Assalamu'alaikum wr.wb.,
Babarapo tahun nan lapeh (mungkin duo atau tigo tahun, ambo agak lupo) masuak bana ambo ka Minangnet tu. Basuo diambo banyak pulo nan bagalau disinan. Katiko itu ambo bali etongan HB pakaro nan manyangkuik-nyangkuik juo jo palecehan agamo Islam. Antah si HB sadang maambiak angok sabanta dulu, indak dijawabno bahasan ambo, taanti rundingan katiko itu. Tapi dalam pado itu datang macam-macam tulisan nan isino bacaruik-caruik bungkang, jo kato-kato nan indak tacotok di ayam. Katiko itu langsuang sajo ambo maambiak kasimpulan, nan bahaso Minangnet, walaupun komunitas tu mamakai namo 'Minang', iyo indak tampek nan patuik ambo sato duduak doh. Sajak itu ambo langsuang 'check-out' dari sinan, indak baliak-baliak lai.
Taraso diambo, urusan ko iyo paralu juo batampek-tampek. Kok nak sato barundiang nan disaratoi jo caruik, jo kato-kato kasa, iyo pai banalah kian. Sabab disinan itu buliah. Samantaro di siko, awak barusaho manjago katanangan. Manjago taratik. Sabab indak kasadoan urang bisa manggunoan taratik tu, mako di awak, di palantako iyo dibuek paga. Sabab malawan urang-urang nan indak tau ditaratik tu di siko iyo kamaabih-abihan tanago sajo. Indak kaado manfaatno.
Jadi bagi nan lanteh angan nak barundiang jo si Jusfiq, jo si HB, jo nan lain-lain tu, bialah di tampek lain sajo. Disiko antilah. Bukan urusan jago kandang atau jago arena. Awak kan indak nak batandiang bagai doh. Sarupo juo jo iduik di tangah koto. Ado tampaik karaoke, ado tampaik bola sodok, ado tampek urang main kim, ado palanta tampek maota, ado surau. Kan indak kamungkin kasadoanno diciek-an sajo.
Wassalamu'alaikum wr.wb.
St. Lembang Alam
Do you Yahoo!?
Free Pop-Up Blocker - Get it now
