kalau sia nan salah antahlah. Nan jaleh di den jalan itu kan jalan baru, alun sapuluah tahun rasono umuano lai. Sajak urang mambuek ampangan Koto Panjang di Tanjuang Balik tu. Tapi bahaso banyak bukik-bukik tampek jalan talatak tu indak ado kayu tumbuah iyo lai nampak di den ,� kecek mak Marah pulo.
�Jalan barutu padohal banyak bana katolongan-no salamoko. Sabab jalan tu indak banyak bakelok-kelok. Indak lalu di kelok Tujuah dakek Tanjuang Balik sarupo daulu lai. Tapi rupono ado juo gawano,� kecek Sutan Mantari pulo.
�Paliang indak kan lah jadi palajaran juo du. Batambah juo satidakno ilimu urang awak. Bahaso mambuek jalan gadang ko iyo agak paralu juo diparetongan bana sagalo sasuatuno. Kok bukik nan ka taban. Kok tanah nan karuntuah, kok sungai nan kamarandam,� tambah Malin Ameh pulo.
�Tadanga lo kapatangko, Marah, urang baragak-ragak nak maaliah jalan di kelok sambilan. Kalau itu baa pandapek Marah du?� tanyo Sati Bandaro urang lapau tu.
�Kok iyo amuah dialiah rancak nah. Jalan ko kan iyo kadang-kadang dialiah urang lalu,� jawek mak Marah pulo sambia tasengeang.
�Indak� mukasuik den, paralu atau indak paralu agakno itu dikarajoan urang. Kelok sambilantu kan lain pulo daya tariakno du. Sarupo kelok 44 ka Maninjau.�
�Batua tu Sati. Paralu no ado pulo. Kajadi �objek turih� bak kecek urang kini. Tapi kalau untuak otoparah gadang-gadang nan sarek muatanno sabanano baresiko dibao lalu kian. Jadi paralu dibuekan jalan baru. Tapi antahlah. Kudianko alah dingin sin pulo tekong pakaro jalan baru nan kababuek sajak dari Tanjuang Pauah tambuih ka Lambah Harau tu nampakno,� jawek mak Marah.
�Kok nyampang dibuek urang �labuah raya� di Sumatera ko atau �highway� bak kecek urang, nan ka nagari awak tantu agak kasarik mambuekno rasono iyo ndak Marah? Sabab nagari awak babukik-bukik. Baa agak ati Marah?� tanyo Malin Ameh.
�Ditampek nan indak babukik-bukik nah dilaluan. Tibo di nan babukik-bukik, kalau bapitih nagari awak, buek lubang kalam manambuih bukik tu,� jawek mak Marah.
�Carito mancik-mancik etongan Marah namo no du. Dima pulo kamungkin bukik gadangtu kaditambuih. Bara ka tatambuih tu. Bara kapanjang lubang kalam tu biko?� tanyo Sutan Mantari satangah mancimee.
�Ee, di Parancih bapuluah kilo dibuek urang panjang lubang kalam. Ado nan manambuih bukik, nan malintehi lauik. Baa ka indak di Mantari pulo. Alah ado dikarajoan urang,� kecek mak Marah pulo.
�Iyo pulo yo. Pokokno pitih nan paralu. Asa lai pitih, lai kamauan, bisa karajo tu dikarajoan,� jawek Malin Ameh manutuik carito di Lapau Randah patang haritu.
Do you Yahoo!?
Yahoo! Mail Plus - Powerful. Affordable. Sign up now
