Mak Ban jo dunsanak kasadonyo nan bagabuang di parahu rantau net nan ambo hormati:
Mohon maaf ambo talambek manganakan diri ka sidang rantau net, karano ambo baru pulang bakuli dari Aceh. Mangkonyo surek mak Ban nan duo minggu lalu, baru hari ko ambo baco. Namo ambo: Ahmad Zulkani, nagari asa Unggan, Kecamatan Sumpur Kudus, Kabupaten Sawahlunto Sijunjuang. Tamaik Fakultas Hukum, Unand dan kini bakureh di Medan, Sumatera Utara. Ambo baru ampek bulan di Medan, sabalunnyo duo tahun di Palembang, ampek tahun di Lampuang, tigo tahun di Bangkahulu, babarapo tahun di Batawi. Tampek bakureh ambo yo bakuliliang dari satu kota ka kota lain karano karajo ambo memang bakuli, kecek rang tuo "bakuli tinta" di Harian Kompas. Kalau dunsanak salamoko parnah mambaco babagai curito tantang operasi militer di Aceh nan dimuek di Harian Kompas, kiro-kiro itulah saketek hasia karajo tim di mano ambo dituokan dalam tim kuli tinta Kompas nan ditajunkan di hutan Aceh lah sabulan labiah tasabuik. Maaf mak Ban, baru kini ambo bisa jalehkan karano yo baru kini pulo dapek cuti, sakalian mancigok urang rumah di Medan. Sambah sujuik, datang tampak muko pai tampak pungguang dari ambo, AHMAD ZULKANI - MEDAN. RantauNet http://www.rantaunet.com Isikan data keanggotaan anda di http://www.rantaunet.com/daftar.php ----------------------------------------------- Berhenti menerima RantauNet Mailing List, silahkan ke: http://www.rantaunet.com/unsubscribe.php ===============================================
