http://www.hariansinggalang.co.id Senin, 02 Juni 2008
'Apakah Orang Masih Beradat?' Judul barita surek kaba 'Singga-lang' Minggu
tu sabana maundang pandapek urang banyak. Saindak-indaknyo, tando tanyo di
balakang judul, bisa dijadikan bahan kajian basamo-samo.
"Apo iyo lai masih baradaik awak di nagari ko kini?" Tan Baro mancubo
batanyo-tanyo surang sambia mamandang jauah-jauah ka lua lapau. Dalam kapalo
anak mudo tu bagalau pangalaman-pangalaman nan pernah inyo caliak jo mato
surang. Sudah tu ado pulo paman-dangan-pamandangan di televisi atau
barita-barita surek kaba bahaso pagaulan anak-anak kini lah kabablasan,
kecek urang kini.
Atau dalam istilah awaknyo, lah talampau bebas. Laki-laki jo padusi biaso se
babimbiang tangan atau bapaluak-paluak di tangah rami. Indak sakadar itu, di
objek-objek wisata, lah manjadi pamandangan pulo anak gadih jo anak bujang
baadu cotok, sarupo induak buruang maagiah makan anaknyo.
"Baa kok jauah bana pandangan, Tan? Masalah be-be-em juo nan dipikiaan? Alah
tu mah, ndak usah dipikia bana lai. Tarimo se lah apo nan tajadi! Mamakiak
ka langik nan balapih tu, harago be-be-em indak ka turun gai tu doh," kecek
Angah Piyan nan dari tadi mamparatikan kawannyo tu.
"Indak itu doh, Ngah. Bacolah surek kaba Minggu ko dek Angah. Ado judulnyo
nan memang sangajo maundang awak untuak badebat dibuekn-yo," jawek Tan Baro
sambia mampacaliak-an surek kaba nan tadi dibaconyo.
"Ha....ha...., kini ko adaik indak jadi paratian bana lai doh. Nan manjadi
padoman kini ko adolah pitih. Kan ado pantun Uncu Labai salamo ko, 'dulu
rabab nan batangkai, kini lagundi nan babungo. Daulu adaik nan dipakai, kini
ko pitih nan paguno'. Buktinyo kan lah samo-samo wak caliak, lah basuluah
matoari, lah bagalanggang mato rang banyak. Anak-anak mudo kini banyak indak
tau lai jo adaik Minangkabau. Inyo labiah banyak mamakai adaik nan inyo
yakini surang-surang. Karano itu, saolah-olah biaso bapaluak-paluak di dalam
angkutan kota. Urang gaek di sabalahnyo, dianggap speker, anak ketek di muko
juo dianggap boneka. Inyo saolah-olah surang se di ateh angkot tu. Baitu juo
di objek-objek wisata, ambo raso labiah parah lai. Anak-anak tu indak
sakadar bapaluak, tapi ado nan cari-carian kutu. Indak hanyo kutu pado abuak
di kapalo, malah, satiok nan barabuak dianggapnyo pakai kutu. Alun cukuik?
Ado pulo nan maidu-idu, main uruik-uruik dan sataruihnyo. Rabab se lah nan
manyampaikan lai, Tan," Agak pan-jang leba Angah mangaluakan pandapeknyo.
"Batua! Malah, ambo pernah mancaliak di lapangan Imam Bonjol, siang hari
badariak, ado pasangan nan baadu cotok, bantuak induak buruang maagiah makan
anaknyo," giliran Kari Garejoh basuaro.
"Alah, Kari, sok barasiah lo gai. Saumpamo hari ko umua Kari tujuah baleh
taun, ambo raso labiah dari itu mah," salo Tacin.
"Kan itulah beda dulu jo kini. Dulu awak-awak ko lai bapole juo. Cuma, indak
saparah kini. Dulu, saumpamo awak sadang bajalan baduo indak namuah bapacik
tangan," kecek Kari baliak.
"Tapi, di nan kalam kan lai juo, ndak?" Potong Udin Kuriak.
"Itu bialah jadi urusan awak surang-surang jo Tuhan. Nan jadi masalah, kini
ko kan batarang-tarangan, di muko urang rami. Awak nan lah tuo-tuo ko
dianggap tunggua se. Iko adolah ciri-ciri banyak di antaro anak-anak awak
nan alun paham jo adaik. Apolai kok ditanyo ka inyo apo itu adaik istiadaik,
adaik nan sabana adaik, adaik nan diadaik-an. Baitu juo masalah
pidato-pidato adaik. Pokoknyo banyak saluak-baluaknyo dan iko adolah
tangguang jawek basamo, baa maagiah pamahaman ka anak-kamanakan kito.
Karano, kalau tajadi apo-apo di diri anak-anak tu, nan ditanyo urang adolah
kamanakan siapo tu," sabana lanca kaji tu dek Kari. Maklum, Kari memang
pernah diaja baa adaik jo budaya Minang sajak daulu dek mamaknyo di
kampuang. Cuma sajo, tampang Kari indak nampak bantuak surang niniak mamak.
Espe St.Soeleman
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
