Assalamu'alaikum Wr. Wb. Dunsanak Balerong Kasadonyo.
Menghadapi musibah bom Marriot dan Carlton ko, wajar kalau banyak diantaro kito nan tabao emosi. Urang nan ndak basalah jadi korban, apolai kalau diantaronyo ado sanak keluarga kito. Kito tahu, nan jadi korban akhirnyo bukan hanyo nan langsung kanai di tampek, keluarga mereka pun akan turuik marasokan dalam jangko panjang, karano rato-rato korban tantulah tulang pungguang dan tampek bagantuang di keluarga masing-masing. Ibaraik tampek bapijak nan lah taban, tampek bagantuang nan lah putuih. Dari korban tu, ado nan manjadi yatim, ado nan kahilangan anak, dan sabagainyo. Ambo pribadi pun tadi sampai talanyak gadang mandanga berita tu. Sampai-sampai ndak ado lai tanago untuak pai karajo tadi pagi. Untuang urang di kantua di siko paham dengan kondisi psikologis kito sebagai urang Indonesia nan menghadapi cobaan ko. Jadi dari pagipun ambo cuma di rumah manyimak berita demi berita tentang kejadian nan mambuek pilu ko. Ambo paham dan sangat wajar kalau ado dunsanak-dunsanak di palanta nan berang dan mangutuak peristiwa ko. Hanyo sajo paralu juo kito ingek, masalah ko adolah masalah nan sangat kompleks, nan indak bisa dipandang sebagai permasalahan linear nan gampang karano manyangkuik banyak aspek nan mungkin alun kito ketahui dan kito pahami secara pasti. Ibaraik banang kusuik nan alun kito ketahui baa caro ma urai nyo. Pihak mano nan basalah, bialah diurai dan diselidiki oleh pihak yang berwewenang, samo kito liek malah kredibilitas nyo dalam mengungkap masalah tu. Syukur-syukur bisa diketahui dengan capek dan tapek sahinggo bisa pulo di cegah supayo ndak tajadi lai dimaso datang. Karano itu pulo lah, barangkali labiah bijak kalau kito juo manahan diri dulu untuak mengeluarkan statement-statement nan ba sifat manuduah pihak-pihak lain ataupun mambuek suasana batambah karuah. Kalau nak mandiskusikannyo juo, rancak nan didiskusikan atau disumbangkan pikiran alternatif /solusi /ide nan mungkin bisa digunokan untuak mambantu. Hal itu akan labiah bermanfaat. Manuduah pihak lain tanpa alasan nan pasti, kito khawatir kok jadi bumerang beko ka badan diri. Sarupo komentar tantang kaitannyo ka Malaysia, ka Manchester United, atau pihak-pihak lain nan sabananyo masih manjadi tando tanyo gadang. Tapi apo pun itu, menghadapi cobaan ko, marilah kito sadonyo manjago agar suasana nan rumik ko ndak batambah kacau. Samo bersabar kito menghadapi cobaan. Samo manunggu kito pihak berwenang manyalasaikan tugasnyo. Karano bagaimanapun juo, walaupun mukasuik kito sabananyo elok, tapi kalau dilakukan atau disampaikan jo caro nan kurang tapek, bukan ndak mungkin balaku juo papatah rang gaek kito saisuak: Jan kan ka batanam baniah Batambah luluak malah nan jadi Jan kan ka batambah janiah Batambah karuah malah nan jadi Sakitu sajo dulu, talabiah takurang ambo mohon maaf. Wassalam Rita Desfitri L. Murai Kukuban --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
