Asalamualaikum Bundo jo Rang Lapau nan Basamo, Kok diuruik dukunnan mauuruik Pao Ayam Gadang ko iyo lah ambo alami sandiri sisuak. Kisah nyato, babakeh sampai kini.
Tadi malam, kabatulan sudah mamancak-mancak duo jam, kami bauruik- uruik jo Minyak Cimande. Katu kawan mauruik tangan kida ambo, taraso dinyo bangkak di tangah antaro siku jo pagalangan. Kalua lah carito asli, kenangan lamo, nan ambo cucua-papakan ka kawan-kawan sa heptah tadi malam. Katu ambo umua 10-11 tahun, pulang Sikolah Ibtidaiyah, hari kiro- kiro pukua limo liwat saketek. Hari reancak, musim kaladang. Pimatang kariang, parak panuah jo tanaman mudo. Matoari rancak, udaro barasiah. Gunuang Marapi jaleh barasiah, jaleh rimbo jo kapundannyo. Hatipun sanang manghayati lingkungan kampuang nan indah damai. Sasudah kalua dari labuah, masuak jalan ka pimatang manuju pulang ka rumah Amak, basobok jo kawan sapamainan gubalo kabau. Kabaunyo barasiah sudah mandi sore. Ambo tanyo kok buliah ambo maracak kabau ko. Cubolah, keceknyo. Kabau tu di parak dakek di bawah pimatang tu sabalah suok ambo maarah ka barat. Jadi, pungguang kabau tu satinggi lutuik dari pimatang tampek ambo bapijak. Indak paralu ambo mamanjek ka maracak kabau tu doh. Ambo latakkan buku di pimatang, diracaklah kabau tu ... Tibo di ateh pungguang kabau, kabau takajuik, mandongkek pangguanyo tinggi-tinggi sambia lari arah ka muko kaarah amatoari tabanan. Ambo tapulantiang ka langik tinggi, turun jatuah baliak ka bumi, tatilantang di tanah kareh, tangan kida tahimpik jo pinggang. Tadanga badaram, badabua, jo badariak. Ambo cubo duduak, dicaliak tangan ... "Oh, ptah, ptah!" ambo maarang. Iyo, patahlah tangan kida tu. Sambia manangih maengek-rengek, mangucap "ptah, ptah," sampai lah ambo di rumah. Uni ambo batanyo "aa go nan pteh, ptah ko haa," keceknyo. Ambo paragoan tangan, "ptah, ptah..." Bakatubuangan dansanak sabalah rumah gai mancaliak. Kecek kakak sabalah rumah, lakeh bawo ka Mak TanKudun. Ruponyo Mak TanKudun ko tukuang uruik urang patah-patah. Bajalan lah badan ka Dangau Mak TanKudun, batigo baradiak kakak, sambia maarang-arang menggendong tangan kasakikan. Tibo di Dangau mak Tan Kudun, ari lah agak barabuik sanjo, tapi masih agak tarang juo. Tampak di ambo Mak TanKudun, duduak maekak-ekak pakai kinsarauang di jandela dangannyo, mungkin manikmati sajo rayo manunggu mugarik ka tibo. Sudah ambo marang-arang ka baliau, ptah, ptgah, baliau turun ka halaman. Baliau cakau Ayang Gadang baliau, baliau ambiak minyak uruik, baliau uruiklah Pawo Ayam Gadang tu sarato jo baco-bacoan antah aa bisiak baco-bacoannyo. Masih takana-kana tadanga di ambo sampai kinibunyi karewok ayam gadang tu kasanangan kanai uruik. Nan ambo? Patap marungun-rungun kasakikan. Sudah tu, baliau lapehan ayam gadang tu, baliau tagak peloki kinsaruang. Liau kecekan ka ambo, "lah, lah den uruik pawo ayam! Kini pulang lah lai, indak baa lih duh." Pulang lah ambo arah kailia baliak marungun-rungun kasakitan. Tigo hari sudah tu, langan tangan batambah bangkak, sakiknyo ... Allahu Rabbi bukan kapalang. Ambo dibawo amak dikawani adiak pai ka Rmmah Inyiak Maria, Inyiak dari Nurhuda di Pasia kawan awak samo sikola. Sudah baliau caliak, liau kecekkan baa mangko indak dibawo langsuang kamari? Sudah tu baliau paharek duduak baliau, baliau uruiklah tangan ambo tu. Pakiak malangkiang ka ateh langik, indak tabedo raso sakiknyo. Tapi, Inyiak Maria indak paduli, taruih baliau uruik. Mancaliak ambo mamakiak kalusuak anyak, adiak ambo Rivai 4 tahun labiah ketek, lansuang malantuangi pungguang Inyiak Maria tu. Inyiak Maria indak paduli, walaupun Rivai pun mamakiak-makiak pulo, antah nan maa nan kareh jo pakiak ambo. Pakiak-mamakiak baranti sasuah Inyiak Maria baranti mauuruik dan mangecekan, "Alah!," mukasuiknyo "alah salasai", sambia galak manih. Sabulan kamudian barulah elok. Iyo mangkuih jo uruik Inyiak Maria. Sampai kini takana-kana di ambo Inyiak Maria, baralah ka sakiknyo badan baliau kanai lantuang pungguang si Rivai. Mudah-mudhanan baliau aman damai di tempek Paristirahatannyo di Alam Baqa... Baitu juo Mak Tan Kudun pun aman damailah andaknyo Karano kahadiran "spesialis" Tukang Uruik Pao Ayam tu ruponyo diparalukan juo dek masyarakat dalam interaksi suply and demnand... Baliau cuma manuruti ... PS. Kok banyak typo ambo dalam satiok postiang itu disababkan jari kalingkiang ambo nan kida agak lu ak, acok malepai indak sangajo ka keyboard, malepai huruf-huruf sakuliliang A di QWERT tu. Jadi samo- samo maklum lah awak. Tqarimo kasih. Salam, --Nyiak Sunguik -- Sjamsir Sjarif --- In [EMAIL PROTECTED], Hayatun Nismah Rumzy <[EMAIL PROTECTED]> wrote: > > Assalamu Alaikum W. W. > Kok pakaro dukun2 ... > Kalau ambo indak salah (IMHP) nan dimukasuik sanak2 dengan perdukunan koh yolah sihir atau kecek rang baratnyo Black Magic. Ado 2 pulo macamnyo nan elok2 sarupo mauruik ayam lalu mambayangkan mauruik urang nan patah keceknyo urang nan sadang dibayangkan diuruik tu tapakiak2 dek kasakitan. Lalu mancari barang hilang kok kahilangan ado pulo tu.Sudah tu manahan hujan kalau ka baralek. Mungkin banyak lai nan lain. > Sakian dulu nan takana dek ambo nan sadang dirantau jauah ko. > Wassalam > Hayatun Nismah Rumzy (69++) > > --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur & Lokasi anda pada setiap posting. - Hapus footer & bagian yg tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda pada Google Account di: https://www.google.com/accounts/NewAccount?hl=id Agar dapat melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
