Pagi puku 0430 hari partamo di Lembah Gau Lou Wenxian ambo tajago dari lalok nan cukuik dalam. Masih mangana-ngana dima awak lalok, dibuka mato masih galok, dicubo malengoh suok kida nan nampak terpal jo tumpukan barang bawaan. Ambo baru manyadari kalau sadang dalam Tenda di Lambah Wenxian bukan Lambah Arau. Sayuik2 tadanga bunyi riak aie sungai naga putiah nan balago antaro inyo samo inyo. Sambi mangucap syukur di agiah kesehatan ambo duduk an badan sambia maiduik an lampu tenda ndak pai ka raie untuk bongka muetan jo siap2 mandi pagi. Pocket islam nan ambo setting di PDA mangatoan baso sumbayang subuh di Wenxian masuak puku 0410. Diambiak senter pai lah mbo ka rai sakali guih mancari sumber aie nan samalam alah di petakan dek sado anggota tim. Udaro nan ekstrim dingin mamaso ambo pakai sweater, sa galuak- sa galuak aie diambiak pancuci tangan jo muko utk bauduak mambuek tulang takajuik jo jangguik manggerek. Niaik tadi ndak mandi tapaso dibatalkan, niak tadi ka buang aie tapaso pulo babata kan…. Tasuruik dek karano dingin. Taragak wak jo nyanyian buruang murai, pakiak siamang jo suitan binatang hutan iyo indak buliah kandak doh. Akhirnya aktifitas pribadi pagi ko 70% bata dikarajo kan dek karano gagal menaklukkan dingin nan marasuak ka tulang.
Pukua 0800 pagi katiko dingin mulai diusia dek matoari, alah jaleh nampak muko gunuang Gau Lou di suok kida muko balakang, alah pulo tadanga suaro kandaraan lalu lalang, saluruh anggota tim apel pagi sambia konsolidasi mengenai sagalo hal nan dirapek an samalam. Badasarkan hasil rapek samalam bahaso akitifitas pagi ko adolah visite sadoalahan pasien nan bajumlah 67 urang untuk memetakan masalah utamo pasien per pasien, mambuka pelayanan counseling penyakit masyarakat sakitar, dan mangarajoan operasi kalau memang adoh kasus operasi. Jarak 4 km rs local nan banamo rumah sakit pertama Desa Wenxian (namo rumah sakik di siko memang baagiah namo angko) dari tenda tampek tingga kami tampuah dalam 30 menit. Kurang dari puku 0900 kami alah sampai di rs tasabuik disaratoi pulo dek tim kesehatan pendukung yang dikirim dari Lanzhou yaitu Prof Lew dkk. Langsuang tim dipacah sasuai jo hasi rapek samalam. Visite dilakukan dek 2 group badah dan non badah, pelayanan counseling panyakik masyarakat dibagi 4 group, dan 1 tim langsuang ka kamar operasi mampasiapkan kamar operasi. Kasado group bakarajo sacaro simultan. Ambo bagabuang jo group visite kalompok badah. Mulailah bakuliliang ciek ciek pasien ditanyo masalahnyo dan kemudian diinventaris untuk dianalisis masalahnyo dan kemudian diberikan terapinyo. Sagalo tulih manulih disiko pakai tulisan cino nan indak banyak urang mangarati tamasuak juo tim pendukuang nan dari Lanzhou. Nan agak unik adoh 2 urang pasien patah nan alah salasai dioperasi, namun kaduo pasien ko salain diverband kakinyo pun bakabaek jo galang bawang putiah. Ehe ….iyo agak bakaruik kaniang ambo dek nyo, tatagun subanta. Namun barangkali katatagunan mbo nampak e di mangarati dek tim nan dari Lanzhou. Sahinggo salah surang ahli urologi dari Lanzhou manjalehan baso di tenda ko seluruh pasien dirawat oleh dokter dari 2 latar belaakang. Mereka disiko manyabuik dokter barat (Western medical doctor) dan dokter tradisional (Traditional Chinese doctor). Dokter tradisional ko ruponyo lulusan akademi satingkek D3. Mereka ko diakui oleh pemerintah dan memiliki organisasi. Dokter tradisional china ko legal, dan mereka mampunyai organisasi dan mengantongi ijazah kompetensi yang diakui oleh pemerintah baitu ahli urologi ko manambahkan. Namun dalam prakteknyo dokter tradisional chino ko hanyo untuk panyakik kronis atau panyakik kanker nan pengobatannyo oleh dokter barat pun masih dalam tahap penelitian. Dokter tradisional indak buliah maubek i panyakik akut sarupo patah tulang kanai gampo, namun buliah malakukan pengobatan tambahan apobila si pasien maminta dokter tradisional ko ikuik. Dari 67 pasien nan dirawat di ruang rawat tenda adoh 2 pasien nan juo dirawat oleh dokter tradisional ko. Dari siko dapek diliek baso pemerintah chino masih maagih ruang bagi dokter traditional untuk mengembangkan ilimunyo. Walaupun tetap adoh gesekan antara 2 latar belakang ko. Salasai visite mangulilingi pasien diputuih an indak adoh operasi hari iko…. Group badah ko dipacah duo sabagian ka kamar operasi sebagian lai mambuka pelayanan counseling panyakik badah di masyarakat. Ambo langsuang bagabuang jo kelompok counseling dan mambukak pelayananan counseling penyakik tulang. Sakiro puku 1130 alah tagak pulo tenda pelayanan counseling panyakik orthopaedi, ambo pun maajak salah surang dokter tradisional chino (lupo namonyo) dan surang interpreter (Pak Zhang, guru bahasa inggris murid SMP, pendidikannyo S2 bahasa inggris lulusan Beijing, tahun muko malanjuik an PhDnyo kato nyo). Papan pengumuman alah tapasang dalam huruf chino, mbo caliak alah antri sakitar 40 sd 50 urang. Sakileh mbo caliak urang ko nampak e kaum miskin nan tingga di kaki atau di pinggang gunung. Pado umumnyo mereka hidup dari bertani. Sabagai urang lua mbo pasilakan ka dotor tradisional chino ko mambuka pelayanan sekali guih mbo ingin mancaliak pulo apo nan nyo karajo annyo untuk pasien nan bajubel ko. Mbo minta pak Zhang maimbau ciek2 pasien nan ka barubek, dek karano budaya antri masih kurang iyo basitegang urek liia pulo Pak Zhang ko jo masyarakat. Tapi situasi bisa dikendali an dan masyarakaik bisa antri. Doto tradisional ko tanyato babaso basi pulo, tamu se lah melayani kecek nyo, nan mbo bia barajo dari tuan dari Indonesia. Aha… iyo maangguk-angguk kapalo se ambo dek inyo. Pasien partamo mulai mbo layani, komunikasi jo pasien lewat pak Zhang, pareso badan di tenda tu sambia duduak atau tagak indak adoh tampek lalok. Ciek2 tatakok panyakik pasien, kemudian mbo diskusi an jo doto tradisional ko baa nan ka elok manuruik awak basamo. Namun antah karano doto ko manyuruak an ilimu antah inyo manyerap ilimu dari awak iyo keputusan therapy dari doto Indonesia se lah kecek nyo… Untuk kasus nan maraguan lgsg mbo cek foto roentgen, CT scan, bahkan MRI… Disiko dalam wakatu 1 atau 2 jam order pencitraan bisa diperoleh (iyo hebat rs desa ko). Pasien kaduo mbo lanjuiak an pareso, katigo sampai pasien terakhir no 53 salasai sakitar puku 1700. Dari 53 pasien ko kebanyakan kasus adolah sakik tulang belakang, adoh 4 pasien patah tulang lamo nan indak dapek pengobatan nan layak nan ambo rencana an operasi. Kebetulan 4 kasus ko ditangani oleh pengobatan tradisional chino. Mbo minta tanggapan doto tradisional ko, inyo jawek nan di mukasuik bukan doto tradisional tapi pengobatan liar nan adoh di masyarakat desa tapancia. O baitu kato mbo sambia maangguk. Samo wak mah, kalau nan indak bahasil kecek an se urang indak basikola mangarajoan….. Pukua 1700 ko dinyatoan pelayanan hari partamo salasai, rombongan manuju resto muslim nan bajarak 1 km dari rs ka arah kaki gunung untuk persiapan makan malam puku 1800. Rombongan bajalan kaki manuju resto muslim tu sambia maota an kajadian siang tadi untuk mailangan panek. Di sapanjang jalan masyarakat malambai lambaian tangan dan maagih sambutan hangek jo ucapan bahaso chino nan ambo indak mangarati. Salasai makan malam kami baliak ka tenda untuk bersih2, mandi, shalat dan istrihat. Tampek mandi??? Dek karano tim local maliek kami kesulitan mandi bacampua jo penduduk satampek, diputuih an lah kami mandi di kamar mandi hotel nan ditinggakan karano fasilitas nyo rusak. Dari tenda hotel ko bajarak 3 km. Walaupun rusak namun aie hangek dihotel ko masih bafungsi. Dari pado indak, hotel ko kami pagunoan salanjuiknyo untuk mandi dan tampek shalat walau jaraknyo 3 km namun taraso dakek….. Pukua 2200 sasudah mangarajoan shalat maghrib dan Isya bajamaah (bagi nan muslim 75% anggota tim), seluruh anggota tim dipimpin dek pak Ben maadoan rapek yang intinyo mengevaluasi kegiatan hari pertamo dan merencanakan tindakan strategis yang akan dikarajoan bisuak. Bakucantak bakucantang lah usulan jo bantahan, diselingi jo galak jo cando, ditambah jo selingan seruputan kopi angek nan dibuek dek rang dapua tim. Keputusannyo bisuak akan diadokan operasi, visite ruangan, pelayanan counseling penyakik, dan penyuluhan kesehatan. Salasai rapek sebagian adoh nan langsuang lalok, adoh pulo nan betah jo main mahjong jo tim chino, adoh pulo bakalompok maota, dan sebagian adoh pulo nan asik telepon teleponan. Hari kaduo di Wenxian …… (basambuang) Maaf nan partamo lupo mangarek ikua nyo…. --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
