Assalaamu'alaikum wa rahmatullahi wa barakaatuhu
**
*MAK ITAM – ARI KALAM – KURETA JATUAH – REALISTIS*
* *
Katiko awak mamintak ka Tuhan Allah nan ka dimintak tantu nan elok-elok sajo
andakno. Mamintak bana awak sungguah-sungguah, tajauahlah sagalo bala jo
kasulitan. Tajauah handakno sagalo nan buruak jo nan indak elok. Kok dapek,
tahinda banalah awak dari sagalo musibah. Baitu kok dapek pintak jo pinto.
Baitu untaian doa nan awak panjek-an ka hadirat Allah Subhanahu wa ta'ala.
Sabab musibah iyo biaso datang juo. Kajadian nan awak pandang buruak, dek
manyakik-an, dek marusak, dek marugian tatap juo didatangan dek Tuhan Allah.
Apo sajolah kajadi bantuakno. Baiak baketek-ketek, ataupun bagadang-gadang.
Baiak nan manimpo ciek-ciek urang ataupun nan marangguik korban urang sa
kampuang basa. Samo nampak juo di awak tajadino.
**
Musibah ado nan tasabab dek di kalalaian manusia. Katiko oto balantak,
kirono basuo panyabab, oto nan ciek kancang amek, nan ciek lai rem no indak
elok. Katiko kuretapi balantak, basuo pulo. Kiro no relno lah lungga. Kirono
pintu ampang-ampang indak bajago. Atau katiko kapa karam, kirono muatanno
sarek amek. Indak makananno lai nan dibaono. Mako tajadilah musibah.
Ado juo nan baakibaik dek karano ulah tangan jahia manusia tapi dalam jangko
wakatu lamo. Ditarukoi rimbo di bukik basa. Ditabangi kayu gadang ketek.
Abih rato kasadono. Tibo musim paujan. Indak taambek-ambek lai ayia lalu.
Mako handam karamlah kasadono dibao ayia jo galodo.
Namun ado pulo musibah nan dikaranoan samato-mato karano garak Allah. Antah
kolah dek Tuhan Allah bangih, antah kolah dek Tuhan Allah nak mauji, antah
kolah dek Tuhan Allah manunjuak-an ka Maha Kuasoan No. Allah sajo nan tahu.
Tajadilah misalno gampo rayo. Tajadi gunuang malatuih. Tajadi patuih gadang
manyemba, tajadi angin putiang baliung. Indak taidok-an di awak nan
mukhaluak ko doh. Abih rapun tandeh dalam maso sakijok mato.
Kalau bancano alam ka tajadi indak batando-tando bana bagai doh. Kalau
patuih ka manembak, kalau gampo ka mahoyak, atau angin putiang baliuang ka
manyasau, acok kali tajadi, indak bapambaritahuan bagai do. Dan alah samo
panah awak sasian. Gampo mahoyak sarato maruntuahan nagari, handam karam,
abih runtuah jo manaro-manaro musajik. Patuih gadang nan mambaka ustano basa
Paga Ruyuang. Atau angin nan malayok-an atok rumah. Tajadi sajo pabilo no ka
tajadi, sasuai jo kahandak Allah.
**
Dialiah carito saketek. Ka mak Itam. Sadang sanang bana hati awak mananti
kadatangan mak Itam nan pulang kampuang. Nan insya Allah mudah-mudahan alah
sampai di Muaro Kalaban. Mak Itam nan alah baumua. Paliang indak alah ampia
satangah abaik umuano mak Itam nan kini di bao pulang tu. Dulu, sampai pareh
awal tahun 70an, mak Itam ko sabana panyumarak nagari awak. Cuik-an panjang
kureta Solok, nan disauik kureta Padang. Asokno manggabun ka udaro.
Adourang nan mangecek-an asok kuretapi ko arun baunno. Banyak carito
suko jo
duko nan dirajuik dek kabaradoan mak Itam maso itu. Carito katiko mak
Itam dari
Pikumbuah mandanguih-danguih mandaki pandakian Dama. Carito katiko mak Itam
manalen di ateh jambatan di Anai. Katiko mak Itam masuak lubang kalam di
Muaro Kalaban. Jo cuit panjang. Jo asok itam bagabun-gabun. Jo bunyi nan
malasuih-lasuih.
Musibah? Panah pulo tacataik ciek jo duo. Tumah, tabongka baliak carito duka
di jaman Japang. Katiko kureta jatuah di Padang Panjang. Katiko kureta
jatuah di Anai. Bagulimpangan korban. Bahkan masih ado saksi iduik nan dapek
kito danga pakabaranno. Baa kolah mangko ka tajadi musibah maso itu?
Sabotase? Mungkin. Walau timbua lo tanyo labiah jauah, sia nan manyabotase?
Apo tujuan sabotase ka kuretapi tu?
Agak kalam ari untuak manyiasekno kini. Sakalam ari katiko tajadi garhana
matohari. Katiko urang tuo-tuo (nenek-nenek awak) manjadian ari kalam tu ka
tando wakatu. 'Katiko ari kalam tun, aden alah pandai main ka laman du.'
Tapi pabilo no du? Antahlah jano nenek awak.
Baa bana panyabab musibah kureta jatuah tu? Nan paliang-paliang dapek awak
karajoan adolah manakok-nakok. Bahaso katiko itu, katiko panjajahan Japang
iduik sabana sarik. Sainggo urang jadi agak lalai, dek karano kasarik-an
iduik. Urang gajian nan biaso mamareso kondisi rel kureta indak samparono
lai mangarajoan tugehno. Baitu juo nan biaso mamareso bauik jambatan kureta.
Indak sarupo nan taralah lai awakno bakarajo. Sadangkan satiok rel jo
jambatan tu paralu pamaresoan rutin. Sabab sakian puluah ton barek mak Itam
nan ka ditaananno. Nan ka manimpono.
**
Iko paralu bana awak kaji. Kini alah sakitar anam tahunan rel kuretapi nan
lalu ka Anai taruih ka Solok ka Sawah Lunto tu indak ditampuah mak Itam.
Kureta paangkuik baro dari Sawah Lunto nan tarakhir kali, kalau ambo indak
salah etong, lalu di akhir taun 2002. Lai koh ado di pareso bana rel jo
bauik-bauik jambatan tu baliak ? Mudah-mudahan alah sabana dipareso nan
batugeh sarupo itu. Apo lai, di awal tahun 2007 kapatang Lambah Anai
tamasuak nan maarangan dioyak gampo. Ado batu gadang sagadang oto tatonggok
di ateh rel sakitar limo puluah meter sajo dari ayia mancua.
**
Tamasuak, jambatan dakek Muaro Kalaban. Mudah-mudahan alah pulo dipareso.
Saandaino mak Itam nan pulang kampuang tu ka dioperasian (untuak nostalgia)
antaro Sawah Lunto jo Muaro Kalaban itu nantino. Mudah-mudahan mak Itam lai
sanggup malintehi jalan nan saketek tu. Walau awak indak mungkin ka
maarok-an mak Itam nan ciek ko ka talok dino bakarajo kareh sarupo kudo
baban baliak. Pai maadang pandakian Anai taruih ka Padang. Jaleh ndak
kamungkin. Sabab awakno alah tuo. Alah paringgo. Kok iyo bana lai talok dino
malasuih-lasuih masuak lubang kalam dakek Sawah Lunto tu nanti,
mudah-mudahan taubek juo taragak awak nan panah marasoan manompang kuretapi
di nagari awak saisuak.
**
--~--~---------~--~----~------------~-------~--~----~
===============================================================
UNTUK DIPERHATIKAN, melanggar akan dimoderasi/dibanned:
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi di setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
- DILARANG: 1. Email attachment, tawarkan disini & kirim melalui jalur pribadi;
2. Posting email besar dari 200KB; 3. One Liner
===============================================================
Berhenti, kirim email kosong ke: [email protected]
Daftarkan email anda yg terdaftar disini pada Google Account di:
https://www.google.com/accounts/NewAccount?hl=id
Untuk melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
