Assalamu'alaikum w.w.
Mancaliak pado nan sudah, batuah pado nan manang, lah basuluah matohari, bagalanggang mato rang banyak, rupo lah samo kito liek, bunyi lah samo kito dangan, tumbuah sarupo kini nan ko, tibo di sawah indak lai bapimatang, samo rato kasadono, antah aia nan tacurah dari ateh, antah kok mambusek dari bawah, campua bacampua kasudahanno, tibo nan idak tahu agak-anno, pai nan indak jaleh barano, lah ilang janjang bakeh naiak, lah runtuah tanggo tampaik turun, limbak nan dari pado itu, raso jo pareso lah mulai ilang, baitu pulo hereng dengan gendengno, mako tajadi :
1. Dikacak batih, lah bak batih, Dikacak langan, lah bak langan
2. Habih sandiang dek bagesoh, habih miang dek bagisia.
3. Habih biso karano biaso, habih gali dek galitiak.
Ba a to no kini ko, karano Basiang di nan tumbuah, elok dipinteh sabalun anyuk bana.
Kaluak paku kacang balimbiang
tampuruang lenggang-lenggangkan
baok manurun ka Saruaso
tanamlah siriah jo urekno
Anak dipangku kamanakan dibimbiang
urang kampuang dipatenggangkan
jago nagari jan binaso
jago sarato jo adaikno
mako dipakaikan juolah pituah usang :
1. Pandai bakisa duduak, bakisa di lapiak nan salai, Pandai bakisa tagak, bakisa di tanah nan sabingkah
2. Kok tanah nan sabingkah alah bamiliak, rumpuk nan salai alah bapunyo, malu nan alun ka babagi
3. Nak urang koto Ilalang, nak lalu ka pakan Baso
Malu jo sopan kok lah ilang, habihlah raso jo pareso
4 Jalan nan ampek nan kadikan : partamo Jalan Mandaki, kaduo Jalan Manurun, katigo Jalan Mandata, kaampek Jalan Malereng
5 Bajanjang naiak, batanggu turun
6 Tagak elok alah batanyo, duduak handakno lah mintak sipaik
7 Pai iyo tampak pungguang, tibo rancak tampak muko.
Sakitu nan dikamukokan, kilek baliyuang lah ka kaki, kilek camin alah ka muko, tingga Saluang nan manyampaikan.
Talabiah takurang, tasingguang kalo ka naiak, talendo jikok ka turun, bajalan indak di nan pasa, barannti indak pado titiak, rila jo maaf nan dimintak
Wassalamu'alaikum ww.w.
SBL
Want to chat instantly with your online friends?�Get the FREE Yahoo! Messenger
