Bismillahirrahmanirrahim
Assalamu'alaikum w.w.
Kakanda ZuL Amri nan ambo muliakan
Ampun baribu kali ampun, ambo angkek jari nan sapuluah, ampun sabaleh jo kapalo.
Sungguahpun bana nan katangah dek Kakanda kapado Tuan Mulyadi jo Bundo, bari ijin puloambo sato agak sajuak.
Tantangan bana nan katangah dek Kakanda, iyo alah taracak dalam Undang, talingka dalam Pusako, tibo sungguah ditampaikno.
Limbak nan daripado itu, karano diadaik, kato bajawek, gayuang basambuk, mako ambo cubo pulo manjawekno.
ado pun kajawek kabarino adolah :
Kaluak paku kacang balimbiang
daun simantuang lenggang-lenggangkan
baok manurun ka Saruaso
tanamlah siriah jo urekno
Anak dipangku kamanakan di bimbiang
urang kampuang dipatenggangkan
jago nagari jan binaso
jago sarato jo adaikno
Antaro anak, kamanakan, urang kampuang dan nagari sarato adaik adolah bagian-bagian nan indak tapisah dari satu jo nan lainno.
Adaik dalam pangaratian nan paliang sederhana adolah kaidah-kaidah atau norma-norma, atau aturan-aturan nan balaku dalam kahidupan sahari-hari dilingkungan masyarakat nantun. jo adaik ko lah kito dituntun untuak malakukan atau indak malakukan sasuatu dalam kahidupan kito sahari-hari., katantuan adaik ko banyak kito danga dalam bantuak Papatah, Mamang, Pantul dll.
Dalam pangaratian nan lain Adaik ko dapek dibagi dalam ampek, yaitu Adaik sabana adaik, adaik nan diadaikan, adaik nan taradaik, adat istiadaik
bak kato diateh cako, Adaik nangkolah nan sangaik mampangaruhi tingkah laku Urang MINANGKABAU sahari-hari, sajak ketek sampai gadang, bahkan sampai maningga.
Bak contoh dari Kakanda juo, Kamanakan Barajo ka Mamak, Mamak Barajo Ka Panghulu, dts.... . na sabanano di nan Lahia iyo Kamanakan barajo ka Mamak, tapi di Bathin Mamak manyambah ka Kamanakan. Jadi mengkultus individukan seseorang indak ado di Minangkabau doh.
Ba a mangko baitu ? karano nan ka manggadangkan atau maninggikan Mamak iyo Kamanakan juo, indak urang lain doh.(Mamak dipintu Utang, Kamanakan dipintu Baia) Jadi sungguahpun Mamak didahulukan, mako didahulukan salangkah sajo, kalau ditinggikan, ditinggikan hanyo sarantiang, mukasukno bana, apobilo Mamak salah langkah buliah diirik suruk
Kini baa caro Mamak manunjuak ajai Kamanakan atau baa pulo caro Kamanakan ma-ingekkan Mamak ?
Dalam manunjuak ajai kamanakan, Mamak harus pandai-pandai, indak buliah bak kato awak sajo doh, kan lah tasabuk dalam papatah "Tagangno bajelo-jelo, Kanduano badatiang-dantiang" atau "Kok lunak indak dapek disudu, kok kareh indak talok ditakiak"
Baitu pulo dek Kamanakan, Jan samantang alah (baransua) gadang atau (baransua santiang), buliah sajo ba nan kalamak diparuk surang nan disampaikan. antah kok tabaco pulo di Nan Tuo ; " iyo lah santiang atau iyo lah gadang kini yo, "Dikacak langan lah bak langan, dikacak batih lah bak batih"
Molah kini caro awak manyampaikan sasuatu iyo baliak ka adaik diawak Urang MinangKabau, yaitu Adaik bajanjang naiak, batanggo turun.karano nan ambo caliak salamoko, iyo talatak pado caro panyampaian. Jadi nan paralu adolah, kok nan mudo tahu di mudo no, kok nan gaek tahu di gaek no
Antah kok amuah pulo awak dikecekkan urang beko "indak baradaik", kok lah baitu iyo lah hilang Minang no, nan tingga . Saluang sen manyampaikan
Sakian dari ambo Kakanda, talabiah takurang iyo rila jo maaf nan dimintak.
Tabiiiiiiik
Wassalamu'alaikum w.w.
Sutan Bandaro Labiah
zul amri <[EMAIL PROTECTED]> wrote:
Sanak Mulyadi dan Bundo yth :
Assalamualikum wr.wb:
================= karek
Wassalam : zul amry di kuta bali
Do you Yahoo!?
Exclusive Video Premiere - Britney Spears
Want to chat instantly with your online friends?�Get the FREE Yahoo! Messenger
