Sanak dipalanta Ciloteh WH di Padang Ekpres minggu sahubungan jo bebeem Salam Is St Marajo 39+ www.cimbuak.net Kampuang nan jauah dimato dakek dijari
CUMA SEO BENDI SAJO NAN KATURUN NYO CIAK Minggu, 01 Juni 2008 Sajak bebeem naiak, lah banyak pulo urang-urang padusi gapuak nan mintak sidakah, sampai ka kampuang-kampuang. Antah iyo dek karano bebeem naiak inyo jadi miskin antah indak, indak jaleh dek si Sabai. Kutiko didatangi duo padusi gapuak-gapuak mintak sidakah, Sabai indak nio maagiah sidakah baitu sajo. Labiah gapuak urang tu pado si Sabai lai. Antahlah kalau sidakah tu dijadian ka pokok galeh. Modal usaho. Kok manggaleh sayua lah, kok manggaleh goreng pisanglah. Sabai namuah maagiah panciang tapi bukan lauak. Padusi nan baduo tu gadang bana hatinyo dapek bantuan saroman tu. Tigo hari sasudah tu datang pulo tigo urang padusi. Inyo mintak pokok galeh pulo. Ampek hari sasudah tu, datang pulo ampek urang padusi, mambao anak-anaknyo. Mereka mintak pitih pulo untuk ka pokok galeh. Sajak itu lah banyak se urang datang ke rumah Sabai. Tujuannyo cuma mintak pitih untuak ka pokok galeh. Sampai lah bokek pulo uncang si Sabai dek banyak bana pokok galeh nan nyo lapeh. Samakin Sabai mangecek indak ado pitih, samakin banyak pulo urang nan datang. Sampai tarabo Sabai dibueknyo. Kasudahannyo nyo kunci pintu, indak namuah inyo lai manarimo urang nan datang mintak pokok galeh atau mintak sidakah. Sampai-sampai, nyo pasang papan pangumuman di dakek janjang. Nyo tulih gadang-gadang, pokok galeh abih. Kutiko Mangkutak datang manamui Sabai, Sabai malapehkan perasaannyo ka Mangkutak. "Ibo lai hati Ai, berang lai pulo. Indak ka diagiah, nyo kecek an inyo urang miskin. Kok diagiah, inyo datang bahonda bagai. Pakai dukuah, pakai jam tangan. Miskin caro kama tu?" kato Sabai. "Itulah ciak. Salamo ko awak bangga, bahaso urang Minang ko bisa mancari iduik, mandiri. Pantang mamintak-mintak. Indak ado nan miskin. Tanyato apo nan awak banggakan tu hanyo karabang sajo nyo," jawek Mangkutak. "Jadi baa nan rancak lai. Urang tu samakin banyak nan datang. Nyo sangko Ai dermawan bana. Mustinyo urang-urang tu pai ka rumah urang kayo. Kan banyak urang Minang ko nan kayo-kayo," kato Sabai pulo. "Iyo banyak nan kayo. Tapi kayonyo di rantau. Untuk bantuan urang miskin, sarik pitih kalua nyo. Tapi untuk mamanangkan calon bupati, walikota, gubernur, balumbo-lumbo inyo maagiahan pitih untuk kampanye," kato Mangkutak. "Baa mangko baitu Mang. Ai jadi heran juo caro saroman tu," kato Sabai. "Mambantu urang miskin indak ado mauntuangkan ka urang nan baragiah doh. Tapi mambantu untuak kampanye, kok manang calon tu, pitih awak kan bisa babaliak," kato Mangkutak manjalehkan. "Kok sinis bana waang manilai urang Minang ko Mang," kato Sabai agak tasingguang. "Jadi baa caro den manilai lai ciak. Tolong tunjuakan? Iyo sarupo itu kini keadaannyo. Urang awak ko, indak malu lai mangecek an bahaso inyo miskin. Urang Minang nan kayo, indak pulo paduli lai jo urang Minang nan miskin. Kini urang Minang ko lah malapehan untuang surang-surang. Kok kayo, kayo surang," kato Mangkutak agak emosi. "Takana dek Ai, kan banyak organisasi urang Minang di rantau. Tapi baa mako indak bergerak mereka tu mengatasi kemiskinan?" tanyo Sabai. "Tadi lah den kecek an. Urang iduik banafsi-nafsi kini. Kok ado urang bansaik di Pikumbuah, urang Piaman indak namuah mambantu doh. Kecek urang Piaman, urusan kemiskinan di Pikumbuah itu kan urusan urang Pikumbuah. Baitu pulo urang miskin nan ado di Solok. Kecek urang Agam, urusan kemiskinan di Solok urusan urang Solok. Indak namuah urang dari nagari Batipuah, Lintau, Muaro Labuah maagiah bantuan," kato Mangkutak. "Manuruik mereka, inyo bapacik jo aturan adat," sambuang Mangkutak. "Aturan adat baa?" tanyo Sabai. "Tagak bakampuang manjago kampuang. Tagak banagari manjago nagari. Baitu kini nan balaku. Miskin urang di Pikumbuah, salasaianlah dek urang Pikumbuah. Miskin Mangkutak bantulah dek Sabai nan Aluih, dek karano lai badunsanak. Miskin Mangkutak indak mungkin dibantu dek Puti Galang Banyak atau dek Puti Kaco Batuang misalnyo," kato Mangkutak. "Kok lah samakin parah sajo hubungan kemasyarakatan awak ko Mang," kato Sabai mangaluah. "Itulah aciak. Aciak bapatatah patitih juo baru lai. Bapantun-pantun ka ilie ka mudiak. Patatah patitih tu indak paralu dalam keadaan sarupo iko kini doh ciak. Urang Minang ko kini indak hebat bagai doh lai," kato Mangkutak turun janjang. "Sudahlah Mang. Manuruik waang, awak sangajo dimiskinkan atau memang lah nasib awak tu bana jadi miskin?" tanyo Sabai. "Nan jaleh diden bebeem naiak, gulo naiak, seo angkot naiak, seo kapatabang naiak, cuma seo bendi sajo ka turun nyo," jawek Mangkutak dari tangah laman.(WH) --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
