Katiko tangan diuluakan nan kaduo kabasalaman kami ka bapisah dimuko paga kantua kawan rang mudo nan energik nan banamo Andiko Sutan Mancayo
Ambo sampaikan pasan nan sangaik pantiang dengan nada ancaman "harus, kini ko juo dibuek, dilaporkan" ka palanta RN "Ambo tunggu Andiko, jaan balamo2, tolong dendangkan wisata kuliner kito dilapau urang lintau" Sampai di rumah puta kaputa tiok sabanta di caliak juo kompor saganggam tangan ko, alun juo masuak "dendang kuliner" ko, nan lansek dibali dijalan bakaja-kaja masuak muluik, dicigok juo kompor ketek ko, alun juo nan lansek tingga sarok sajo dalam plastik Akhirnyo nan dinanti masuak ka kompor salaweh tapak tangan bajudul Reportase Pekanbaru, iko bananyo, mato nan tadi dek akuak ka diukua panjang kasua dikamar lansuang tabulalak Disandakan pungguang ka dindiang kaki diunjuakan dibuka laporan ko ndak do lai yo sabana tatagun dan raso barubek badan diri nan salalu aiuh jo lapa dengan seni2 bacarito urang awak jo bahaso nan mandayu-dayu balenggang lenggokan sakali-kali marantak sarupo lakek kaki pandeka tapek ka ulu hati tapi disinan ado kehalusan dan seni nan dalam, badanyuik dendang ko sampai kaurek nadi nan paliang haluih Lah banyak ambo mandanga, mambaco dan manonton kuliner tapi apo nan ditulih sanak Andiko dibawah ko yo baru sakali ko ambo mambaco asli atau Ori kecek gaul urang manjua hape seken di konter untuak barang2 nan indak palsu, sakali lai usali bana lakek tangan dan seni dunsanak kito nan sabendera jo ambo nan barasa dari nagari nan indah lagi subur dikaki gunuang nan pernah ditimpo bencana galodo ditahun 1979 Sungai Tarab, Urang mudo nan energik banyak ulemu dan makan asam garam jo petualangan didaerah pedalaman ko baru ketek anyia masih dalam gendongan ayah jo mandenyo katiko galodo tu datang Ambo manyabuik tulisan kulinernyo ko jo istilah "Dendang Kuliner, sanak Andiko hanyo maiyokan sajo sambia tasunggiang suduik bibia jo senyum nan ramah mandanga sagalo ciloteh ambo satantang kuliner ranah minang, yo sabana bantuak dotor nan baru lulus ambo kok lah bacarito kuliner ranah minang ka sanak Andiko walau nan ambo caritokan bisa sajo ambo maloge si Andiko, tapi indak juo anak mudo nan baru pertamo ambo kenal ko pengetahuannyo jo kuliner minang jaan disabuik juo, daya jelajahnyo di ranah minang dipasia pantai barat jo di darek manampuah kampuang2 di pasisia pantai dan di hutan jo bukik di darek jaan disabuik lai banyak perjalanan spiritual andiko ko atau bisa juo disabuik perjalanan antropologis sutan mancayo, kok mandanga carito sagalo barang2 kiramaik nan basuo dan sabagian manjadi kolekinyo tabayang sakali ambo pilem Indiana Jones bantuak itulah kiro2 sakileh tantang sanak kito ko nan lah pasa jalan manampuah pelosok2 suku pedalam dalam rangka memediasi dan maagiah konsultasi ka masyarakat adat di pedalaman nan manuai konflik jo pihak2 katigo Baliak ka Dendang Kuline Andiko Sutan Mancayo, tigo kali ulang mambaconyo alun juo pueh mambaconyo diulang sakali duo lai, samakin disigi latak jo dendang kato2 sagalo jamba dan samba nan kami makan tadi siang samakin manarawang pikiran ambo ka maulang makan malam baliak jo sutan mancayo ko, antah baa lo laporan "dendang kuliner" nan kadibueknyo makan malam kami samisal ambo ajak ka pondok bauang asam padeh, tapi baa lah dek lah jalannyo sadang "bakasiah-kasiah" kami bakuliner dan bersilahturahim harus bapisah dek sutan mancayo sore ko harus tabang baliak ka jakarta karano bisuak tugas lah manunggu lo Kecek lagu pop dian pisesa saisuak bukan perpisahan yang kusesali tapi pertemuan yang ku tangisi Tapi dek kami perpisahan ko nan barek bukan dek ulah kami basuo, tapi dek ulah kuliner ranah minang urang lintau nan maimbau2 kami untuak saliang basuo dan bakenalan, kok ka bajumpo baliak kami samo2 yakin kok umua lai samo panjang, kok langkah lai juo panjang ateh kahandak nan Kuaso tantu bilo2 kami basuo baliak Dendang Kuliner Andiko Sutan Mancayo yo mahanyuikan ambo nan mambaco, raso mandanga rabab pasisie wakatu ketek nan diundang urang baralek nan dimainkan lapeh Isya manjalang subuah..samakin laruik malam samakin hanyuik jo kisah si tukang rabab, baitu pulolah dendang kuliner sutan mancayo ko..yo sabana baru partamo kali ambo mambaco gaya bacarito kuliner bantuak iko.. Rancak..rancak bana, ka jadi pamenan untuak disimpan2 dalam komputer ambo, bilo sadang suntuak atau baa kecek anak gaul kini Bete, tantu ka ambo ulang2 mambaco "dendang kuliner nan dinyanyikan dek urang mudo energik barasa dari Sungai Tarab nan banamo Andiko Sutan Mancayo Samo2 tarimo kasih dinda Andiko, alah tu ubah panggilan ka ambo jaan panggiak ambo Pak JP juo lai dari kini, saraso batamba gaek umua ambo 10 tahun dek sutan mamanggia ambo PAK, Call me Da Jepe sajo he he he Salamaik jalan dari kota Pekanbaru, Insya Allah bilo2 kito basuo baliak dengan suasana yang lebih dalam lagi membicarakan, berbagi pengalaman pengetahuan dan ulemu nan sakiro sangaik manyambuang bana pemikiran kito dalam sebuah bidang nan samo2 awak tekuni dan acok saiyo sakato jiko basuo jo kasus2 atau kejadian dilapangan dan samo2 awak alami dan awak rasokan Wass-Jepe (44 thn, pku) Sent from my BlackBerry® smartphone from Sinyal Bagus XL, Nyambung Teruuusss...! -----Original Message----- From: andikoGmail <[email protected]> Date: Sun, 20 Dec 2009 15:31:25 To: <[email protected]> Subject: [...@ntau-net] Pekanbaru-Reportase Hari III-Makan siang dgn Pak JP Pekanbaru-Reportase Hari III Lapau Nasi Urang Lintau Tapek di angko sabaleh, jam dindiang badantang sakali. Dantang haluih manjantiak talingo, tasintak badan mandanganyo, iko nyo janjian lah tibo. Dilayangkan pandang kalua, tatagak bendi bugih itam. Kusianyo sabana licin, gaek alun, mudo talampau, urang ba ilimu bantuaknyo (berwibawa kalau di pejabat). Di uluakan tangan basupaha, tasabuiklah namo udaranyo “JP”. Oh iko bana apak tu, pandeka di rantaunet, bakucindan jo badebat, sampai ka kuliner inyo gubalo. Ndak lamo sarantang itu, kudo dilacuik mangukua jalan, badarun-darun gas mambalah labuah manuju tampek “pasungkahan”. Duo kali stiur baputa, ampek kali rem badacik, sakali bendi babelok kida, sakali pulo suok mambaleh. Setelah rem tangan di elo, baranti tagak bendi ko, sakilek kusia maloncek. Tatagak oto dilapau urang lintau. Takana maso daulu, katiko naiak Sari Ekpres ka tanah Jao. Satangah hari badan bajalan, panek tubuah dek kelok jalan, oto baranti tantang Gunuang Medan, rumah makan Omega kato urang. Mahariak si supir oto, “ma nan ka makan-makan dulu, ma nan ka sumbayang-sumbayang dulu, oto lai baranti lamo”. Di lua tadanga pulo langkiang suaro urang lapau nasi di toa, “Selamat datang panumpang Sari Expres, silahkan beristirahat-kok kekiri anda wc jo kamar mandi”, baitu kiro-kiro bahaso Indonesia sangkek itu. Sakali ko, bendi bugih indak panuah, sorang kusia jo tamunyo, di bulakang duduak manis, duo urang buah kasiah nan punyo oto. Duo langkah dari kapalo kudo, tatagak lapau semi permanen. Basusun papan pintu lapaunyo. Salangkah dari pintu, basusun meja jo bangku. Balirik saladah plastic pambasuah tangan di tiok mejanyo. Sadapo dari pintu, tagak lamari kaco etalasenyo, babateh mode meja bar, tampek pangunjuang maulua kapalo dan kasinan kami tagak. Alah ditukiakkan pandangan mato, layang malayang pancalia’an. Kok jamba yo ndak sarami ampera, antah apo pulo pa elonyo. Mungkinkah disiko raso bamain, ataukah bumbu-bumbu sileknyo. Dietalase baderet samba standar, mulai dari ikan goriang ka ayam goreang, mulai dari gulai ikan ka gulai limpo. Sabalun pandangan salasai manyapu kapalo jamba, mangecek nan punyo bendi “tolong dihidangkan sajo, kaluakan sagalo nan buruak-buruak”. Mandanga kato mode itu, sakatiko urang lapau manyemba cipia, mode pendekar capeknyo, bapindah sagalo macam isi balango. Samantaro kami, diurak ota mananti jamba tibo. Ndak lamo badan mananti, alah tahidang sagalo jamba. Dibawah, manjadi sandi cipia ikan gulai jo, ikan goring, sandi katigo pucuak ubi jo gulai tunjang. Diateh sandi manonggok, dendeng kariang, bagisia jo cipia talua dadar sataba banta. Dipuncak sagalo jamba, disinan mato jadi tapana. Dek pandai tukang rabab malagukan, dek pandai urang dapua mancari pasangan, sahinggo sacipia tahu jo jariang, alah bakawan kini tempe jo randang. Ndak lamo nasi manunggu, alah tajun jariang jo tahu. Indak lamo jamba miriang, disinan tajun pulo dendeng kariang. Dendeng kariang pinggua kabau, bagulimang jo lado sirah ratak leba. Coklat langkuang dendeang ko, kilek bakilek dimakan minyak. Alun sampai pinggan licin, mahambuah pulo ikan gulai, jatuah tatunggang ka ateh nasi, ka baa lai, nasi kadimakan juo. Ikan sungajo ditangkok dari sungai, alah batahun baranang maso, jaleh bana jajak manih dagiangnyo. Ikan digulai di api ketek, kulik manih bahan baronyo, sahinggo padu bana santan jo kunyik, ikuik manyarato supadeh jo lado. Sakicok sasudah itu, alah indak rila pulo gulai tunjang, manga wak den dibiakan, manonton kawan-kawan dilepoh kusia. Bukannyo dimakan, janjian diri. Karano itu, bakucintang pulo inyo di suduik piriang. Tunjang yo sabana tunjang pilihan, mungkin jo ilimu mangubalo. Liek indak gacahpun tido, lakek bana di ujuang lidah. Kok kuahnyo, indak mambaku minyak santan dimakan angin, indak bagalintin tangan dibueknyo. Iyo sabana saulah kecek urang Bukiktinggi. Tapi yo bana taibo hati pucuak parancih, disingguang indak disapopun tido, baitu bana parasaian, sayua wajib lapau nasi Padang ko. Bakatolah inyo ka urang lapau, kok kaindak dimakan manga den di hidangkan ?. Manjaleklah urang kadai ko, kalau angku indak ado, bukan rumah makan Padang namonyo, karano itu angku di pangguangkan, kami minyaki patang jo pagi. Dek sibuk tangan mangaca jamba, indak sajalan lai jo ota nan kalua, sahinggo nan punyo bendi bugih ko duluan manyarah. Kok minumnyo, iyo bana urang manggaleh ayia, teh angek nyo agiah es, disinan paneh jo dingin batandiang, sato pulo gulo mambuek mampamanihnyo. Dek lamo galeh ndak di kaca, alah barambun jatuah ka meja, pipet tagak ditangahnyo. Dihiruik sahiruik raso ndak lapeh, hinggo disedot sampai satangah galeh, iko pulo nikmatnyo minum ayia ko, teh es kato rang Padang, Te Obeng kato rang batam, esteh manis kato rang jao. Lamo bana ayia ko sampai, alah indak saba dji sam soe dib aka. Manggabubu asok ka parabungan, lantiak-malantiak api rokok. Di isok ka tigo datang angin mambelai, bahambuih baputa dari suduik lapau, angin manalisik ka baliak kerah baju, jatuah manimpo batang tubuah, kipeh angin kato rang Lawang. Sakatiko kantuakpun tibo. Mungkin karano itu nabi bapasan, janlah makan balepoh bana, sebab kakanyangan dakek jo mangantuak, kaduonyo induaknyo maleh. Yo bana maleh tagak dari lapau rang lintau ko. Jikoklah sanak ka Pakanbaru, cubolah bel pak JP dan tanyokan dima lapau rang Lintau ko. Manih jauah, padehpun indak, sabana saukua masakannyo. Jikok di ambo, antahlah jo apo dibaleh jaso pak JP, urangnyo ramah kucindan murah, suko badiskusi jo bacarito, tapi dilua itu sadonyo, makan kito nyo bayia pulo…he..he.. (Tarimo kasih Pak JP, sagan ambo deknyo). Salam Andiko Sutan Mancayo -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe
