Mangomel, mangarutu tarui awak ka pejabat-[ejabat tu, samo aratinyo kini awak babarab ka talingo kabau.... antahlahh... -------------------------------
Kalau dietong-etong, sabana indak taetong lai Tan Baro jo kawan-kawannyo supayo Uwo mampaelok-i layanan di lapau tu. Umpamonyo mambasuah galeh supayo pakai sabun dan ijan pakai abu, di ateh meja ado asbak supayo puntuang rokok indak baserak di lantai. Tapi, saran-saran saroman itu indak kunjuang dikarajokan. Kalau mambasuah galeh lai pakai sabun, tapi asbak indak nampak di ateh meja. Padohal, nan rancana Uwo ka manjadikan lapaunyo tu sabagai lapau pacontohan untuak masalah kabarasiahan. "Ambo ka mambuek lapau ko sabagai contoh dalam kabarasiahan. Di muko lapau dakek pintu ka ambo buek tong sampah, di ateh meja ado asbak, sudah tu dakek pintu masuak ka ambo buek pulo tampek basuah tangan bantuak nan ado di restoran urang Amerika." Baitu rancana Uwo sajak saisuak. Walau lah barancana saroman itu, tapi indak kunjuang dikarajokan. Ijankan mambuek tong sarok atau tampek pambasuah tangan, untuak mambali asbak rokok se alun juo. Padohal, tamu-tamunyo alah acok manganaan soal itu ka Uwo. "Baa alun juo dibali asbak untuak di ateh meja ko Wo? Baraa banalah balinyo asbak tu salusin. Atau samati-mati angin, buek se jo sayak tampuruang atau kaleang susu, indak bapokok gai tu doh," kato Udin Kuriak. "Jan ditanyo juo Uwo tu lai, Din. Samo jo barabab ka talingo kabau. Indak ka didanga bagai tu doh. Ota iyo lai balawuak, tapi makan jo samba lado. Angan-angan satinggi langik, tapi kamampuan indak ado. Napasu gadang, tanago kurang," semba Angah Piyan. Sadang lamak maota soal kabarasiahan lapau Uwo, tibo-tibo Tan Baro masuak. Sarupo biaso, baru tibo lansuang batanyo barita angek ka Angah nan kabatulan sadang mamacik surek kaba 'Singgalang'. "Barabab ka talingo kabau, Tan!" Jawek Angah. Indak sajo Tan Baro nan tacangang mandanga jawek Angah, tapi juo Udin, Uncu Labai, Kari Garejoh, Ajo Tondeh, Tacin sarato nan lainnyo. Karano, dari barita-barita nan dibaco dek urang-urang tu, indak ciek juo nan pakai judul barabab di talingo kabau. Istilah tu cuma kalua dari muncuang Angah untuak Uwo. "Nan ka iyo-iyo se lah, Ngah!" Tan Baro indak picayo. "Itu nan sabananyo mah, Tan. Tadi ambo baco barita nan mangatokan kinerja aparat Pemko lamah. Barita-barita saroman itu manuruik ambo indak taetong acoknyo lai, tapi sampai kini indak ado parubahan. Apo itu ndak samo jo barabab ka talingo kabau? Baraa banalah ka rancaknyo lagu, indahnyo syair, tapi dek kabau indak mangarati, pasti inyo santai se," kato Angah mampajaleh mukasuiknyo. Agak tamanuang Tan Baro mandanga jawek kawannyo tu. Karano, apo nan dikatokannyo tu batua. Walau acok anggota dewan atau lembaga independen lainnyo nan mangecek-an kinerja pamarentah lamah, tapi sampai kini indak nampak barubah. Umpamonyo masalah urang manggaleh di ateh trotoar, masalah parkir nan indak bakatantuan, masalah angkutan kota, kamacetan sarato lainnyo, sampai kini lai bantuak itu juo. Malah, pajabaik nan tadinyo banyak masalah, dipatahankan taruih bataun-taun di posisinyo. Sadangkan kawan-kawannyo nan lain alah babarapo kali dituka. Espe St.Soeleman http://www.hariansinggalang.co.id/palanta.html --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount =============================================================== -~----------~----~----~----~------~----~------~--~---
