Gurindam "PASAN MAMAK" XXX Ka Buah Ranuang........bag.1 (Mamilieh CALEG)
Kamanakan mamak nan kamek Kamari marilah mandakek Ado sabuah nasihaik pendek Simak an bana lambek-lambek Dalam wakatu nan lah ampie dakek Kalau ndak salah di bulan ampek Tanggal sambilan Indonesia baralek Pamiliahan Umum nan sarangkek Pesta demokrasi bahaso nan tapek Ajang bebas bapandapek Dari daerah sampai ka pusek Mancari wakie nan ka di angkek Kalau di pikie di ingek-ingek Kadang mamak galak-galak ketek Mambaco laku jo tabiyek Parangai babarapo caleg Bapasang gambar baderek-derek Pakai lem pakai parakek Dima sajo nan paralu lakek Nan tasuruak nan ta salek Babagai foto galak mangamek Semboyan nyo padek-padek Visi dan misi nan tasurek Sabana kanai sabana tapek Satiok perkumpulan nyo ajak rapek Didanga carito bunyi kecek Janji ba ruok ba lenggek-lenggek Nan runciang nyo papek-papek Nan randah ka nyo patingkek Nan jatuah ka nyo angkek Nan lamah ka nyo pakuek Nan sakik ka nyo ubek Nyo kumpuakan nan gaek-gaek Nyo himbau urang sa komplek Sopir oto jo tukang ojek Dari ulama sampai panjaek Nyo ajak balagu jo bajogek Basamo panyanyi nan kamek-kamek Babaju cabiak basirawa robek Nan bagaya vulgar ba baun sex Ndak piduli banyak nan ngenek Nan manonton amak jo etek Masa bodoh ado ranggaek Sadonyalah colak colek Malonjak ma lompek-lompek Bantuak urang di pantak pinyangek Mato nyalang ma resek-resek kalua parangai nan brengsek Sadonyo perai tanpa ticket Nyo bagikan gocap jo cepek Sakadar pa isi dompet Sarato kaos bamerek-merek Dulu antah kamanyo lorek Ndak tau apo nan nyo pa buek Basalam jo awak haram kok sasek Apo lai ka mangecek ngecek Kadang di undang pai baralek Nyo datang jo sedan bakilek Tapi basirawa singkek Kalua somboang jo bondek Muncuang cipeh bahaso kasek Banyak manyumpah jo ma upek Nan hidangan kurang kamek Kuah gulainyo kurang pakek Gang kumuah jalan becek Tenda lusuah rumah ketek Cimeeh bunyi gledek Ndak ado bateh jo ambek Kinilah bantuak urang sasek Kamari ma ambua kamari malompek Kadang-kadang lah bantuak koncek Bantuak itiek nampak tabek Lah bantuak lintah jo acek Kamari hinggok kamari lakek Satiok batang nan nyo panjek Mabuak ma idu jo manjilek Ka suok galak ka kida mangamek Jo sia sajo nyo mandakek Dek ma arok an suaro ciek Sakadar panambah-nambah barek Bukan iri bukan do ebek Bukan pulo nak ma ejek Tapii..di baliek nan tasurek Jaleh bana nan tasirek Bak pituah urang gaek Kalau lah salah dari niek Baa bana ma aluihan kecek Tabayang juo kaki ula mamanjek Suaro takumpua kurisi lah dapek Lah jadi urang nan bapangkek Suaro nan kareh lah muloi tanek Nan dulu kancang baransua sandek Indak di sakik lakek ubek Indak di barih makan pahek Indak di takuak nan ta karek Sio-sio tukang ba buek Karajo salasai rumah ruek Mode rancak potongan serek Rasuak jadi lantai manjungkek Dek pondasinyo kurang kuek Tanago abih nan timbua cacek Nan ado latieh jo panek Dek salah uruik salah urek Bak kayu lungga pangabek Baitu laku tukang pikek Jarami sabantuak jarek Ikan kalang takah limbek Kurang awas kanai sangek Untuak itu mamak mangecek Pilieh lah nan paliang tapek Kok nyampang kamanakan sasek Limo tahun kito ma upek Kok tapilieh bijo ba ulek Kok lai bana tumbuah ba urek Panek ma mupuak jo ma ubek Usah di harok babuah labek Kok babuah indak ka kamek Kok indak bana ka raso pacek Lah jaleh asam jo kalek Paliang ka jadi rujak uleg Kok mamilieh harus selek' Hati tarang mato melek Bialah lambek bagulambek Asa lai pilihan salamaek Piliah sipatu dapek tangkelek Ambiek buah dapek incek Berarti kito nan lah celek Kok salah juo mamilieh CALEG Y.Jambak. -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet~ * Isi email, menjadi tanggung jawab pengirim email. =========================================================== UNTUK DIPERHATIKAN, yang melanggar akan dimoderasi: * DILARANG: 1. Email besar dari 200KB; 2. Email attachment, tawarkan & kirim melalui jalur pribadi; 3. Email One Liner. * Anggota WAJIB mematuhi peraturan (lihat di http://goo.gl/MScz7) serta mengirimkan biodata! * Tulis Nama, Umur & Lokasi disetiap posting * Hapus footer & seluruh bagian tdk perlu dlm melakukan reply * Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/ --- Anda menerima pesan ini karena Anda berlangganan grup "RantauNet" dari Google Grup. Untuk berhenti berlangganan dan berhenti menerima email dari grup ini, kirim email ke [email protected]. Untuk opsi lainnya, kunjungi https://groups.google.com/d/optout.
