Cieklai ciloteh Wisran Hadi di padang ekpres minggu takaik jo BBM Salam Is St Marajo 39+ www.cimbuak.net Kampuang nan jauah dimato dakek dijari
JAAN BATANYO BARA BANYAK USTAD KA URANG MURTAD Minggu, 01 Juni 2008 Sajak bebeem naiak kapatangko sampai kini si Atang marabo juo baru lai. Tiok duduak di lapau, ado atau indak ado urang nan kadilawannyo mangecek, inyo taruih maampok-ampok kaniangnyo nan sulah tu jo tapak tangan kida. Kadang-kadang inyo mancapak-capak surang saroman urang sadang mancakau baluik. Kadang-kadang manggeleng-geleng saroman pakiah geleang nan tiok hari duduk mintak sidakah di bawah janjang ampek puluah. Kutiko si Jila batamu jo si Atang di lapau Ajo Manih, inyo tapurangah. Sasudah inyo paratian suok kida, si Jila lambek-lambek duduak dakek si Atang. Baa mangko saroman tu bana si Atang kini. Damam paneh? Sakik utak? "Baa mangko waang ampok-ampok kaniang waang tu, Tang. Di pantak rangik kaniang sulah tu?" "Lah hampia saminggu bebeem den nantian turun. Tapi kalera tu indak juo namuah turun doh. Sakik bana hati den, alun surang juo apak-apak menteri nan hebat-hebat tu bapikie kan manurunan bebem. Pitih den lah abih mambali bensin." "Apo pasal waang tarabo?" "Waden baru mambali oto, bensin langsuang naiak. Saroman sapakaik sajo apak-apak di ateh tu maniayo waden anak baranak. Indak buliah baoto waden agaknyo doh. Indak buliah manginyam nan lamak waden dek apak-apak tu! Kok bajalan kaki den baliak, digalak urang den. Oto lah babali, tapi awak bajalan kaki juo baru lai. Jaan-jaan waden dianggap urang binguang, urang pakak, handia, ongok raya, bano!" rarau si Atang. "O, jadi lah mambali oto waang Tang? Salah waang surang, manga musti mambali oto nan pakai bensin," solo si Jila. "E, handia! Ma ado oto nan indak pakai bensin, pakai solar! Antah kok oto-oto mainan nan den bali. Oto-oto roman tu minyaknyo aie liua sajo bisa mah," garutu si Atang. "Tunggu dulu, mandan. Jaan mangecek saroman anjiang makan tulang, manggarutu taruih se. Urang baoto tu tando urang lah kayo. Naiak bana bebeem stek indak baa doh." "Urang baoto tando lah kayo? Oto den untuak angkot mah hantu! Untuak pancarian bareh sagantang-sagantang sahari untuak anak bini den! Kayo, kayo, kayo juo waang sabuik! Waden kok lai talakik jado walikota, jadi walikota waden komah. Tapi baalah. Ka mandaftar ka kapeu, wakie den sajo alun ado lai. Iko salahnyo kalau pareman dipadia mamarentah nagari ko! Indak takana dinyo lai urang nan ka hangek, di ma baro nan ka jadi abu dek dibaka taruih." "Kalau memang apak-apak tu bakeh pareman los baro, ma jaleh dinyo masalah-masalah bensin, solar, premium, yo kan? Tampuruang karambia dari Piaman nan kajeh dinyo tu nyeh!" solo si Jila. "Jadi, apo mukasuik apak-apak tu manaiak an harago bebeem? Indak ado caro lain lai? Daripado bebeem dinaiak an, kan labiah rancak biaya perjalanan dinas apak-apak tu dikurangi, gaji apak depeer tu dikupie saketek surang, pilkada jo pemilu diundur agak tigo taun lai. Supayo indak banyak bana pitih nan diparaluan apak-apak tu. Kini ko, untuak biaya kampanye pilkada jo pemilu se bara banyak tu? Dari ma datang pitih nyo tu? Kini nagari awak roman sawah indak bapamatang lai tampak diden. Rakyat ko dianggap sarok se. Nan pamarentah buliah lalu lalang se babuek sakandak hatinyo," kutubah si Atang samo surang. "Tanang sajo lah waang dulu Tang. Danga kecek den. Kalau nan tahu di lubuak nan ma banyak lauaknyo, tanyo ka urang pangaie. Jaan tanyo ka urang paambuih lasuang! Kalau nak tahu dimanih tabu, jaan tanyoan ka urang sakik lidah.""Mukasuik waang baa?" "Kalau waang nak tahu baa bana mangko bebeem ko dinaiak an, tanyo bana ka apak-apak tu langsuang. Manga surek kaba nan dituruik an. Jaan cuma mandanga kecek urang nan mangaku-ngaku tahu jo harago minyak." "Jadi?" "Jadi, kalau pareman nan mamutuih an bahaso bebeem naiak, itu pantas. Maa jaleh dinyo persoalan lain, permainan lain, salain kepeang, kepeang, kepeang. Nyo sangko iduik ko salasai dek kepeang se. Kalau nak tahu bara banyak ustad, jaan batanyo ka urang murtad!" "Jadi apo nan ka waden kecek an ka panumpang angkot den bahaso angkot waden tapaso tagak dek karano indak tabali dek den bebeem tu lai?" "Kecek an sajolah ka panumpang angkot waang tu, bahaso zaman awak ko kini zaman babaliak, zaman kambek, zaman ceng! Babaliak. Babaliak ka surau alah. Babaliak ka nagari alah. Kini babaliak ka padati lai. Mempertahankan nilai-nilai luhur nenek moyang. Nan penting rakyat ko harus bangkit. Harus bangkit!" "Bangkit? Bangkit? Bangkit nan kabara juo lai ko Jila! Bangkit tu babaliak ka padati? Waang lai baraja sejarah nasional indak? Kebangkitan nasional kecek waag, ha! Dek talampau bangkit ko awak mako naiak bebeem mah!" "Sudahlah. Waang lah stres pulo komah Tang," bisiak si Jila galak sengeang.* --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
