BK (13) : Adok Kudo Mada jo baru, itu nan cocok ka dilakek-kan ka kaniang bakaruik si Buyuang Koboy, alah dikicekkan dek urang rami co angin lalu sajo dianggapnyo. Kini malenggang pulo anyo liwaik Janjang Gudang pakai salempang bugih co urang gadang ka pai ka galanggang. Tarompa kulik basapuah, rancak di labuah, abih subuah lusuah. Sadang tagang badan bajalan, disorak dek Upiak Leba Upiak Leba Oii Tuan, ka Pacu Kudo lah urang agak kini ko, co kusia Tuan tampak, topi men nan lain nyo... Buyuang Koboy Jan mancari lawan jo lai Piak, pagi-pagi alah mangaleh kato pulo Kau, kok Uaden bali bekoh lai ka tajua di Kau bekoh Upiak Leba Kok Ambo jua bana, bara talok di Tuan mambali..., he he , jadi kapai kama lah Tuan nantun.... Buyuang Koboy Piak..., Uaden kasato lo ciek lu, ka manjadi Katua Pasa isuaktu, kini kan sia se bisa maju kamuko Upiak Leba Oi Tuan...'baere-ere' Tuan komah, ukua lah bayang-bayang dulu, apuih lah dulu salemo, piciak pao Tuan tu lai taraso padiah jo, kalau lai indak, agiah lah.. Buyuang Koboy Baa co itu kicek Kau Piak.. Upiak Leba Urang nan kasato tu, alah banyak nan dibueknyo, ibaraik namo alah tasureknyo dima-dima, ibaraik suaro alah tadanga kama-kama, ibariak roman alah tapampanng disakuliliang. Atau kalau indak co nan tu, pitihnyo balemak peak, indak sadang barang ka kalua doh, bara men namuah. Iko Tuan namo, antahlah sia nan tantu jo Tuan. Pitih, apolah pulo, saputaran utang barajuik.. Buyuang Koboy Kau iyo noh yo, mancucauak kato, mandabiah, tapi agiah bana lah di Kau, mak pueh taraso. Itulah lah Kau indak tahu, aka sangeneang, sapangka rambuik, baujuang kuku. Upiak Leba Baa mukasuik Tuan, agiah tahu lah Ambo, ajakanlah buliah nak mangarati loh Ambo. Buyuang Koboy Lai tabayang di Kau Piak, urang nan kasato puluahan urang, indak salah kini alah ampek puluh ampek urang, nan kadirabuik cieknyo, baraja baetong kalaih satu SD, lai ka mungkin du, pasti nan 43 tapancik. Sia nan ciek tu, bara lah kasariknyo di Kau tuh Upiak Leba Jadi baa taruih no Tuan.. Buyuang Koboy.. Iyo alun tapikia jo di Kau yoh, ko Uaden agiah tahu jan kicekan pulo ka nan lain ndak, didabiah pulo Uaden di lawan bekoh. Nan dari 44 itu nan kuek duo tigo di Kau nyo tuh, nan lain bekoh manggesek-gesek nyo ka nan kuek tu, kok manang nan di geseknyo tuh kan sato manangnyo lo di Kau tuh ha.. Upiak Leba Kalau Tuan, ka ma Tuan manggesek Buyuang Koboy Kalau Uaden, manggesek kasado nan kuaik.. Upiak Leba Yo ganjia Tuan yo, mukasuik Tuan bekoh sia se nan manang bekoh, Tuan sato loh di bulakang, kicek urang co rangik sarok main di jamba tu mah. A se nan dimakan urang awak sato lo maraso-i . Sangaik lah Tuan go mah, ndak kasato Ambo kamamiliah Tuan ko doh, bia lah Ambo sorakkan, pado banyak urang takicuah Buyuang Koboy Oii Alai..., jan cubo-cubo indak lamak makan garam bekoh.... DYEK Jakarta, 240309
--~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
