Sarupo biaso, lantaran hari akaik, lapau Uwo rami dek tamu-tamunyo. Indak sajo tamu nan lah manjadi langganan, tapi juo ado urang-urang nan hanyo sakali sapakan batandang ka sinan.
Salain untuak sakadar minum kopi sambia maabihan hari, urang-urang tu nio balamo-lamo di lapau Uwo Pulin, karano ado bacaan surek kaba 'Singgalang'. Surek kaba tu lah manjadi langganan di lapau tu sajak tigo taun lapeh. Maklum, surek kaba urang awak tu sabana langkok isinyo dan lugas bahasanyo, sahinggo bisa dimangarati dek urang-urang nan tingkek sikolanyo randah. "Apo carito angek di surek kaba awak kini, Tan?" Tanyo Uncu Labai nan baru masuak lapau. "Kok nan angek indak ado doh, cuma nan runciang lai ado," jawek Tan Baro. "Ha....., iko baru nampaknyo mah. Apo nan runciang tu?" baleh Uncu sambia batanyo baliak. "Sasuai jo pancaliak-an awak, tanyato nagari ko sabana panuah dek tonggak-tonggak tower. Kadang-kadang bantuak karangko rumah gai nagari awak, tingga maagiah atok se lai. Bayangkanlah, dalam ciek tampek kadang-kadang ado duo, tigo sampai ampek jo limo bagai tonggak menara," jawek Tan Baro. "Itu kan biaso. Tandonyo, di nagari ko banyak telepon seluler. Aponyo nan runciang?" baleh Uncu baliak. "Iyo biaso. Tapi, kecek urang nan lah pai kalua nagari, ampia indak basuo dek inyo tonggak tower telepon selular tu. Kalau pun ado, ciek tower dipakai basamo-samo. Barangkali, kalau wak bandiangkan jo negara maju lainnyo, labiah banyak urang tu punyo operator seluler dari nagari awak," baleh Tan Baro pulo. "Di lua nagari tu, tonggak tower tu disadiokan dek pamarentah dan pangusaha selulernyo tingga menyeyo se lai. Samantaro di nagari awak, parusahaan seluler tu bantuak indak bisa basatu, sahinggo urang-urang tu batandiang hebat dan batandiang maajan tuah. Kan lah samo-samo wak caliak di televisi atau wak baco di surek kaba, satiok kartu henpon mangecek-an paliang rancak. Kartu X mangecek-an inyo paliang imaik, datang kartu Y mangaku pulo rancak, sudah tu produk Z lah sato pulo santiang. Dek batandiang saroman itu, mako tapaso pulo batandiang mambuek tower. Baa dek Tan Baro?" Tibo-tibo Kari Garejoh manyolang jo pandapeknyo surang. Tan Baro indak bisa manjawek. Inyo hanyo tapana, karano apo nan dikatokan konconyo tu batua. Memang harus diakui, satiok produk operator seluler di nagari ko mangecek-an nan paliang hebat dan paliang imaik. Tapi, satiok urang nan mamakai pasti tapakiak, karano kalau lai imaik bilo dipagunokan kapado produk nan samo. Tapi, kalau lah dipakai ka produk lain, pasti haragonyo maha. Apolai kok sampai dibao kalua nagari, mahanyo Allahurabbi. Itulah tandonyo operator seluler samo-samo maajan tuah dan indak bisa mambuek kaputusan basamo soal harago. "Takana dek ambo, tadi Tan Baro mangatokan nan runciang itu apo?" Tanyo Uncu panasaran. "Nan runciang tu towernyo. Kan bisa samo-samo wak caliak, tu, nan dakek dari siko se. Dek ulah tower tu, tantara angkatan udaro takuik tajun payuang di siko. Karano, kalau sempat jatuah di tower tu, kan babayo," jawek Tan Baro sambia galak manih. Kawan-kawannyo Tan Baro nan mandanga cuma bisa sato galak manih pulo. "Kalera bauwok!" Sorak Uncu Labai. "Tapi, indak itu se doh. Urang-urang nan tingga dakek tower banyak nan cameh. Baa ka indak? Saumpamo tower tu runtuah dek gampo atau dek angin, tantu maundang cilako. Cubo samo-samo wak pikia, sia nan lai namuah cilako? Sia nan namuah rumahnyo diimpok basi-basi tower? Sia pulo nan rela mati diimpok pakakeh telepon seluler tu?" Sambuang Tan Baro sambia batanyo. Indak ado nan manjawek. Ampia kasadonyo bisa maklum. Memang, ado urang nan tingga dakek tower takuik jo ancaman musibah bantuak itu, tapi baalah mangatokannyo. Espe St.Soeleman http://www.hariansinggalang.co.id/palanta.html --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount =============================================================== -~----------~----~----~----~------~----~------~--~---
