Maa lah Angku Andiko Sutan Mancayo, sarato Rang Lapau nan Basamo. Mandanga Dendang Kuliner Satu ampia ambo tajirungku sabab jakun manggarutu batingkah jo kunuik kala baju.
Mandanga Dendang Kulainer Satu carito nan dari Sungai Tarab mambuek hati batambah pilu saroman mandanga saluang jo rabab. Tasintak malam pukua satu kini manjalang pukua duo patang Sinayan lah balalu pagi Silasa nan lah tibo. Kok dakek badan ko di Kampuang cubo maojok manuju sanjo kok talakik sampai ka Salimpuang lalok di surau manjalang Robaa tibo. Kok lah sampai ari Robaa maengak-engak ka tangah pasa diengong iduang ka suok kida manditeksi urang manjua kawa. Minun kawa di sayak tampuruang itulah pangana pulang ka kampuang daulu lah dicari ka Pasa Lasi indak ado urang manjua kawa lai Dek ati taibo lah tu kini tadanga Dendang Kuliner Satu raso ka tabang badan diri manuju pasa Sungai Tarab tu. Gulai kambiang jo dadiah sagalo ado gulai rabuang maningkah pulo raso ka dihantam sagalonyo tapi rakuangan ketek dari mato Kok dadiah kabau nan Sutan sabuikkan sajak ketek makanan idaman bukan garam jo bawang sajo nan ditambahkan cabiak daun siriah tambah masuakkan. Minun kawa sayak tampuruang duduak bajuntai atau mancangkuang gulai kambiang campua jo rabuang aroma manggili masuak ka iduang Banyak pangana manarawang mangana carito kuliner Minang carito salero dikarang urang rindu badan jauah di Rantau Urang Mandanga Dendang Kuliner Satu carito pasa Rang Sungai Tarab kok bilo-bilo taleso ado ukatu dikana imbauan saluang jo rabab. Salam, --MakNgah Sjamsir Sjarif Di Tapi Riak nan Badabua Di Subarang Lautan Taduah Lah parak siang manjalang subuah --- In [email protected], andikoGmail <andi.ko...@...> wrote: > > Seri Dendang Kuliner 1 : Gulai Kambiang Jo Kawa Daun Sungai Tarab > > Jikolah sanak pai balibur, pakansi anak atau hari rayo, pailah ka > Batusangka. Batusangka ba Lantai Batu, Parak Jua Labuah Basilang. Di > labuah basilang nantun, dimungko Bank BPD putalah stiur ka kida, arah ka > Bukiktinggi, ibukota Sumatera Tangah. Salompek duo lompek, nan katigo > gas ditakan, limo kilo dari sinan, sanak ka basuo jo nagari ambo, nagari > Sungai Tarab-Salapan Batua, ba kapak, ba radai, ba katitiran diujuan > tanduak, baitu bana urang imbauan. > > Jikolah sanak pai kasinan, pailah salasa patang malakik mugarik tibo, > kalau indak talakik, mancogoklah rabaa pagi manjalang matoari tagak > tali. Dantiang-badantiang bunyi tukang titik, lapak-balapak bunyi tukang > martabak. Bagulasau bunyi balai, mandanguang ka talingo, baitu bana > raminyo pasa. Tapi bukan itu kaji ka diurai. > > Masuaklah sanak ka tangah balai, tagak manjago baringin gadang, batahun > ba abih maso, samanjak Puti Lenggogeni gadih ketek. Jiko malayang > pancalia'an, basusun kadai kayu di pangkanyo, kasinan sanak manuju. > Sakatiko di ampia pintu, datang mahambuih baun jamba, mangacau > kiro-kiro. Di meja kayu tuo, balirik balango Loyang, batingkek jo talam > tuo. Apo tuh ?. > > Loyang partamo, iyo iko bana pokok galeh, gulai kambiang urang imbuan. > Kambiangnyo mudo tangguang, elok ka syaraik anak akikah. Rila bana badan > di dabiah, yo baitu bana pajanjian. Tukang dabiah, malin tuo, yo tahu > bana ma nan manyangik, lamak ketek diateh kapalo, dibaliak katiak ka > ampek kaki, disinan kunci mambantai kambiang. Samantangpun gomok ndak > labiah saujuang jarih, disinan latak kunci gulai ka lamak, indak baun > kambiang tuo. Jiko lamak ketek indak diangkek, alamaik gulai babaun > angik, indak katamakan dek urang alek, walaupun alah batimbo bawang > putiah, sarato jo pamasak kambiang. Kok di lapau kayu ko, dek pandai > tukang bantai, tingga mambadak se sagalo bumbu jo pamasak, indak babaun > saketek tido. > > Jiko dagiang dipapek ampek, jikonyo batulang manjadi cancang, hati jo > limpo makanan rajo. Kok minyak gulainyo, dek karambia, karambia pilihan, > tuo indak mudo talampau, tinggi maanjuang manyapo langik. Santan putiah > bak susu pagi, dijarang jo baro kayu kopi. Kok pamasaknyo, india jo > kaliang nan punyo ramuan, kapandaian jauah dari Hindustan. Balango > gadang dari Cino, dibao anak urang Kumango. Disinan manyatu dagiang jo > kuah, dadak maandok dibawah minyak, Nampak mambayang urek dagiang. Harum > ma hao di ruang lapau. Maimbau singgah dagang lalu. > > Balango kaduo, yo gulai rabuang. Basabuang angok mancarinyo, jauah > tasuruak di pangka batuang, tampek ula gadang mambangun sarang. Basusun > ladiang datang, manyonsong batuang poriang, baitu bana pintak ka buliah. > Setelah di kubak, rabuang kuniang, kuniang gadiang, makanan alek anak > angku Palo. Di didih rabuang tipih-tipih, raso ndak ka pacah dek sendok > kayu. Mahandok bana sagalo bumbu. Jikonyo dimakan, manih rabuang > manyabuang padeh, manari lidah karanonyo, raso tulang rawan daruaknyo. > > Diantaro balango Loyang, basusun pulo talam tuo. Timpo ba timpo dendeang > kariang, lado ratak pasanganyo. Dek lamo dendeng basususun, jatuah > manitiak minyak ka talam, mancuramin kileknyo. > > Sabalun sanak manyuok nasi, tolong maimbau ka balakang kadai. Ado apo tu > ?. Di pangka baringin, ba susun urang manggaleh dadiah. Dadiah, dadiah > sanak…?. Antah sia nan mamulai, susu kabau nyo bakukan. Mambaku susu > diruang batuang, basaok karisiak pisang rajo. Kok dadiah ka dibaco, > putiah bana bak cando awan, yo alam Minangkabau nan mambangun raso. Jiko > sanak nio dadiah, racik bawang merah diatehnyo, sabalun dimakan, bialah > garam saketek mamainkan raso. > > Tapi ndak cukuik pantun sairiang, janlah lupo mamasan kawa. Kawa daun > dari Padang Laweh, pucuak kopi nan nyo sangai. Bahari daun di asok, > tabang mauwok ayianyo, kariang masiak kajadinyo. Disinan santiang tukang > sangai, bacarai hijau jo daunnyo, harum kopi gunuang Marapi tingga > manjago. Diabuih daun kopi jo ayia Bulakan, pariuak tanah nan > manangguangkan. Ndak lamo daun kopi diabuih, jatuah tatunggang ka galeh > tampuruang, batuang bapancuang tadahnyo. Dek lamo tampuruang dipakai, > alah hitam bibia-bibianyo. Tapi disinan seninyo sanak, harum pucuak kopi > sangai diabuih, manganta sanak ka kiro-kiro, dek itu pulo tarambau > Cindua Mato. > > Kalaulah tabuncah paluah dek balepoh, bakaja-kaja padeh jo angek kawa > daun, guluanglah tambakau nomor 9, digaleh urang Payakumbuah. Kok lai > santiang mambilai daun, cubolah guluang jo daun nipah, kalam bakatuik > pesok jadi juo. Jikok sanak urang baru, tingga dimintak daun anau, indak > susah mangguluangnyo. > > Sakian dulu dendang kuliner ambo. > > Andiko Sutan Mancayo > -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe
