Ciloteh baru Wisran Hadi di padang ekspres. Salam Is St Marajo 39+ www.cimbuak.net Kampuang nan jauah dimato dakek dijari
SABAI MAMBAGI-BAGIAN SIDI DIGITAL Minggu, 20 April 2008 Ampun baribu kali ampun, wahai pambaco nan budiman, nan kini antah sadang di mano mambaco curito iko. Curito tantang Sabai Nan Aluih. Bukan sumbarang curito. Bukan curito saduran, bukan pulo curito asli. Tapi nan jaleh ikolah kenyataan nan diarangan dek urang jenius nan banamo Sabai Nan Aluih tu. Adopun nan manjadi buah kabanaran dek Sabai Nan Aluih nan sakarang kini nangko adolah baa caro mailak an saluruah anak gadih di nagarinyo dikarajoan dek laki-laki iduang balang. Banyak anak gadih nagarinyo nan bakarajo manjadi tukang uruik, tukang pangkeh rambuik, karajo di salon. Kabanyak an dari mereka tu pulang tanah malam. Anak-anak gadih nan pulang malam kolah nan acok diintaian dek laki-laki salero buayo tu. Banyak di antaro anak gadih tu nan dikaroyok, dikarajoan di tapi jalan. Banyak anak gadih tu mangadu ka si Sabai. Apo usaho nan bisa dibuek sahinggo mereka tu bisa mailak dari buayo-buayo simpang jalan tu. Sabai tantu sajo paniang mamikiekan baa caro manolong anak-anak gadih tu. Kutiko Sabai manonton tipi saminggu nan lapeh, kutiko itu pulo timbua pikirannyo ak maniru apo nan alah dikarajoan urang di Jawa. Ado ciek kadai tukang uruik, saluruah padusi nan manjadi tukang uruik tu diwajiban maagiah sidi mereka surang-surang jo kuro-kuro. Bakunci. Bagembok. Kunci kuro-kuro tu nyo pacik dek nan punyo kadai. Sidi tu mukasuiknyo sirawa dalam. Sidi adolah bacaan dari huruf CD, kapendek an dari celana dalam. Sidi tu baru bisa dibukak bilo kuro-kuronyo lah dibukak jo kuncinyo. Ide nan bantuak tu sangat katuju dek Sabai. Lalu, saluruah anak gadih di kampuangnyo nyo suruah manuka sidi nan lamo jo sidi mode baru. Sidi mode baru tu adolah sidi bakuro-kuro. Namun samantang pun baitu, tanyato banyak juo anak-anak gadih tu nan dikarajoan dek laki-laki gata. "Baa mangko ado juo paja-paja tu nan mangadu ka aciak bahaso inyo dikarajoan urang. Kan sidinyo alah baagiah kuro-kuro bagai?" tanyo Mangkutak. "Antahlah Mang. Paniang Ai jadinyo. Lah diagiah kuro-kuro sidi anak-anak gadih tu, tapi dapek juo dibukak dek laki-laki iduang balang tu," kaluah Sabai. "Jaan-jaan anak-anak gadih tu nan maagiahan kunci kuro-kuro sidinyo ka laki-laki tu," kato Mangkutak. "Kok roman tu, iyo indak dapek aka Ai lai tudoh," jawek Sabai. Saminggu sasudah mangecek saroman tu jo Mangkutak, tibo-tibo Sabai dapek ilham. Indak sakadar kuro-kuro jo kuncinyo nan dibuek dek Sabai lai, tapi inyo buek sidi nan labiah canggih. Sidi super baru. Sidi pakai kunci elektronik. Kunci tu pakai nomor PIN saroman nomor PIN urang maambiak pitih di ATM. Kutiko sidi digital tu dibagian ka anak-anak gadih, abih dek galak paja-paja tu. Ado nan dapek sidi banomor PIN 4711. Ado nan dapek sidi banomor PIN 69. Ado nan dapek 86. Ado nan dapek nomor PIN tujuah angko, 1234567. Macam-macam. Sasudah sidi dibagi-bagian, lai duo bulan lamonyo Sabai tanang. Indak ado pangaduan. Tapi masuak bulan ka tigo mulai ado nan mangadu. Ado nan mangaduan, nomor PIN nyo sasek sahinggo sidinyo indak dapek dibukak. Ado nan mangaduan nomor PINnyo tatuka jo nomor kawan. Tiok ditakan nomor PINnyo, nan tangga sawara kawan. Ado pulo nan labiah gawat. Dek karano indak takana nomor PIN nyo, sidinyo indak bisa dibukak, tapaso paja-paja tu kajamban dalam sarawa. Sabai galak-galak rusuah mamikiekan nasib anak gadih nagarinyo tu. "Mang, baa aka kolai. Lah Ai agiah sidi digital, pakai nomor PIN rahasia tiok surang-surang inyo, tapi banyak nan mangaluah," kato Sabai mangadu ka Mangkutak. "Gagap tehnologi namonyo tu ciak," jawek Mangkutak. "Ka baa juo canggihnyo aciak buek sidi anak-anak gadih tu, kalau mereka tu indak disiapkan manarimo teknologi modern ikolah jadinyo. PIN lupo, tapaso kajamban dalam sarawa. PIN sasek takan, nan tangga sarawa dalam kawan," kato Mangkutak galak sengeang. "Jadi baa nan rancak lai Mang?" tanyo Sabai. "Soal sidi-sidian, indak paralu diagiah kuro-kuro bana. Indak paralu dibuek kunci digital pakai nomor PIN bagai," jawek Mangkutak. "Jadi apo tu nan paralu dek anak-anak gadih tu?" tanyo Sabai. "Aja anak-anak gadih jo agamo. Kalau sadonyo lah yakin manjalanan agamo, pasti gadih-gadih tu mati-matian mampartahankan kehormatan dirinyo dari sagalo urang nan baniak mambuek jahek. Alah bana aciak agiah sidi digital, atau sidi pakai remot kontrol bana, jiko gadih-gadih tu bana nan bakandak sidi nyo dibukak urang, apo ka dayo aciak," jawek Mangkutak. (WH) --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tulis Nama, Umur & Lokasi anda pada setiap posting. - Hapus footer & bagian tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
