Assalamu'alaikum wr.wb. Posting ambo ko mukasuiknyo bukan untuak "saru", tapi dek karano tapana dek "garah" kanti ambo ditampek alek. Biasonyo kan sabalun alek kan ado acara manjapuik adat, manjapuik marapulai dan sudahtu baru nikah. Wakatu manjapuik marapulai simamak mangatokan ka pihak sabalah baraso calon minantu lah kami agiah gala jo Sutan Marajolelo, dsb.
Wakatu bajalan pulang, ambo jo kanti tadi (baliauko agak siak sangenek go eh), mangatokan baraso gala-gala nan ado diminang ko paralu ditinjau apokoh sasuai jo falsafah adaik basandi sarak sarak basandi jo kitabullah. Aratinyo kalau dapek gala-gala nantun jan ado nan "manjurus" siriak, takabua, dsb. Contoh gala: Datuak Manjinjiang Alam : indikasinyo lah hampia samo jo Tuhan Allah Swt. Sutan Rajo Dilangik : indikasinyo idem. Dek karano pajalanan cukuik jauah, ota kami sampai pulo manyingguang lagu-lagu minang tempo dulu nan candonyo agak manafikan Tuhan pulo. Contohnyo diambiak bait lagunyo Elly Kasim nan babunyi: "......didalam kubua malaikat batanyo ... nan takana uda juo....". Iko kan aratinyo maikko ndak baTuhan doh, sahinggo inyo lah maanggap udanyo labiah tinggi dari Allah Swt. Jadi agak kurang mandidik atau manyalahi falsafah minang itu sandiri. Itu kato kanti ambo tadi. Mandanga ciloteh kanti ambo nan cukuik bisa ditarimo aka tu, ambo samantaro yo maangguak se baru, dek karano kurang bahan namonyo goh sanak. Untuak manambah bahan ambo, ambo mintak tolong ka dunsanak ambo dibalerong ko untuak manjalehkan ka kanti ambo apo asa muasanyo. Tarimo kasih. Wassalam Dedi RantauNet http://www.rantaunet.com Isikan data keanggotaan anda di http://www.rantaunet.com/daftar.php ----------------------------------------------- Berhenti menerima RantauNet Mailing List, silahkan ke: http://www.rantaunet.com/unsubscribe.php ===============================================
