Malang ndak dapek ditulak, mujua ndak dapek diraiah, kok malang sakijok mato, mujua bahari-hari.
Assalamualaikum WrWb. Partamo-tamo, ambo mohon maaf, maaf nan gadang kadunsanak, disalingka dunia maya nangko, gadang indak basabuikan gala, ketek indak bapanggia namo, maaf tatuju ka nan banyak, dek talambek marespon duka, duka dan do’a kadiri ambo, sarato kaluarga kaum kami, bapak jo mandeh dan baradiak kakak. Alhamdulillah lah salasai alek kami, alek gadang nan ndak dikehendaki, malapeh adiak kasayangan kami, samantangpun baitu, kuaso ALLAH kito rila-i, yang akan selalu kito lewati, antah dima antah sadang manga, semoga kito selalu mandapek ridho-NYA, pai dalam jalan dan lingunganNYA. Tarimokasih banyak….. Do’a nan dibarikan ka adiak ambo, nan banamo Ahmad Dimitri Spd-i, bagala Katik Mancayo, barumua masuak 29 tahun, nan telah berpulang ke Rahmatullah pado hari Minggu tanggal 19 April 2009 siang, dan dikebumikan dipemakan keluarga pado hari Senin sabalun wakatu Zuhur, sesuai jo do’a dunsanak, semoga dilapangkan kuburannyo, ditarimo amal ibadahnyo, dan mandapek tampek nan terbaik disisi Nan Kuaso, sesuai jo amal perbuatannyo. Dan alhamdulillah, kami nan tingga, taba menghadapinyo. Sakali lai, tarimokasih banyak bagi kawan sanak sudaro, ucapan duka nan disampaikan lansuang, baitu juo nan memalui telepon, SMS, Email/Milis dan FB nan bagitu banyak, semoga kito selalu dalam lindunganNYA. Sebagai tambahan info tentang adiak ambo, dek banyak nan batanyo, dek ado juo nan kenal jo inyo di dunia Maya dan indak sempat menghadiri, Almarhum adolah Alumni MAN Muara Labuh tamatan tahun 200 dan STAIN Batusangka tamat tahun 200 dan alhamdulillah baru diangkek manjadi PNS diawal tahun 2009 ko sebagai guru agamo di SMAN 6 Solok Selatan di Sungai lambai, Sangir, sebelummya juga sebagai Guru Honorer di MTsN dan SMK Tehnik Pakan Salasa. Almarhum berstatus masih bujangan nan sadang dalam tahap penjajakan/paretongan untuk berumah tangga. Disampiang itu, almarhum juo salah satu P3NTR, tampek malapor bagi pasangan nan akan menikah dilingkungan Kecamatan Pauh Duo, guru mangaji disurau kaum kami, khotib jumatan dan juo aktif diberbagai bidang kepemudaan. Almarhum adolah anak ka 4 dan laki-laki bungsu dikeluarga kami dari 6 urang baradiak kakak, seperti biaso dikampuang, walaupun alhah jadi PNS, almarhum tidak meninggalkan kegiatan TANI yg sudah turun temurun dikeluarga, hari liburnyo di isi dengan mambantu urang tuo kasawah, baparak, dan bataranak Ikan. Hari minggu pagi tu, setelah manyuci baju (biasonyo adiak2nyo nan mancucian) dan mambantu urang gaek dirumah, almarhum mintak izin ka sawah untuak mamindahkan anak ikan dari sawah nan bapadi alah mulai gadang, indak ado firasat, seperti biaso sajo bakegiatan sabalun siang. Bak pembukaan diateh tadi, malang sakijok mato, mujua bahari-hari, dekhari alah siang dipaneh nan kancang, basiap-siap kapulang, maambiak siso ikan di palo ayia dalam sawah, badan nan sadang marunduak mancakau ikan, indak ado angin, apolai hujan, tibo-tibo rabah batang karambia nan alah lapuak bakek ditembak patuih, mahampok pungguang nan sadang marunduak, alhamdulillah, almarhum menghadap nan KUASO dengan khusnul khatimah, tasungkua jo tangan talipek sumbayang, manghadap ka arah matoari tabanam, jo senyum manis khasnyo inyo pai, wakatu partamo dibarasian mukonyo nan baluluak. Kok dicaliak kapado batang karambia nan sawah kami di tapi palak karambai tersebut, raso-raso indak kamungkin, bajarak labiah kurang dari 20 meter, condongnyo kama rabahnyo kama, tapi itulah takdir ALLAH, janjian nan KUASO, nan indak bisa kito katahui, dan ikolah musibah yang paliang dahsat yang akan kito lewati di dunia nangko, yaitu Kematian. Juo tarimokasih untuak sanak handai taulan, sakampuang sa nagari, nan mungkin ribuan manjanguak dan maantan almarhum dari dirumah duka sampai ka peristirahatan terakhir. Rila jo maaf dari kami, kok ado salah-salah dalam bergaul, tasintuang kanaiak, talendo katurun, baik nan basingajo, atapun nan indak, maklumlah juo anak mudo nan jolong gadang, darah alun satampuak pinang, umua nan alun sataun jaguang, dekinyo juo mansia, nan hiduk sosial bamasyarakaik. Do’a dari kami, semoga kito selalu mendapat lindungan dari ALLAH yang maha kuasa, jo lapang dadao kami malapeh, jo rila kami ditinggakan, semoga sarugo dapek di almarhum.. Wassalam Nofend St. Mudo, 32+, Cikarang – Jawa Barat Kamanakan Dt. Bando Labiah kaum Tigo Lareh Surau Gadang Pauh Duo nan Batigo, Solok Selatan. http://www.facebook.com/note.php?created&&suggest¬e_id=74735194460&id= --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
