Gurindam"PASAN MAMAK"XXXI Ka buah ranuang....bag2
Ratok Baringin Tuo (Tragedi Mei 98) Kalam rasonyp alam fana Awan manutuik matohari Dantang badantuang patuih tungga Cahayo kilek ba api-api Langik Allah raso karuntuah Bumi muhammad raso ka taban Batanyo sagalo nan tumbuah Kutukan apo iko garangan Angin limbubu putiang baliuang Labiah bak gampo tujuah hari Kacau balau sa isi kampuang Hiruak pikuak di nagari Asa banamo tanaman tinggi Gadang ketek nyo rabahkan Dek ulah urek Baringin Sati Luluah lantak rantiang jo dahan Rabah baringin bakabuang-kabuang Daun jo rantiang carai barai Samaso hiduik lambang rang kampuang Kini tak labiah sarok balai Dek ulah angin nan sadarok Disangko samulo palapeh palak Tasintak badan sadang lalok Di kaniang paluah tapacak Baringin gadang di tangah koto Rabah ka parak di tapi jalan Abih tanaman di landonyo Sakampuang urang ma idok an Tamanuang duduak rang paladang Di pandangi rantiang nan manimpo Alun salasai hamo bilalang Kini pianggang pulo nan tibo Sagadang nangko baringin nan rabah Parak sia indak ka leso Sadang dek batuang indak ta sanggah Kononlah batang jaguang mudo Jaguang patah kacanglah runduak Lado babungo lah rato pulo Alun salasai hutang pupuak Alun babuah lah langkeh sadonyo Rabah baringin di tangah koto Ado nan labiah kito rusuahkan Raso ka sasek urang di rimbo Lah hilang batang ka pidoman Lai bana dadok nan tinggi Sulik bataduah ka hujanan Daun jarang batang baduri Ndak dapek di arok ka sandaran Dulu samaso alun ruek Baringin di takuik di karamatkan Tupai jo musang takuik mamanjek Alang sarok nan ma unyikan Kini apo ka di sabuik Badan tagolek tapi parak Indak ciek juo nan takuik Caciang jo lundi sato ma injak Sajak lah rabah baringin tuo Ba umua labiah tigo puluah Batang nan gadang salamo ko Tanyato di dalam lah hancua luluah Tiok dahan di lariak kumbang Urek di makan anai-anai Pucuak labek daun nan rindang Indak doh labiah binalu sansai Kok di caliak samaso hiduik Tampek barabuik mancari makan Tiok rantiang aka bagayuik Urek manjala sapanjang jalan Tapi gapuak dek tidua kanyang Gadang batang dek banyak makan Aka panjang indak manupang Urek banyak indak manahan Tampek balinduang ka panehan Ka bataduah hujan kok tibo Sabanyak nan maraso kahilangan Nan gadang hati banyak pulo Hanyo saketek nan marusuah Baa ko lah kasudahannyo Bak biduak kahilangan pangayuah Lai koh sampai ka muaro Bendi rarak kodo lah patah Kusie pangganti kok buto pulo Tampan ka londoang masuak lurah Itu dek kito nan mambedo Baringin ndak dapek di arok lai Batang lah jadi sio-sio Antah ka jadi kayu api Ka tunggak rumah tapakai tido Ka tunggak indak nan luruih Ka papan banyak matonyo Di katam tak mungkin haluih Di arik banyak matonyo Tapi di caliak tunggua nan runtuah Lah panuah lumuik di ureknyo Ba bagai bagai cindawan nan tumbuah Lai koh tagantikan baringin tuo ?. Mei Kalabu, 0206 1998 Y.Jambak -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet~ * Isi email, menjadi tanggung jawab pengirim email. =========================================================== UNTUK DIPERHATIKAN, yang melanggar akan dimoderasi: * DILARANG: 1. Email besar dari 200KB; 2. Email attachment, tawarkan & kirim melalui jalur pribadi; 3. Email One Liner. * Anggota WAJIB mematuhi peraturan (lihat di http://goo.gl/MScz7) serta mengirimkan biodata! * Tulis Nama, Umur & Lokasi disetiap posting * Hapus footer & seluruh bagian tdk perlu dlm melakukan reply * Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/ --- Anda menerima pesan ini karena Anda berlangganan grup "RantauNet" dari Google Grup. Untuk berhenti berlangganan dan berhenti menerima email dari grup ini, kirim email ke [email protected]. Untuk opsi lainnya, kunjungi https://groups.google.com/d/optout.
