Assallamualikum pak Saaf, bundo Hifni, mak Datuak Endang, Sanak Jepe dan Mamak sarato sanak di palanta,
bari mauih sato pulo ambo saketek panukuak tambah diskusi 'gala' iko. dari berbagai sumber sasuai jo undang nan tuo "adat salingka nagari cupak salingka suku buek salingka kampuang" ---> tiok nagari punyo undang undang nagari adokalonyo babeda tiok nagari, sasuai jo kondisi nagari : nagari kurai=kota bkt, nagari babateh jo lauik tantunyo sangat babeda jo nagari didarek. Kerapatan Adat Nagari -KAN punyo 'otonom' mambuek undang undang nagari jo parangkat nagari/wali nagari, bundo kanduang, cadiak pandai, alim ulamo, anak mudo, dll, ----> buek salingka kampuang ;tiok kampuang/jorong dalam nagari buliah mambuek suatu kesepakatan sakampuang untuak manjago keharmonisan dalam masyarakat kampuang, biasonyo "buek" mangacu ka UUN undang undang nagari. "ulayat nagari : musajik, lapangan/medan nan bapaneh, balai nagari, pakan/pasa, tabek nagari, tali banda nagari, rimbo nagari, parik nagari, tanah nagari/tanah rajo" ulayat salingka kampuang --> "ulayat kaum/suku saparuik : tanah sako tinggi/tanah turiah an, pandam pakuburan, dll" pangulu diminangkabau 'ditinggikan sarantiang, didulukan salangkah' sangat menarik karano gala adat nan di sandang mamak mamak pangulu/ datuak dari sapasukuan/kaum biasonyo adolah "Kapalo Warih" dari kaum/ kaum tersebut kabayakan dinagari-nagari di minangkabau bagala datuak, dikelompokkan ka pangulu andiko/mamak kapalo suku sakaum/saparuik. suku babuah paruik, tiok paruik ba kapalo suku (datuak/pangulu andiko) sasuai jo "tiok lasuang baayam gadang" karano dalam nagari ado banyak suku (nagari baampek suku--biasonyo labiah dari ampeksuku) dari pangulu paruik ko ado dipiliah pangulu kapalo suku untuak duduak dalam Kerapatan Adat Nagari, sasuai jo "adat salingka nagari" biasonyo pangulu pucuak nan duduak disiko, (dt sati, dt marajo, dt mangiang, dt kayo, dll) atau secara turun temurun galanyo tatap sasuai jo nagari masiang masiang, baitu pulo jo 'gala' nan dipakai anak nagari apakah ketek banamo gadang bagala atau ketek banamo lah bakeluarga indak diagiah gala tantunyo tiok nagari babeda, sasuai jo adat nan lah biaso dipakai dalam suatu nagari. sasuai jo kamajuan zaman, mako tantunyo banyak pulo pangulu nan basikola tinggi, untuak mambimbiang anak kamanakan. gala pangulu di sangkuik an ka anak atau cucu bilo ado mamak lah maningga buliah dari mamak kakamanakan, buliah malongkang mamak, dari inyiak kacucu nan saparuik. atau bilo mamak lah 'ka bukak baju' mako gala datuak bakisa ka kamankan sadang gala barubah manjadi angku atau dilipek dulu, manunggu kamanakan "nan patuik" manarimo gala pusako biasonyo "sapakat kaum sasuku" barulah gala di sangkuik an, jiko alek nagari lah siap baru diadokan alek nagari batagak gala pusako, ado nagari nan mamotong kabau saikua kabau surang datuak, ado lo nagari baiyua basamo mamotong saikua kabau untuak babarapo urang pangulu..babeda tiok nagari. di nagari panampuang kalau seorang pemuda ka barumah tanggo, biasonyo dimintakan gala ka kaumnyo dulu, buliah juo dimintakan gala ka bako nyo, atau dipakai gala nan lah ado di badan dirinyo /datuak, atau gala nan dibari induak bako, salaku anak pisang baliau lah dibari gala wakatu malewakan datuak tipak dibakonyo, biasonyo bagala sutan nan tasuo gala ko disasuaikan jo kurenah nan kamanyandang gala urang surau --> katik, imam, sidi, bila, pakiah, tuangku, kali/kadhi (nyiak kali tuo) cadiak pandai/profesi --> muncak, mantari, sutan, bagindo, pono, marah, lenggang,kayo, menan, bandaro,dll, pangulu/pemimpin --> datuak, pangka tuo, yang dipituan, nyiak angku, tuan gadang, tuo, rajo, dll adokalonyo bilo nagari/kaum lah sapakat gala Tuangku dapek pulo di pakai langsuang ka rang mudo kabarumah tanggo jiko syarat nyo lah tapanuhi yaitu mangarati Qur'an jo hadis, mantiak, maani, biasonyo lulusan sikola tarbiyah canduang/pesantren lansuang dibari gala Tuangku, kadang dibari gala pakiah dulu baru sidang nagari mambari gala Tuangku, contoh : Tuangku Rajo Endah, Tuangku Rajo Mangkuto, Tuangku Ampek Rasua, etc basaratuoan jo Angku Imam jo Angku Kadhi/ Kali kampuang/sidang musajik. gala iko paralu untuak saling memuliakan, mintuo, sumando, rang kampuang, salain gala kaum untuak anggota kaum dan gala kehormatan untuak 'minantu' dari lua, gala dari bako, gala dari nagari/KAN, gala ko dapek pulo diberikan Istana Basa Pagaruyuang (gala Sangsako Adat/Gelar kehormatan) gala Sangsako adat antaro lain untuak Dr.Susilo Bambang Yudhoyono Yang Dipertuan Maharaja Pamuncak Sari Alam merupakan gelar Sangsako Adat dari KAN Tanjung Alam lalu dilewakan Istano Basa Pagaruyuang. Sri Sultan Hamengkubowono X Yang Dipertuan Maharajo Alam Sati (Rajo/ Gubernur DIY) DYMM Tuanku Ja'afar ibnu Tuanku Abdurrahman Perkasa Alam Johan Berdaulat (Yang Dipertuan Agong Malaysia/Yang Dipertuan Besar Negeri Sembilan) sedangkan Gala Yusril Ihza Mahendra Datuak Rajo Palinduang adalah gala pusako dari kaum suku Malayu payokumbuah, siabu, bangkinang. Taufik Kiemas Datuak Basa Batuah adolah gala sako adat dari kaumnya Nagari Sabu, batipuah, tanah datar sakitu dulu, mohon maaf kalau ado nan salah, mari kito basamo maluruihkan. kito minta pulo pancerahan dari Lembaga Kerapatan Adat Alam Minangkabau Sumatera Barat- LKAAM , Yth Mamak YZ Dt. Pahlawan Gagah Panungkek Gajah Tongga Koto Piliang, Pucuak Adat Nagari Silungkang - Padang Sibusuak sarato Yth.Mamak Datuak Endang dari Lembaga Adat dan Kebudayaan Minangkabau - LAKM dijabodetabek wassallam, Ir.AZ Dt Rajo Alam (37+/dibaliakpapan) Sikumbang, nagari Panampuang,Agam =bakuduang== > Terakhir Pak Syaaf mengenai malewakan Gala ko (Topik awak) samantaro dek > ambo nan diambiak “Makan Bajamba lumayan” he..he > Mudah2an kok lai tacapai cita2 ambo maambiak gala S2 dulu > > > Kecek kawan ambo di kampuang nan bijak “Kok maagiah Gala (Datuak) bisa > sajo/gampang, nan PATUIK diagiah Gala tu nan pantiang” > > Wass-Jepe > ===bapapek=== --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
