Assalamualaikum wr wb
Angku, mamak, bundo sarato dunsanak sapalanta dimano sajo barado nan ambo
hormati,
Sambia taruih melakukan pelatihan & pengumpulan data untuak dokumentasi website
nagari Sumpur Kudus nan sadang kito lakukan di Kanagarian Sumpu Kudus, ambo
seperti biaso kutiko melakukan pendampingan selalu bajalan bakuliliang subalik
nagari di Sumpur Kudus nan ko. Perlu diketahui Kanagarian Sumpur Kudus nan ko
babeda jo Kec. Sumpur Kudus. Kecamatan Sumpur kalau kito caliak dari pembagian
wilayahnyo, terdiri 3 wilayah nan terpisah dek sabab kontur tofografi
perbukitan nan mambuek 11 pemerintahan nagari dengan 8 Kanagarian dipisahkan
oleh perbukitan nan cukuik terjal. 3 Wilayah mantun adolah sebagai berikut :
1. Nagari Kumanih, Nagari Tanjuang Bonai Aua & Nagari Tanjuang Bonai
Aua Selatan.
Merupakan pusat pemerintahan kecamatan Sumpur Kudus nan talatak di Nagari
Kumanih. Di Nagari Kumanih nan ko pulo tadapek pasa sarikat 8 Kanagarian nan
hari balainyo adolah hari Salasa. Sajak saisuak, penduduk di 8 Kanagarian
selalu ramai mengunjungi pasa sarikat nan ko. Wilayahnyo basubalahan jo
nagari-nagari di kec. Lintau Buo, yaitu Nagari Taluak & Nagari Tigo Jangko.
Lokasi kaduo nagari nan ko indak jauah dari jalan lintas Muaro Sijunjuang -
Pikumbuah, sekitar 3 km & 7 km. Kanagarian Kumanih jo Kanagarian Tanjuang Bonai
Aua wilayahnyo dipisahkan oleh batang Sinama (Sinamar) nan bahulu di Koto
Tinggi daerah mudiak luhak 50 Koto.
2. Nagari Tamparugo, Nagari Tanjuang Labuah & Nagari Sisawah
Diwilayah nan ko terdapat 2 Kanagarian, dimano nagari Tanjuang Labuah adolah
pemekaran dari Nagari Tamparungo.Kaduo pemerintahan nagari nan ko adolah 1
kanagarian yaitu Kanagarian Tamparungo. Jarak antaro Kanagarian Sisawah jo
Kanagarian Tamparngo + 7 km. Diwilayah nan ko banyak terdapat bukik karang nan
kalau dicaliak sacaro geologis adolah perbukitan kapur & marmer. Di wilayah iko
bisa dijumpoi banyak ngalau-ngalau saroman nagari Silokek Kec.
Sijunjuang. Jarak dari Tamparungo ka Kumanih sekitar + 12 km.
3. Nagari Unggan, Nagari Silantai, Nagari Sumpur Kudus, Nagari Sumpur
Kudus Selatan & Nagari Mangganti.
Wilayah di nagari-nagari nan ko dipisahkan oleh bukik Lontiak dengan wilayah
Kanagarian Tamparungo & Kanagarian Sisawah. Jenis tanah di bukik Lontiak
marupokan perbukitan tanah potsolit merah kuning (PMK) dengan campuran pasir.
Pado lapisan nan bacampua jo kasiak nan ko acok menyebabkan lereng di
perbukitan nan ko tamban/longsor. Jaraknyo dari Kumanih + 30 km. Jarak dari
Unggan ka Sumpur Kudus sekitar 7 km, baitu pulo jarak antaro Sumpur Kudus
dengan Mangganti sekitar 7 km pulo.
http://peta.sijunjung.go.id/
Umumnyo masyarakat di Sijunjuang memiliki matapencaharian 2 macam, yaitu
bacocok tanam padi & baladang varietas karet/gatah (Havea Brazillensis).
Penamaman karet alah dilakukan sajak maso kolonial Bulando. Dimano dari
penuturan urang-urang tuo disiko bibit tanaman diperoleh dari wilayah
Lintau.Oleh karano itu, pabilo kito bakunjuang ka Sumpur Kudus, sajauah mato
mamandang akan dapek dicaliak hamparan sawah didataran & tanaman karet
diwilayah perbukitan.
Pado sisi barat perkampungan dipisahkan oleh perbukitan nan dibaliaknyo tadapek
rimbo gadang nan disabuik dengan namo Rimbo Lisun. Rimbo Lisun nan ko
wilayahnyo sangaik laweh & memanjang dari wilayah Unggan sampai ka hilia di
Mangganti taruih ka Nagari Durian Gadang Kec. Sijunjuang & Nagari Padang Tarok
di Kec. Kamang Baru. Rimbo Lisun nan ko berbatasan lansuang jo wilayah Provinsi
Riau nan wilayah adminitrasinyo adolah Kabupaten Kuantan Sengigi (pusat
pemerintahan di Taluak Kuantan). Dek Karano tofografi perbukitan nan terjal,
sampai kini akses jalan ka Rimbo Lisun hanyolah jalan setapak. Dari informasi
nan diperoleh niniak mamak Kanagarian Sumpur Kudus, dalam 3 bulan terakhir
ditamui pemukiman urang Kubu di Rimbo Lisun nan acok turun ka Mangganti untuak
manjua hasil hutannyo. Pemkab. Sijunjuang & Pemprov Sumbar kini sadang
maansua-ansua akses jalan ka Rimbo Lisun dengan mambuek wilayah transmigrasi di
perbatasan nagari Padang Tarok Kec. Kamang Baru &
dalam perencanaanyo akan membangun jembatan di batang Kuantan untuak pemukiman
transmugrasi nan ko.
Dari hasil pengamatan nan alah dilakukan, kebetulan kami alah ka Sumpur Kudus
sabanyak 7 kali dalam satahun terahir, mandapek kesimpulan bahasonyo
matapencaharian masyarakat di Sumpur Kudus dapek ditingkekan. Hal iko mancaliak
dari nan alah kito sigi sacaro labiah teliti dilapangan. Sabab,
saindak-indaknyo, masyarakat di nagari nan frofesinyo adolah petani harus
memiliki paliang tidak 4 sumber penghasilan. Nan ado kini hanyo bersumber dari
padi sawah & tanaman karet sajo. Hasil bercocok tanam dari padi sawah hanyo
dipakai untuak kebutuhan sendiri, sabab produktivitas tanaman padi disiko agak
randah, sekitar 2-3 to per hektar. Hal iko disababkan jenis tanah nan bukan
termasuk tanah vulkanik saroman di Sungai Tarab, Pariangan, Batipuah X Koto,
Agam Tuo, Salingka danau Maninjau, Solok, Alahan Panjang ataupun di Talu
Sinuruik.
Hasil tanaman karet marupokan tulang punggung pendapatan masyarakat nagari
disiko. Dimano hasil ladang karet nan ko nan samato-mato menjadi penghasilan
tetap masyarakat nagari. Kisaran harago karet kini sekitar Rp. 8.500 - Rp 9.000
per kg. Samanjak tsunami Japan tahun lalu, harago karet dunia memang jatuah
dari harago Rp. 20.000 per kg. Aktifitas baladang karet nan ko setelah kito
amati indak memakan wakatu sahari panuah. Masyarakat nagari mulai pai ka ladang
sajak salasai shalat Shubuah, nan salasai pado pukua 11.00 wib. Setelah ba'da
Zhuhur kegiatan masyarakat nagari dilanjuikan pado mengelola ternak. Ternak nan
umum disiko adolah jawi/sapi & kabau. Selain itu, kaum ibu juo melakukan
kegiatan penenunan kain songket Unggan sarato bordir. Untuak kain songket
hasilnyo dibali lansuang oleh pemkab Sijunjuang untuak kebutuhan pakaian dinas.
Sadangkan untuak bordir alah ado pulo pedagang-pedagan nan babaliak ka nagari
untuak mangumpuakannyo.
Setelah kito inok manuangi, potensi nan bisa dikambangkan adolah sektor
peternakan. Yaitu penggemukan sapi & peternakan ayam petelur. di 5 nagari/4
Kanagarian nan ko jumlah penduduknyo sekitar 18.000 jiwa. Sampai kini
talua-talua ayam nan masuak ka nagari barasa dari Pikumbuah. Dijua dengan
harago saketek labiah maha sabab biaya transportnyo iyo agak gadang dek
termasuk wilayah pelosok pulo. Mungkin ado dari angku, mamak. bundo sarato
dunsanak nan tertarik mambuek usaho peternakan ayam petelur di Sumpur Kudus.
Hal iko alah kito bicarakan dengan pemerintahan nagari. Alhamdulillah disambuik
baiak oleh masyarakat disiko. Mengenai lahan, bahan baku kandang saroman kayu
jo batuang/bambu tasadio di nagari. Tinggga mausahokan atok jo kawek sarato
bibit ayam petelur & pakannyo. Untuak tenaga kerja banyak nan tasadio di
nagari. Umumnyo di Mudiak 50 Koto nan marupokan sentra penghasil telur di
Sumbar, satiok pekerja dibayia jo upah Rp. 2.000.000/bulan + sakaruang
bareh. Pabilo ado nan berminat silahkan hubungi LPM Marapalam & akan kito
bantu untuak mampasamokannyo jo pemerintahan nagari basarato KAN Sumpur Kudus.
Selain itu, kami juo berencana untuak mambuek usaho penggemukan & indukan sapi
Simmental di nagari Sumpur Kudus. Jam karajo petani karet disiko nan hanyo
satangah hari (dari jam 06.00 wib - 11.00 wib) bisa labiah diberdayakan untuak
usaho penggemukan & indukan sapi. Selain itu, pado ladang-ladang karet rakyat
nan ado bisa dilakukan penanaman rumput untuak pakan ternak. Pado wilayah nan
agak data bisa dijadikan padang pengembalaan & pado nan labiah miriang akan
dilakukan dengan caro manyabit.
Manuruik penutura masyarakat di Sumpur Kudus, sistem mampaduokan jawi di nagari
nan ko pembagiannyo adolah 50% - 50%. Sebagai contoh, anakan jawi dibali dengan
harago 8 juta di pasa taranak nagari Palangki. Setelah dilakukan penggemukan
salamo 1 tahun bisa dijua saharago 16 jt. Hasil barasiah mantun nan akan dibagi
manjadi 50% - 50%. Sadangkan nan mamaliharo jawi untuak indukan, setiap lahia
anak, setelah lapeh susu (6 bulan) nilainyo akan dipatuik, dari nilai mantun
akan dibagi satangah untuak petani nan maurus jawi & satangah lai adolah hak
dari pemilik jawi. Anakan jawi nan lahia bisa dijua pabilo jantan & nan batino
bisa digadangkan taruih untuak dijadikan indukan.
Untuak pembuatan kandang, bahan-bahan ditangguang pemilik jawi, sadang pekerja
dilakukan oleh petani. Dek karano kito di LPM Marapalam dianjurkan babuek
daripado hanyo marancang-rancang sajo, insya Allah ambo akan sato dalam usaho
penggemukan nan ko, paliang indak saikua jawi dek pitih ambo indak pulo ado
bana.
Mungkin kapado angku, mamak, bundo sarato dunsanak ado nan ka ikuik? Silahkan
hubungi LPM Marapalam insya Allah akan kito buek kandang basamo & dibuek pulo
perjanjian tertulisnyo jo petani, pemerintahan nagari sarato niniak mamak
Kanagarian Sumpur Kudus.
Mungkin itu sajo nan bisa ambo sampaikan, mano tahu ado dari kito di palanta
nan ko nan akan ikuik sato. Email nan ko ambo cc kan pulo ka inisiator LPM
Marapalam, yaitu pak Saafroedin Bahar, mak Dutamardin Umar, mak doto Hilman
Mahyudin, pak Abraham Ilyas, mak Darwin Chalidi & pak doto Rahyussalim.
wasalam
AZ/lk/34th/caniago
Sumpur Kudus - Sijunjung
asa nagari Kubang, 50 Koto
babako ka Canduang Koto Laweh, Agam
http://lpmmarapalam.wordpress.com/
http://armenzulkarnain.wordpress.com/
mobile : +6281275441828
--
--
.
* Posting yg berasal dari Palanta RantauNet, dipublikasikan di tempat lain
wajib mencantumkan sumber: ~dari Palanta R@ntauNet
http://groups.google.com/group/RantauNet/~
* Isi email, menjadi tanggung jawab pengirim email.
===========================================================
UNTUK DIPERHATIKAN, melanggar akan dimoderasi:
- DILARANG:
1. E-mail besar dari 200KB;
2. E-mail attachment, tawarkan di sini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://forum.rantaunet.org/showthread.php?tid=1
- Tulis Nama, Umur & Lokasi disetiap posting
- Hapus footer & seluruh bagian tdk perlu dlm melakukan reply
- Untuk topik/subjek baru buat email baru, tdk mereply email lama & mengganti
subjeknya.
===========================================================
Berhenti, bergabung kembali, mengubah konfigurasi/setting keanggotaan di:
http://groups.google.com/group/RantauNet/
