HUT EMAS ITU
“TUNJANG NAN TATAPAK”
By :Jepe
Dua hari panuah ambo ikuik
menyaksikan gegap gempita dan meriahnyo acara ulang tahun ameh SMA 1 Landbouw
Bukik Tinggi, disampiang ikuik bapatisipasi mangisi acara malam gembira di
pangguang tabukak halaman sakolah nan punyo namo di ranah minangko
basamo-basomo alumninyo nan barasa dari Pekanbaru-Riau tantunyo ambo jo
keluarga (Istri dan duo urang anak) barekreasi diakhir pakan ko kota wisata
Bukik Tinggi.
Rasonyo kalau bajalan-jalan ka kota nan talatak diketinggian nan diapik jo duo
gunuang nan manjadi “land mark” ranah minang yaitu Gunuang Singgalang jo
Gunuang Marapi kurang langkok atau ado nan kurang kalau kito indak bawisata
kuliner manikmati masakan urang Kapau nan terkenal jo sitilah Nasi Kapau.
Nasi Kapau salah satu bantuak
kekayaan dari berbagai pusako kuliner di ranah minang, memang agak balain
saketek dari babarapo masakan nagari awak pado umumnyo. Masakan Kapau ko yo
padek bumbu, kayo raso dan memang “mengerikan” dari segi kandungan kolestrol.
Umumnyo sado alahe isi paruik jawi jo kabau dimasak tapi walau “mengerikan”
bagi urang nan lah baumua mudo talampau gaek alun apolagi lah gaek nan
bahati-hati co caro dan pola makanan nan
tinggi manganduang lamak (kolestrol) yang sakiro mambahayokan kesehatan. Tapi
sakuek-kuek imam bapantang jo masakan kapau nan bahan utamonyo sagalo isi
paruikjawi jo kabau ko kok lah “head to head” alias basuo lansuang dimuko
iduang, mato jo kapalo yo indak tahan
juo untuak malapehkan salero buruak, saketek banyak iyo ingin mancubo
dek manjijia tabik salero jo masakan kapau baa istilah anak-anak gaul kini
rasonyo “ngangeni”
Baitu pulo nan ambo alami katiko
hari sabtu ado acara temu reuni di halaman sakolah ko dengan acara nan cukuik
special disiang hari nan cukuik angek dek cuaca musim kemarau yaitu bamain Kim
nan musiknyo dihoyak dek salah satu legenda musik Kim ranah minang nan malang
melintang menghibur urang banyak si …“Uwo” Kumar. Manuruik ambo Hut Emas SMA 1
ko disampiang meriah jo babagai acara tapi kesan merakyatnyo cukuik dalam. Iko
dibuktikan maajak masyarakat tempatan para pedagang kecil berpatisipasi
memeriahkan acara ko, terutamo dalam urusan los lambuang. Dihalaman sakolah
disadiokan dek panitia lapak-lapak makanan dan minuman nan merakyaik jauh dari
kesan eksklusif. Alumni tumpah ruah babalanjo menikmati makanan, jajanan dan
minuman nan dijojo diteras-teras ruangan sakolah.
Dampak dek acara nan merakyaik ko
tantu di 4 hari acara alumni ko masyarakat ketek nan manggaleh dapek meraup
rejeki jo untuang nan agak balabiah dibandiangkan jo hari-hari biaso. Para
alumni nan datang dari babagai penjuru daerah bahkan
dari lua nagari ringan sajo tangannyo mangaruak saku sarawa jo dompet
mambalanjokan kepeangnyo tanpa banyak cincong ago ma ago makanan, jajanan jo
minuman nan digaleh pedagang ketek ko. Pokoknyo salero biruak lapeh masalah
kepeang nomor sekian kok indak awak nan mambayia konco lamo nan mantraktir, ado
nan perai ado nan takanai kalau kumpua kangen para alumni ko “bilo lai ka den
kinyam kepeang waang tu nan alah manjadi urang gadang dan sukses” mungkin
bantuak itu garah sasamo alumni.
Dari sagalo makanan, jajanan dan
minuman nan di galeh di lapak-lapak halaman sakolah tantu nan paliang paporit
dan paliang rami alumni adolah manikmati nasi kapau, lapak-lapak nasi kapau ko
lah nan paliang banyak dikarumin dek alumni untuak maisi kampuang tangah sambia
bakumpua maota, basenda gurau, bagarah kudo makan basamo duduak malepok
basamo-samo mambantangkan pasanan nasi ramas kapau masiang-masiang. Ambo
malihek bana alumni saangkatan makan ala bajamba bakarumun basamo-samo
manyantuang masiang-masiang pasanan nasi kapaunyo nan dibungkuih karucuik sajo
jo daun pisang. Sabana heboh cepak cepong cantuang cantang alumni ko nan duduak
malepok dirumpuik halaman sakolah disampiang pangguang tabukak tampek main
Kim.Saliang semba manyemba samba nasi kapau ko nan baragam sasamo alumini mulai
dari ayam goreng babumbu, ayam gulai, dendeang balado, tunjang, babek, usus
biisi talua, hati, limpo, randang, goreang masiak ikan nila, gulai cubadak jo
lobak singgalang khas kapau. Yo sabana akrab alumni ko, mungkin dek lah lamo
indak basuo bisa jadi juo
basuo jo “cem-ceman” lamo baa kecek MC di pangguang mungkin ado juo CBLK alias
Cinto lamo bersemi kembali. Kondisi nan sangaik heboh makan siang jo nasi kapau
duduak malepok bakuliliang barami-rami ko sempat ambo Kodak.
Samantaro ambo jo urang rumah
siang tu tantu indak lupo lo maisi paruik jo nasi kapau ko sambia bamain Kim.
Ambo mamas an nasi kapau di lapak nan barado disayap kanan halaman sakolah ,
ondeh mande paruik lapa kok mancaliak samba nan tabalingkang diateh meja
panggaleh nasi kapau raso ka dicubo kasadonyo, akhirnyo pilihan ambo jatuah ka
gulai tunjang jo dendeang balado (samba ambo dobel) dek baduo makan jo urang
rumah nan memang inyo “badiet” tapi nan badan indak juo bisa lansiang ka
kondisi ideal bantuak gadih dulu. Ambo kecek diet ka diet sajo santuang sajo
lah toh sakali-sakali awak malapehkan salero buruak bantuak iko kok yiok hari
yo tabedo awak mah.Samantaro anak ambo nasi ramas jo ayam goreang bumbu sajo
nan maagiah kuah gulai lobak singgalang salayang.
Nah masalah gulai tunjang ko ambo
ingek istilah dari Pak Prof Emi, dari inyolah pertamo kali ambo mandanga
istilah “Tunjang nan tatapak”, waktu katiko ambo bajalan-jalan jo baliau di
Bukik Tinggi ka nagari kapau kami makan dilapau nasi urang kapau, katiko ambo
ingin mamiliah samba tunjang Pak Emi mangecek ka ambo “Andi piliah tunjang nan
tatapak” jadi tunjang ko nan bagian tapak kaki kabau agak kehitaman saketek
tapi rasonyo yo lambuik dan krenyes-krenyes sabana kulek badendang lidah dek
nyo kok dapek tunjang nan tatapak ko.Tunjang ko kok salah piliah pulo memang
awak ndak raso makan tunjang dek nyo tapi raso “makan ati” awak deknyo kok
dapek tunjang nan kareh jo liek raso katangga lo gigi awak manjujuik tunjang
nan liek ko, ujuang-ujuangnyo kok ado anjiang dimuko nan mancaraguik mancaliak
tunjang liek nan awak jujuik ko tapaso diampokan sajo lai ka anjiang
ko..aha..yo barasaki bana si waw..waw..mah nan kalamak dek inyo bana
manyantuang tunjang bantuak iko samantaro dek awak raso “makan ati” manjujuik
tunjang nan kareh bin liek ko.
Lah bajadi ambo makan nasi kapau
ampek baranak dibangku anak sakolah nan tabuke dari kayu sambia mandanga lagu
Kim nan didendangkan dek Uwo, sakali-kali tangan kida manyoret nomor nan kalua
dikarate kim nan dibagikan dek anak-anak SMA 1.Ndak do lai sabana lahap kami
makan cepak cepong cantuang cantang sarupo alumni sakolah ko nan heboh
disampiang ambo makan ala bajamba, agiah taruihhhh tambuah ciek sorak alumni
ko.
Itukah kapiang-kapiang kisah ambo
nan “ikut-ikutan” memeriahkan hari ulang tahun ameh nan ka 50 SMA 1 Landbouw
Bukit Tinggi. Hati sanang paruik kanyang salero sadang namuah lo walah tantu
samakin syahdu suok demi suok nasi kapau ko ka muluik. Umpano galok pakek bana
hari ko jo nasi kapau namonyo suok tatap juo ka muluik indak maleset bagai ka
hiduang apolai ka talingo..wk..wk.wk..wk..Piss Alumni-er SMA 1 Landbotw.
Pekanbaru, 2 Agustus 2009
Lebih Bersih, Lebih Baik, Lebih Cepat - Rasakan Yahoo! Mail baru yang
Lebih Cepat hari ini! http://id.mail.yahoo.com
--~--~---------~--~----~------------~-------~--~----~
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, kirim email kosong ke: [email protected]
Untuk melakukan konfigurasi keanggotaan di:
http://groups.google.com/group/RantauNet/subscribe
-~----------~----~----~----~------~----~------~--~---
