KISAH SI MONEN (7)
"SI PI'I URANG GILO BALADIANG" By : Jepe Patang hari dilapangan bola nan talatak di balakang Pakan Rabaa, Kampuang Tangah si Monen sadang manyuduik duduak di pinggia lapangan manonton anak-anak kampuang main bola.Tibo-tibo main bola ko manjadi bakalebuik indak bakatantuan dek ulah si Pi'i masuak lapangan mararah mangaja anak-anak kampuang nan sadang bajadi maarak bola. Si Pi'i bantuak setan dikaja hantu (bayangin aja) lari katangah lapangan sambia ladiang ditangannyo diacuang-acuangkannyo ka urang nan dikajanyo. Dek ulah si Pi'i ko tapaso urang dilapangan bola abih tabang hambua lari manyalamaikan diri , tamasuak si Monen lah lari mati katakuian dek sempat lo si Pi'i tibo-tibo ndak ado hujan ndak ado paneh dari tangah lapangan babaliak arah ka tapi lapangan tampek si Monen duduak manonton. Si Monen dek dikaja si Pi'i jo ladiang ditangan lari tunggang langgang ka Lapau Wan Kutar, indak dapek dikajanyo si Monen si Pi'i baliak balari mangaja urang nan di lapangan bola, lai juo urang nan taparogok dek inyo dikajanyo sambia maayun-ayun ladiang nan dipaciknyo ditangan suok. Tibo di lapau Wan Kutar si Monen lansuang taduduak sasak angok, samantaro dimuko dilapau tu Pak Rano Karno "nggak mirip" sadang duduak sambia maisok rokok. Pak RK : Ha..ado apo Monen ko abi tabang ambua urang ka Pakan Ko dari lapangan bola Monen : Si Pi,i Pak, bangkik lo gilonyo liak, indak tangguang-tangguang inyo rarah urang nan main bola jo ladiang, caliak dek Apak tu ha si Pi'i gilo baputa-puta sajo di tangah lapangan sambia maogoh urang jo ladiangnyo Pak RK : O yai..yai yo kamari bedo mah Monen kok di lawan si Pi'i nan gilo baladiang tu Monen : Makasuik Apak kamari bedo ko baa..?? Pak RK : Nyo baa dek waang Monen kok si Pi'.i ko di lawan, sasalah inyo tatap juo kito nan salah, sabatua-batua kito tatap juo kito nan salah, namonyo sajo urang gilo, baladiang lo lai. Jampang waang kanai catuak dek ladiang si Pi'i, kamanga waang, malapor ka polisi, ka mambana ka polisi Monen : He..he batua juo yo Pak, ndak ado gunonyo mah ambo malapor jo mambana ka polisi jampang dicatuak dek si Pi'i jo ladiang, ibaraiknyo indak ka basuo bagai pasal untuak maminjarokan si Pi'i ko dalam KUHP Pak RK : Lai tahu waang mah, nan si Pi'i kan yo kebal hukum Monen : Jadi urang-urang gadang di nagari ko ambo caliak banyak nan kebal hukum juo Pak, berarti lah samo lo jo si Pi'i tu..urang-urang mode iko. Pak RK : Sttt..jaan kareh-kareh lo waang sabuik bantuak itu, tadanga dek urang pakak iyo lo keceknyo beko, waang caliak sajo lah urang-urang gadang di nagari ko nan gilo baladiang, awak nan ketek-ketek ko ndak bisa manga-manga lai, paliang kito hanyo bisa mangecek "Bia lah, kuatinyo sajolah inyo juo nan ka badoso" Monen : Tuh caliak lah Pak si Pi'i mungkin dek lah litak malala urang duduaknyo ditangah lapang, nan anak-anak kampuang lah bubar main bola, bisa ndak Pak RK maamankan si Pi'i ko, Pak RK : Kok bantuak itu padialah den cubo "manjinakan" si Pi'i . molah kito kasinan tapi waang Monen dibalakang den sajo yo, jaan sato lo, bia waden sajo nan mambujuaknyo, nampaknyo si Pi'i lah latiah tu dek balari-lari malala jo maogoh urang jo ladiangnyo. Pak RK jo Si Monen baranjak dari lapau wan Kutar, pai katangah lapang bola, nan si Pi'i dek lah litak, lah lalok-lalok manungkuik ditangah lapang, nan ladiang ko masih inyo ganggam ditangannyo. Pak RK lah barado di tangah lapangan dakek si Pi'i nan sadang lalok-lalok manungkuik, Pak RK mancubo manyapo si Pi'i jo suaro nan lamah lambuik panuah jo getaran nan maibo basayang-sayang. Pak RK : Ananda Pi'i molah awak ka kadai yo, jaan lalok di tangah lapang ko malu awak dicaliak urang, tu liek lah lah rami urang mancaliak Pi'i lalok-lalok ditangah lapang sambia mambaok ladiang, kok lapa paruik Pi'i molah pai makan jo Apak ka kadai Wan Kutar, kok auih Pi'i bisa lo minum teh es manih disinan, kok taragak lo Pi'i maisok beko Apak balikan rokok kretek nan Pi'i suko Si Pi'i hanyo bisa mamandang Pak RK jo tatapan mato nan kosong, tibo-tibo marabak aia mato si Pi'i, antah apo nan mambueknyo sadiah. Pak RK inyo bia kan sajo si Pi'i ko tasadak-sadak manangih sambia tatap mambujuaknyo. Si Monen babisiak ka Pak RK Monen : Si Pi'i bangkik ulahnyo malala urang jo ladiang dek ado urang kampuang awak katiko manjalang anak-anak kampuang main bola manghino urang tuonyo, bamacam-macamlah nan dikecekan dek urang-urang nan "indak bautak" manghino urang tuo si Pi'i, lah jaleh kondisi si Pi'i samanjak ditingga mande jo bapaknyo taganggu pikirannyo di paulah juo. Pak RK : Ooo..bantuak itu, kadang-kadang ambo caliak yo banyak ndak beres juo urang kampuang, dikecekan si Pi'i indak beres labiah indak beres lo lai urang nan mampaulah si Pi'i ko, labiah indak bautak lo mah Monen urang nan mambuek si Pi'i bangkik kalakuannyo mararah mangaja-ngaja urang jo ladiang dari pado si Pi'i nan memang kurang beres "utaknyo" Monen : Itulah Pak RK, ndak abih pikia ambo jo urang-urang kampuang nan indak "bautak" ko, ado sajo ulahnyo tiok hari mampagarahkan si Pi'i . Pak RK : Nantilah ambo bicarokan jo Wali Nagari jo Panghulu jo Ninik Mamak kampuang awak, baa rancaknyo si Pi'i ko bia ndak acok juo mararah sambia mangaja-ngaja urang jo ladiang, baa ka baa si Pi'i tu urang kampuang anak kamanakan kito juo, nan paliang pantiang bana tantu kito-kito nan lai "bautak" ko sadar diri indak mampaulah si Pi'i tu juo, bialah kini Den ajaknyo ka lapau Wan Kutar, lah tanang inyo nampaknyo. Pak RK inyo datangi si Pi'i nan lah mulai duduak tatagun jo pandangan kosong, samantaro ladiang nan inyo pacik lah dilapehkannyo talatak disampiang nyo duduak, sambia duduak Pak RK disampiang si Pi'i mulai liak Pak RK mambujuak si Pi'i Pak RK : Apo nan mambuek Pi'i manangih, urang nan mampaulahkan Pi.i tu indak bautak tu do, beko apak berangkannyo, alah tu yo jaan Pi'i kaja juo ndak jo ladiang Pi'i : Iyo..iyo ndak bautak bana urang nan mampagarahkan Pi'i tu Pak, dihino-hinonyo mande jo apak Pi'i nan lah maningga tu Pak RK : Tu urang jaek mah Pi'i badoso gadang urang nan manghino urang gaek Pi'i, bia sajolah inyo nanti masuak narako dibaka api nan angek, dicucuak muluiknyo jo basi angek, diantak paruiknyo jo tombak angek, pokok sagalo basi-basi, pisau, ladiang, tombak nan angek-angek mambaro ditusuak kabadan dek malaikat di narako urang nan manghino urang gaek Pi'i tu, nan mande jo Bapak Pi'i lah didalam sarugo kini, Pi'i lai nio masuak sarugo beko basuo jo urang gaek Pi'i. Pi'i : Iyo..iyo..Pi'i....Pi'i ..nio masuak sarugo Pak, bisuak dari sarugo Pi'i tusuak jo basi angek urang nan manghino urang gaek Pi'i tu Pak RK : Kito tagak lai yo, malu awak dicaliak urang duduak ditangah lapang ko, molah kito kalapau Wan Kutar, makan lamak kito jo mangopi, sudah tu Apak balikan Pi'i rokok sabungkuih..baa cocok..Tos lah awak dulu Tossss..!!! lah baradu tapak tangan kanan Pak RK jo Si Pi'i, Pak RK dibimbiangnyo si Pi'i tagak sambia marangkuanyo bajalan ka lapau Wan Kutar di Pakan Rabaa, samantaro si Monen lah mangamankan ladiang si Pi'i, nan urang kampuang jo anak-anak main bola tagak dipinggia lapangan bakarumun hanyo bisa malihek sambia babisiak jo mangecek saliang manyalahkan "lah jaleh si Pi' i bantuak itu waang pagarahkan juo, bangkik rabonyo tu mah akibatnyo di kaja-kajanyo kito jo ladiang sadang main bola", "kok waden lo nan waang tuduah, si Anu ha nan mampaulah si Pi,i...oh yo paja tu antah apo lah kasamnyo ka si Pi'i kok suko bana mampaulah si Pi,i" nan kecek jo bisiak salah manyalahkan ko lah bagalau nampaknyo. Pak RK, Pi'i jo si Monen lah duduak di lapau Wan Kutar, dek latiah si Pi'i gilo mangaja urang jo ladiang diunjuak dek si Monen aia putuih sagaleh ka si Pi'i sakali dodek lansuang abih aia putiah nan sajuak ko dek si Pi'i, samantaro Pak RK mamasan nasi ramas sapiriang untuak si Pi'i tambah kopi 3 galeh. Si Pi'i nampaknyo yo litak bana paruiknyo sato tahidang nasi ramas sapiriang di muko mejanyo lansuang inyo abihkan, lah masuak kaduo lo tambuah si Pi'i baru taraso kanyang bana paruiknyo. Salasai makan masuak lo kopi angek sagaleh lah bajadi lo si Pi'i mairuiknyo dari tadah sambia maisok dalam-dalam rokok karetek nan dibalikan Pak RK sabungkuih. Pak RK : Pi'i kan lah kanyang, bia batambah lamak Pi'i mangopi jo maisok rokok kabalakang lapau Wan Kutar Pi'i duduak mangalai-ngalai, disinan ado palanta nan madok kasawah, barangin-rangin sajuak Pi'i kok duduak bisa juo lalok Pi'i disinan. Monen : Iyo kasinan lah awak duduak Da Pi'i..bia Monen angkekan kopi Da Pi'i kabalakang lapau Wan Kutar ko.. Si Pi'i patuah sajo diajak Pak RK jo si Monen pai duduak dibalai-balai (palanta) nan talatak dibalakang lapau Mak Kutar, satibo disinan nan si Pi'i dek lah kakanyangan tu badan lah panek lo nan kopi baru satangah galeh diminumnyo, rokok lah manjalang duo batang lo diisok , kantuak datang sakali apolai kanai angin sore nan sajuak barambuih katiko si Pi'i bagolek marabahkan badan lansuang sajo si Pi'i ndak sadar diri lai, tigo kali angguak malapeh angok di hiduang karuah tadanga sakali kalua dari muluik si Pi'i. Pak RK : Monen..Monen...tinggakan sajo si Pi'i disiko bia istirahatnyo dulu, kok bakaliaran di lapangan bola digaduah urang ndak bautak pulo liak, beko tajadi nan indak-indak, mararah lo si Pi'i jo ladiangnyo, waden ka lapangan bola lu bia den tatar anak-anak kampuang ko lu alah tu mampaulahkan si Pi'i juo . Monen : Iyo Pak RK tatar lah anak-anak jo pemuda kampuang awak ko, kalau paralu sia nan "indak bautak" acok mampagarahkan si Pi'i ko apak tampeleang sajo pangka talingonyo, lah bosan lo ambo maagiah tahu, kok ka lai masin muluik Pak RK, tapi ado tanyo ambo ka Pak RK ciek Pak RK : Apo tu Monen : Kok urang gilo baladiang di nagari awak ko nan kebal hukum dan indak bautak gilo KKN sajo bisa ndak Pak RK amankan bantuak Pak RK maamankan si Pi'i ko Pak RK :.......????? (ndak tajawek tanyo si Monen dek Pak RK...susah kali ya mengamankan urang gilo baladiang kebal hukum dan indak bautak gilo KKN sajo di Nagari ko...antah lah Yuanggggg) *** Pekanbaru, 17 Juni 2009 Catatan : Nama, tempat dan tempat kejadian cerita jika ada yang sama dengan para pembaca hanya suatu kebetulan belaka . The above message is for the intended recipient only and may contain confidential information and/or may be subject to legal privilege. If you are not the intended recipient, you are hereby notified that any dissemination, distribution, or copying of this message, or any attachment, is strictly prohibited. If it has reached you in error please inform us immediately by reply e-mail or telephone, reversing the charge if necessary. Please delete the message and the reply (if it contains the original message) thereafter. Thank you. --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
