Walau lataknyo tasuruak, tapi barita ko dek Mak Pono sabana rancak. ‘Lowongan Ada, Tapi tak Terisi', itulah judulnyo. Barita saroman itu pun manjadi tando tanyo di kapalo urang gaek tu. Baa ka indak? Salamo ko anak-anak mudo mamakiak mancari karajo. Malah, satiok tahun barangkali sampai ribuan tambahannyo.
“Aneh. Satiok hari talingo ambo mandanga sariknyo mancari lapangan karajo, tapi di surek kaba ko dikatokan lowongan karajo masih ado. Apo lah nan tajadi jo anak-anak mudo kini yo?” Mak Pono bantuak mangecek jo dirinyo surang. Walau baitu, Angah Piyan nan duduak di sabalahnyo, mandanga jaleh apo nan dikatokan Mak Pono. “Patah salero mah, Mak. Di mukonyo lai ado nasi, cukuik jo sambanyo, tapi salero tu bana nan patah, baa ka makan,” baleh Angah. “Apo ko, Ngah? Pagi buto lah bacarito soal makan. Itu namonyo pusa-pusa ka lambuang. Itiak sajo nan baru lapeh dari kandang, indak makan nan dicarinyo dulu doh, tapi aia untuak mandi,” Tan Baro sato manyolang. “Indak ambo nan nio makan doh, Tan. Ambo cuma maagiah parumpamaan ka Mak Pono nan tadi tu baturo-turo surang,” baleh Angah baliak. “Apo masalahnyo?” Tanyo Tan Baro indak saba. “Kecek baliau ko, urang manganggur samakin banyak. Tiok hari anak-anak mudo sampai tabik salemo dek mancari karajo, tapi indak dapek-dapek. Samantaro di surek kaba ‘Singgalang' ko ado barita bahaso lowongan karajo masih ado, tapi indak taisi,” Angah maagiah panjalasan ka Tan Baro. “Indak patah salero namonyo tu doh, tapi tinggi salero. Lai tau Angah, bahaso urang awak ko kan cadiak-cadiak. Taimpik nak di ateh, takuruang nak dilua. Kalau inyo mancari karajo, nan diintainyo adolah jabatan direktur atau saindak-indaknyo nan satingkek manejer. Kok hanyo untuak sales, maa namuah. Pakaian necis, badasi pulo. Tapi bajalan kaki dari rumah ka rumah. Inyo nio pakai dasi, tapi naiak oto rancak, sudah tu ka lapangan sambia manunjuak-nunjuak luruih bantuak mandua kabun zaman Ulando,” kecek Tan Baro maagiah pandapeknyo. Agak tamanuang Mak Pono jo Angah Piyan mandanga pandapek konconyo tu. Kok dipikia-pikia, memang baitulah nan banyak tajadi. Anak mudo di nagari awak suko mamiliah karajo. Saleronyo tinggi. Inyo sabana gengsi bakarajo sabagai sales. Karano, dari iklan-iklan nan dibaco di surek kaba, nan banyak dicari tu adolah sales. Syaratnyo harus punyo kandaraan surang, dan harus pulo pakai SIM C. “Batua juo tu mah, Tan! Awak sarjana, tapi karajo manjadi sales,” Kari Garejoh lah sato pulo mangaluakan pandapek. “Mustinyo indak bantuak itu doh. Ibarat urang baretong tantu dimulai dari aso. Kalau ambo punyo prinsip, akan labiah tahormat manjadi sales daripado manjadi pangangguran nan ilia mudiak ndak bakatantuan. Pagi mintak pitih ka urang gaek pambali rokok atau pambali minyak honda untuak bapole,” Mak Pono mangecek baliak. “Itulah beda pikiran urang tuo jo anak bujang nan nilai gengsinyo labiah tinggi dari kapalo,” baleh Kari. “Yo, paturuik-an banalah salero tu! Makan gengsi tu sapueh-puehnyo!” Sorak Mak Pono nan kurang sapandapek jo pangana Kari tadi. “Mak, awak harus objektif. Di nagari demokrasi ko awak musti mahormati pabedaan pandapek. Ibarat makan tadi. Inyo nio ayam goreang, tapi nan ado cuma bada kariang, tantu indak tabik salero dibueknyo. Kacuali, inyo suko goreang sapek, tapi diagiah goreang ayam, pasti dilutoknyo tu mah,” Kari maagiah pabandiangan. Mak Pono anok. Urang-urang lain di lapau tu cuma tapana. Pandapek Angah Piyan nan mangatokan patah salero bisa ditarimo aka. Sabaliaknyo pandapek Tan Baro juo batua mangatokan anak-anak mudo pancari karajo tu banyak nan tinggi salero. Espe St.Soeleman No virus found in this outgoing message. Checked by AVG Free Edition. Version: 7.5.516 / Virus Database: 269.20.4/1275 - Release Date: 12/02/2008 15:20 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca dan dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur dan Lokasi anda pada setiap posting. - Hapus footer dan bagian yang tidak perlu, jika melakukan reply. - Email attachment, DILARANG!!! Tawarkan kepada yang berminat dan kirim melalui jalur pribadi. - Anggota yg posting email besar dari >200KB akan dibanned, sampai yg bersangkutan minta maaf & menyampaikan komitmen akan mengikuti peratiran yang berlaku. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahul -~----------~----~----~----~------~----~------~--~---
