Assalamu'alaikum w.w
Angku Saafroedin B. St.Majolelo Nan Ambo Hormati.
Terimo kasih ateh Saran Pak Saaf Iko Ambo Ulang Baliak Mangirimnyo.
Ambo mohon maaf agak talambek ambo menanggapi dan menjawab tanyo angku,
karano baru malamlah ambo bisa manyadiokan waktu untuk manulih.
Ambo batarimo kasih ateh tanggapan dan jawaban angku, ateh tulisan ambo nan
tadahulu. Dan kemudian angku juo maajukan beberapa pertanyaan, ambo akan
mencobo menjawabnyo, semampu dan sebisa ambo dan ambo tulih dibawah pertanyaan
angku dengan huruf miring.
3. Apakah manuruik Bapak Sistem Kekerabatan Matrilineal itu, apa bertentangan
dengan ajaran Agamo Islam?
JAWAB: IYO.
4. Dimana letak pertentangannyo?. Mohon penjelasan Bapak.
JAWAB: PARATAMO AMBO MANUNJUAK ALASAN NAN ALAH LAMO DIAJUKAN DEK SYEKH AKHMAD
KHATIB AL MINANGKABAUWI, BUYA HAMKA, DAN BAITU BANYAK PANGARANG MINANGKABAU
DARI ALIRAN PUJANGGA BARU SAISUAK. INDAK KA AMBO ULANG DI SIKO. ADUO, DALAM
MANYUSUN RANJI NAN MANCATAT NAMO-NAMO URANG NAN BATALI DARAH, RANJI SISTEM
KEKERABATAN MATRILINEAL INDAK MAMASUKKAN NAMO-NAMO DARI KATURUNAN ANAK
LAKI-LAKI, SASUAI JO AJARAN ISLAM TANTANG NASAB. SAKANDAR CATATAN, KOK
DIPAYOBANAKAN BANA, IKO BISA MENJADI MASALAH HUKUM PIDANA ANGKU BACOLAH PASAL
277 AYAT 1 KITAB UNDANG-UNDANG HUKUM PIDANA.
Tanggapan atas jawaban Angku Saaf :
Alasan Bapak kurang akurat untuak di tarimo akal, kalau surang jo baduo nan
indak satuju ateh satu aturan nanlah hidup baratus tahun dalam satu masyarakat,
itu kan hal nan wajar. Tapi itu kan tidak bisa dijadikan sebagai alasan untuak
merobah aturan itu. Kemudian tentang Raji nan bapak kamukokan itu juo kurang
beralasan, karano indak ado satu aturan atau paksaan untuak urang mambuek atau
tidak mambuek Ranji.
JAWAB: BATANYO AMBO SEKETEK ANGKU AZMI DT BAGINDO, APO HUKUM KAKARABATAN
MATRILINEAL MANURUIK VERSI ANGKU KO TAMASUAK DALAM ADAT NAN SABANA ADAT ( NAN
INDAK BISA DAN INDAK BULIAH DIUBAH, SARUPO HUKUM ALAMI ), ATAU DALAM ADAT NAN
TERADAT ( NAN MEMANG BULIAH DIUBAH ). SAIRIANG JO ITU, APO ADAT MINANGKABAU KO
MEMANG INDAK MAMBUKA PALUANG TARADOK KABUTUHAN PARUBAHAN UNTUAK MENJAWAB
TANTANGAN ZAMAN. KALAU BAITU APO ARTINYO: 'SAKALI AIA GADANG SAKALI TAPIAN
BARANJAK'? aMBO AGAK HERAN JUO TARASOK KARANGAN ANGKU MANGANAI SOAL RANJI ITU.
KALAU INDAK ADO RANJI, ATAU KALAU PEMBUATAN RANJI TU. KALAU INDAK ADO RANJI,
ATAU KALAU PEMBUATAN RANJI TU INDAK MARUPOKAN KAHARUSAN, DARI MA KITO TAHU
HUBUNGAN KAKARABATAN NAN KA MANJADI RUJUKAN DALAM MELAKSANAKAN KAIDAH SAKO DAN
PUSAKO? APO LANGSUANG DARI INGATAN SURANG-SURANG? KAN RANJI KO NAN MANJADI
BUKTI DALAM SILANG SANGKETO SOAL SAKO DAN PUSAKO?
JAWAB: Manuruik beberapo pandapek para ahli adat, ado nan mangatokan bahwa
hukum kekerabatan Matrilineal itu adolah termasuk Adat nan di Adatkan, dan ada
pulo nan mangatokann Adat Nan Sabana, Ambo lebih condong kepada pendapek nan
kaduo, Adat Nan Sabana Adat.
Dengan alasan bahwa ado 3 ( tigo ) tiang penyanggah berdiri dengan tegaknyo
adat minangkabau itu, jiko dari salah satu dari nan tigo itu dihilangkan mako
lenyaplah Adat Minangkabau itu, dan adat Minangkabau akan tinggal namo sajo,
hal tersebut adolah :
1. Hukum Kekerabatan Matrilineal, 2. Sistem Sako jo Pusako, dan 3. Perpaduan
adat dengan Agama Islam atau disebut (ABS-SBK).
Kalau dihilangkan Hukum Matrilineal mako hal tersebut akan mampangaruhi
kepada system sako jo pusako. Dan jika kaduo-duonya dihilangkan, mako tidak ado
lai (ASB-SBK) nan tingga adolah (S) atau Syarak sajo. Jikok itu nan tajadi
bapisah adat jo agamo islam, mako kekuatan Minangkabau itu akan hilang. Memang
ado usaha-usaha dari pihak agamo lain untuak memisahkan antaro adat jo agamo di
Minangkabau.
Barkata Hamka dalam bukunya "Islam Dan Adat Minangkabau", ada kemungkinan
bahwa di zaman sekarangpun mulai pula ada usaha-usaha untuk memisahkan adat
Minangkabau dengan Agama Islam, supaya Minangkabau ini bisa menerima agama
keristen sebagai sebagian dari adat. (Hl. 106)
Manuruik pandapek ambo papatah nan angku sabuiktu kurang langkok harus
ditambah dengan, "usang-usang dibarui, lapuak-lapuak dikajangi, adat dipakai
baru baju dipakai usang. Silahkan aia gadang tibo, dan silahkan pulo tapian
barubah, tapi nan aia tetapa aia. Prinsip aia gadang tibo, dan silahkan pulo
tapian barubah tetap aia. Perinsip aia tidak pernah berobah, aia apabilo di
panaskan suhunyo dia akan berobah menjadi uap, dan uap akan berobah menjadi
awan, dan awan kemudian akan berobah menjadi aia atau hujan. Dan aia apabilo
didinginkan suhunyo akan membeku, dan kemudian akan berobah menjadi es, dan es
akan akan kembali menjadi aia, jadi nan aia tetap aia. ( Yus Dt.Parpatiah
Balerong Group ). Jadi prinsip dasar tidak boleh berubah, halko dapek kito
contohkan kepado hal pakaian, sialahkan model baganti - ganti, tapi prinsip
pakaian adolah untuk manutup tubuh. Silahkan roda baputa tapi sumbu tidak
buliak barasak dari tampeknyo.
Jawaban Atas Pertanyaan pak Saaf.
1. Manuruik Angku, ma nan labiah penting: manusia atau harato?
Jawaban Atas Pertanyaan:
Kaduo-duonyo penting, manusia dan harato bando samo-samo penting. Ado harato
indak ado manusia buat apa? ado manusia indak ado harato dimalonyo
katingga, jadi kaduo-duonyo harus dijago dan di lindungin. Dalam adat di
katokan : Bumi Sanang tanam manjadi, padi masak jagung maupiah taranak
bakambang biak, apak kayo mandek batuah, mamak disagani urang pulo. Baldatun
Taiyibatun Warabbun Gafuur".
JAWAB: DARI SAPULUAH PARTANYAAN NAN ANGKU AJUKAN KA AMBO SAMO SAKALI INDAK
ADO KASAN BAHASO MANURUIK ANGKU KADUOANYO PENTING. NAMPAK SAKALI BAHASO
PARATIAN ANGKU LABIAH BANYAK KA HARATO (TUJUAH PARTANYAAN) DARIPADO KA URANG
(TIGO PARTANYAAN). IKO BANA NAN MANJADI MASALAH DALAM ADAT KITO, NAN
TANANG-TANANG SAJO MAMBUANG URANG UNTUAK 'MANYALAMAIKKAN' HARATO. BACOLAH
PRETES BUYA HAMKA DALAM NEVEL BALIAU NAN TAMUSAUA: "TENGELAMNYA KAPAL VAN
DERWIJK"
Jawab: Pandapek angku kurang baalasan, ambo indak tinggado di ateh harato
pusakodo, baik dari istri ambo baitu juo dari harato dunsanak ambo, ambo lah
ampia 36 tahun ambo di jakarta. Dan bukti lain, sacaro umum urang minang banyak
nan maninggakan haratonyo, dan pai marantau, dan malah banyak urang lain nan
maunyi rumah dan mauruih haratotu. Namun ambo ssebagai yang mandapek amanah,
untuak didahulukan salangkah dan ditinggikan saranting, maraso sangat
bertanggung jawab ateh keutuhan haratotu, karano haratotu dijua indak dimakan
bali digadai indak di makan sando. Di minangkabau indak ado urang nan tabuang,
karano seluruhnyo mempunyai mempunyai harato pusako tinggi, sebagai harato kaum
atau basamo. Dan di Minangkabau indak ado anak tirih, sekalipun ayah nyo
bacarai dengan ibu nyo, nan ado hanyo anak tapatan, samularaik-mularaiknyo, dia
tidak akan terlantar karena dia punya rumah dan punya harato.
2. Apa iyo bana padusi dihargoi tinggi dalam system kekerabatan matrilineal
salamo ko, atau hanyo dijadikan sekedar menjadi rujukan untuak mambuek ranji
sajo?
Jawab: Benar, kaum padusi atau perempuan, ditempatkan pada tempat nan sangat
terhormat, ingga di rumah gadang dan ma-ambiak hasil harato pusako.
JAWAB: AMBO SAMO SAKALI INDAK YAKIN JO JAWABAN ANGKU KO. SUPAYO OBYEKTIF AMBO
SARANKAN SUPAYO DITANYO KAUM PADUSI APO IYO MEREKA DIHARGOI TINGGI. BANYAK BANA
HASIL PANALITIAN NAN MAMBUKTIKAN BAHASO PADUSI INDAK DIHARAGOI TINGI DALAM ADAT
KITO. SAWAKATU AMBO HADIR DALAM MUBES LKAAM SOLOK, AMBO DANGA LANGSUANG DARI
KAUM IBU NAN DUDUAK DI BALAKANG AMBO, NANMANGATOKAN BAHASO: "KAMI INDAK DIDANGA
DOH PAK, DIBAO LALU SAJO". ADO CIEK LAI, APO MASIH BANYAK PADUSI NAN TINGGA DI
RUMAH GADANG KINI, DAN APO YO MASIH BANYAK NAN MAAMBIAK HASIL HARATO PUSAKO ?
BAA KOK KITO TALITI?
Jawab : Sabananyo urang padusi Minang harus basyukur menjadi wanita Minang,
karano adat telah memberikan tempat nan terbaik untuk wanita Minang. Seperti
ambo katokan tadi, tingga di rumah gadang, ambialah hasil harato pusako.
Laki-laki malah dari ketek telah rela berkorban, lalok disurau, lah gadang pai
marantau. kok lai baraia pulo asam nan dunsanak padusi tatap bapikiakan juo.
Siang baliek-liekan kok malam badangak-dangakan. Dan bagi orang nan indak punyo
dunsanak padusi rasonyo kehidupan nangko kurang langkok, rasonyo patah indak
katumbuah kok hilang indak kabaganti. Baitu juo dalam pambagian karajo,
disesuaikan dengan kotrat sebagai wanita, laki-laki mambalah kayu wanita
mamasak aia, laki-laki mamangkkua wanita mananam padi. Tapi kalau padusi nak
jadi datuak pulo sarupo nan berkembang sewaktu musyawarah Solok, iyo indak
mungkindo atau nak jadi imam pulo dalam Sholat yang makmumnyo laki-laki iyo
indak bisa pulo.
3. Apo Angku Azmi Dt Bagindo mampraktekkan diskriminasi antaro anak Angku nan
padusi taradok anak Angku nan laki-laki?
Assalamu'alaikum w.w. Angku Azmi Dt Bagindo dan para dunsanak sa palanta.
Karano jawaban langsuang ambo diputuih dek program komputer, barikuik ko ambo
sambuang tanggapan ambo taradok jawaban Angku Azmi Dt Bagindo.
4. Baa mako para panghulu indak panah maajak para Bundo Kanduang barundiang
dalam rapek-rapek adat? Kan alah ado nan bapandidikan tinggi, tamasuak nan
bagala Prof, Dr ?
Jawaban : Sabalun tanyo angku ambo jawab tantang Bundo Kaduang, tolong angku
jalehkan dulu apo dipenisi Bundo Kandungtu ?, dan Bundo Kandung yang mana nan
angku mungkasuik ?.
JAWAB: DEFINISI ( JAN DITULIH 'DIPENISI' ANGKU AZMI DT BAGINDO, BISA LAIN
RATINYO NANTI ) NAN RESMI DALAM ADAT KITO KAN INDAK ADO DOH. SACARO UMUM BUNDA
KANDUANG KITO MUKASUIKKAN PARA TOKOH PADUSI DALAM BUAH PARUIK, KAUM, DAN SUKU.
KINI BAA JAWAB ANGKU TARADOK PARTANYAAN AMBO TU ?
Jawab : Manuruik nan ambo tahu kaum Ibu atau Bundo Kandung nan sasuai dengan
ketentuan adat, selalu dilibatkan dalam setiap musyawarah, pada kaum atau
sukunyo masing-masing.
5. Baa pandapek Angku tantang panghulu nan indak malaksanakan kawajibannyo
sacaro baiak, antaro lain nan banyak manggadai dan manjua harato pusako, dan
bukan manyalasai tapi malah mambao parakaro harato pusako ko ka pangadilan,
saparati dikaji dek baitu banyak panaliti?
Jawaban : Sabananyo kito indak bisa manyalahkan panghulu sajo, banyak juo nan
bukan panghulu nanlah babuek sakandaknyo tentang harato pusakotu, dengan dalik
dan alasan macam-macam. Manjua, manggadai dan mamberikan kepado pihak lain.
seperti nanlah tajadi pado ayahda angku dan angku sendiri. Angkuk sendiri
kanlah malakukan hal saparati itu dengan manjua habis harato pusako dalam
paruik ibu atau suku angku di Kajai Kampung Dalam Pariaman (MAH hl. 36-37). dan
nan labiah parah lai adiak kandung angku sendiri nan banamo H. Chairuman Bahar
berhasil pulo mayakinkan mamak dari pihak isterinyo untuak manjua harato dalam
kaum istrinyo (MAH hl. 39) iko adolah sangat batantangan dengan prinsip dasar
adat Minangkabau, seorang urang samando indak baik manuruik adat berbuat
demikian. Dalam adat dikatokan harapan terhadap urang samando adolah : "Kok
elok ratak tangannyo baolah manukuak jo manambah, kok elok ratak lidahnyo
baolah kusuik manyalasai, baolah karuak manjaniahkan. Kahilia
baolah sarangkuah dayung kamudiak baolah saantak galah. Jan tajadi
sabaliaknyo," aia taganang jan dikaruah, tali tarantang jan diputuih, kok tibo
dikusuik jan maenjo-enjo, kok tibo dikaruah jan mangundak-ngundak". Opo lai
manjua manggadai harato an bukan hak kito. Jadi tujuaktu cieknyo nan untuak
urang tigo untuak awak.
JAWAB : ALHAMDULILLAH, WALAU SACARO IMPLISIT ANGNKU ALAH MANGAKUI BAHASO
MEMANG ADO PANGHULU NAN INDAK MALAKSANAKAN KAWAJIBAN BALIAU-BALIAU SACARO
BAIAK. HANYO KINI ANGKU MANUNJUAK BAHASO INDAK PANGHULU SAJO NAN MALANGGAR, NAN
INDAK PANGHULU JUO MALANGGAR. DALAM HAL KO ANGKU MANUNJUAK PANGALAMAN AMBO (IKO
KAN JUO SANGAT PRIBADI, ANGKU AZMI DT BAGINDO?). TAPI BAIKLAH, NAN KAMI JUA
ADOLAH NAN BAGIAN KAMI BADUNSANAK.
JAWAB : Ambo tidak baniat untuak manyarang pribadi angku, tapi persoalan
tersebut telah terbuka untuk umum, dan nan mambuka adolah angku sendiri dalam
buku angku. Pertanyaan ambo apo mungkasuik angku mambukanyo ?
Apo angku berkeinginan haltu diikuti oleh masyarakat Minang laiinyo ?
6. Lai satuju Angku kalau para panghulu nan indak malaksanakan tugasnyo itu
di 'lengser' sajo ?
Tantang lenser malenser, tunggu dulu angku, setiap orang boleh sajo
bapandapeh tamasuak angku, dan itu adolah hak asasi, tapi apo pandapek itu
telah melalui analisan nan mandasar dan objektif, apo alah dikaruak saabih
saung dan diawai saabih raso,.. Ambo agak kuatir dan ragu tantang nantun.
JAWAB : AMBO BISA MANGARATI TANTANG KAKAWATIRAN ANGKU TARADOK MASALAH KO.
TAPI RANCAK JUO DIPIKIAKAN GAGASAN SUPAYO MUTU PARA PANGHULU KITO SAMAKIN LAMO
SAMAKIN TINGGI. DIPISAHKAN ATAH DARI BAREH.
Jawab : Kalau tujuannyo untuak mamparbaiki, ya boleh-boleh sajo. tapi harus
hati-hati dan bijaksana dalam mamasukinyo, karano alang tukang binaso kayu,
alang alim binaso kitab, alang cadiak banaso buek. Salah cotok bisa
malantingkan, salah awai bisa ma-ampehkan, salah makan bisa mamuntahkan. Namun
kalau buliah ambo sarankan, dimulailah dulu dari suku atau kaum kito
masing-masing. Kok ado nan lamah ya dibilai, kok ado nan senteng yo, diuleh,
kok nan umpang ya disisik. Kalu indak awak sia lai, kalau indak kini kapan
lagi. tapi kalau kito antam taruik dari tua, sadangkan kito urang dalam baa
jadinyo. Kalau jaleh-jalehlo urang lua nan maantam, basamo-samo malah kito
maadikinyo. Dalam adat dikatokan, tagak suku paliahro suku, tagak kampung
kampung, tagak nagari pliharo nagari. Sabaliaknyo salisiah basuku salasaikan
bakampung, salisiah bakampung salasaikan banagari, begitu sataruihnyo. memang
tanah sabingkahlah bapunyo, rumpuik saalailah bamiliak, tapi malu alun babagi,
malu
indak bisa dibagi, suku indak bisa dianjak. Baalah bunyinyo kukuak badarai di
galanggang, tapi indak tahu jo pintu kandang.
7. Lai satuju Angku kalau kito adokan angket untuak mananyokan panilaian para
bundo kanduang dan para kamanakan taradok kapamimpinan para niniak mamaknyo
masiang-masiang?
Jawaban : Itu buliah-buliah sajo kalau tujuan dan niat lai samo elok. Namun
kontek dan pendekatannyo harus jaleh dan objektif. Jan jauh-jauh antaro angku
jo ambo sajo bisa babeda dalam mengartikan satu permasalah-permasalahan adat.
Apolai kalau urang nan malakukan survey dan angket itu urang nan indak suko jo
adat atau indak mangarati tentang seluk beluk adat, pasti hasilnyo akan buruak.
Iko namonyo mamintak ubek kaurang manuju.
JAWAB : AMBO JUO MANGARATI KABARATAN ANGKU TARADOK GAGASAN MAADOKAN ANGKET DI
KALANGAN PARA BUNDO KANDUANG DAN PARA KAMANAKAN TANTANG KAPAMIMPINAN PARA
NINIAK MAMAKNYO MASIANG-MASIANG. NAMUN AMBO INGIN MANDANGA TANGGAPAN DARI PARA
BUNDO KANDUANG JO PARA KAMANAKAN NAN BASANGKUTAN. LAI SATUJU?
Jawab : Untuak hal iko ambo mausulkan kironyo, "Kesimpulan Seminar Hukum Adat
Minangkabau" nan kebetulan angku nan manulih Kata Pendahuluannyo. Kironyo hal
itu dapek dijadi sebagai pedoman dalam mambenahi kehidupan masyarakat adat.
Karano disitu di jelaskan ado tigo norma, yaitu Adat, Agama. dan hukum tertulis
yang ketigo-tigonyo mapunyo tujuan yang samo. Dalam adat itu dikatokan "Tali
saalai bapilin tigo", indak buliah kandua tagang salampih. Kalau kandua tagang
salampih tali putuih kabek kaurak, alamat kayu kabaserak. Kini ikolah nan
tajadi. Jadi harus samo dan seimbang dan saling menghormati satu samo lain.
Salanjuiknyo ambo maliek ado beberapa tulisan angku baik dalam (MAH) atau
yang lain, antara lain :
1. Angku mangotokan bahwa ayahda angku sukunyo Koto, kalau manuruik suku
ayah, angku harus koto sukunyo. Dan ibu angku sukunyo Tanjung, kalau manuruik
ibu angku suku angku harus Tanjung. Namun angku manyatokan indak ma-ambiak
kaduo-duonya, angku urang Indonesia dan tingga di Jakarta.
2. Angku manyatakan telah manjua seluruh harato pusako pasukuan angku,
sainggo angku telah berhasil mamtuik mato rantai dengan kemelut adat
Minangkabau.
3. Angku bersyukur karano seluruh anak angku tidak ado lai hubungan dengan
kehidupan yang namanyo nagari di Minangkabau dan mereka telah menjadi oramng
Indonesia.
Kesempulan ambo dengan hal tersebut diateh, bahwa dalam diri angku sudah
indak ado lai raso cinto terhadap apa yang namanyo Adat Minangkabau.
Pertanyaan ambo adalah :
1. Baa pandapek angkku tantang nantun ?
2. Kenapa angku kok masih sangat keras untuak mengadakan perobahan mandasar
tentang (ABS-SBK) ? ..... Disetiap kesempatan selalu angku manfaatkan untuak
itu.
3. Apokok angku berkehinginan seluruh urang minang malakukan seperti nan
angku lakukan diateh ?
4. Apo angku berkeinginan agar Adat Minangkabau itu bubar atau hilang dari
permukaan ?
5. Apokok ado hubungannyo dengan kekalahan Ayahda angkuk baparo karo jo
adiaknyo di padang panjang ?. Sehinggo menjadi sesuatu nan indak biso Angku
lupokan, bak duri dalam daging bak tulang dalam rangkungan, lah batahun takana
juo, Sehinggo akirnyo, sarang manciktu bana nan ingin di baka.
Rasonyo masih banyak lai pertanyaan ambo nan ingin ambo sampaikan kapado
angku apolai tentang buku angku (MAH) mudah2an angku masih bersedia
manjawabnyo. saklitu sajolah dulu dari ambo mudah-mudahan ado manfaatnyo, dan
mohon maaf bilo ado nan kurang pado tampeknyo, terimo kasih.
Wasalam,
Azmi Dt. Bagindo
---------------------------------
Sekarang dengan penyimpanan 1GB
http://id.mail.yahoo.com/
--~--~---------~--~----~------------~-------~--~----~
Kami mengundang sanak untuk hadir dalam acara: "Wartawan mengajak Berdoa
Bersama untuk Keselamatan Negeri" pada tanggal 8 April 2007 jam 08:00 di Masjid
Istiglal. Acara ini terpicu oleh musibah terbakarnya Ustano Pagaruyuang dan
Gempa di Sumbar.
Berhenti (unsubscribe), kirim email ke: [EMAIL PROTECTED]
Konfigurasi dan Webmail Mailing List: http://groups.google.com/group/RantauNet
Daftar dulu di: https://www.google.com/accounts/NewAccount
-~----------~----~----~----~------~----~------~--~---
