Senin, 25 May 2009 Indak sarupo biasonyo, hari tu Kudun sabana sarius mambaco barita surek kaba 'Singgalang'. Salamo ko, kalau pun inyo mambaliak-baliak surek kaba, indak labiah dari mambaco judulnyo sajo. Tapi sakali tu, sabana dibaco abih-abih.
"Alah mah Dun! Lamo bana mah. Urang nio mambaco pulo ko ha," kato Angah Piyan. "Tunggu sabanta!" Hanyo itu jawek Kudun. "Apo pulo nan dibaco tu? Biasonyo nan paralu dek Kudun kan hanyo judul-judulnyo sajo. Samo jo makan salak, Kudun paliang suko kulik arinyo sajo," baleh Angah. "Iko barita rancak, paralu dibaco sampai salasai," kato Kudun sambia taruih mambaco. Karano memang nampak agak sarius, Angah mampabiakan sajo konconyo mambaco koran tu sampai salasai. Tapi, baru sajo Kudun salasai, lansuang ditanyo. "Aneh taraso dek ambo mancaliak Kudun mambaco barita sampai salasai. Salamo ko kan hanyo mambaco judul-judulnyo sarato mancaliak gambar sajo," giliran Udin Kuriak nan batanyo. "Antahlah Din! Agak taraso juo dek ambo barita tadi. Salamo ko awak eboh dek ulah banyaknyo anak-anak jalanan sarato urang mintak sidakah. Tadi ambo baco baritanyo, tanyato anak-anak jalanan jo tukang mintak sidakah tu ulah harato pusako dijua mamak. Dek ambo bisa masuak aka. Kalau pusako lah dijua atau digadaikan mamak, tantu indak ado lai tanah nan ka diolah untuak parak atau sawah. Sabaliaknyo, anak-kamanakan nio juo iduik. Kok dicari karajo, banyak syaraiknyo. Dek paruik lapa, dicarilah jalan nan capek, yaitu mintak sidakah. Iko labiah rancak, daripado manjadi urang maliang atau marampok," Kudun maagiah panjalasan ka Udin. Sakalipun manjawek tanyo Udin, tapi lah sarapek-papeknyo urang di lapau tu mandanga. "Lai tadanga dek Mamak tu? Jan dijua juo pusako tu!" Tibo-tibo Kari Garejoh basorak sambia mancaliak ka arah Mak Pono nan dari tadi gilo maisok rokok se karajonyo. "Lai!" Hanyo itu jawek Mak Pono. "Masuak talingo suok, kalua di talingo kida," runguik Tacin. "Apo Cin? Sampai kini ambo alun ado manjua pusako lai, dan indak pulo punyo bakat manjua atau manggadai doh," baleh Mak Pono. "Tanah nan di mudiak tu baa?" Potong Tacin. "Itu indak ambo doh, tapi mamak ambo nan manjuanyo," jawek Mak Pono. "Untuang Mak Pono indak jadi anak jalanan," semba Kudun. "Ampia!" Baleh Mak Pono pulo. Baitulah ota di lapau Uwo Pulin di pagi tu. Bamulo dari barita surek kaba 'Singgalang' nan bajudul 'Anjal, Dampak Pusaka yang Dijual'. "Ampia baa?" Tanyo Tan Baro. "Kini nasib ambo kan indak bara beda jo anak jalanan. Karajo tatap indak ado di siko. Kok pulang ka kampuang, nan ka diolah indak pulo ado lai. Kok ado bana agak saketek, itu untuak kamanakan nan di kampuang pulo. Karano itu, bialah ambo pakai se prinsip karatau madang di ulu, babuah babungo balun. Marantau Pono daulu, di kampuang baharato balun," jawek Mak Pono sambia galak sengeang. (Espe St.Soeleman) http://www.hariansinggalang.co.id/index.php?mod=detail_berita.php&id=1718 --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
