Ondeh, Gulai Jangeeek, iyo taragak lo awak eeh... Masih ado koh urang maolah jengek tu di Pasa Umbilin? Buliahkoh awak mambalinyo di sinan? Ataukoh dapek dibali di pasa-pasa dimaa sajo di Kampuang?
Apokoh Jengek nan ka dijadikan Gulai Jangek tu samo jo jangek nan ka dijadikan Karupuak Jengek? kalau awak bali Jngek nan di Umbilin tu dapekkoh awak mambuek Karupuak Jangek surang? Nan paralu dipotong-potong ketek-ketek dulu sudah tu dilatua kan? Satanangan Pohon Juha, namo Indonesiano Juhar. Ambo caliak latinnyo Cassia seamea. Iko gambar nan tampak di web. Iyo samo jo Juha nan dimukasuikkan ko? http://images.google.com/images?q=Cassia+siamea&gbv=2&hl=en&client=firefox-a&rls=org.mozilla:en-US:official&um=1&ie=UTF-8&ei=CnY5S8HSNYvIsAOFyI3HBA&sa=X&oi=image_result_group&ct=title&resnum=1&ved=0CBkQsAQwAA Kalau indak salah di Batu Sangka ado lo jorong nan banamo Parak Jua. Samo koh jo Juha nan disabuik tu? Ado barapo kato nan ambo indak obeh: > raso dalam mancugam, disinan gulai jangeknyo manjadi kaninan. Apo aratinyo "mancuhgam" jo "kaninan"? > jo paik kambeh, ampia badakek jo paik bungo sirangak Kok paik kambeh ambo lah tahu, tapi apo lo tu "bungo sirangak"? Efek samping Budaya. Kadang-kadang tampak dalam Budaya Awak, urang agak suko melecehkan pambarian Tuhan ka Urang Cacat, saroman Urang Celek, Urang Pakak, Urang Bisu, Urang Sumbiang, Urang Cingkuak, atau kulik urang nan Itam. Mudah-mudahan Budaya Cacek ko dapek diperbaiki dan dimasuakkan ka dalam Acara Pendidikan untuak angkatan maso datang. Rasonyo usul program Pandidikan ko sadang dikarang-karang dek Angku Mochtar Naim kapatang ko nan sadang dipabincangkan dek alhli-ahli didik kito nan sabagian duduak juo di Lapau ko. Kok paralu nanti paralu diundangkan supayo dapek maindakan ereng gendeng cacek budaya saroman ko. > Gulai jangek jo bungo juha > Di gulai nak urang Balimbiang > Lado pagi tabali maha > Galak baserai si urang sumbiang Lah ka nasib urang manjadi Sumbiang, kok digalak-galakan tapaso haniang Pambarian Allah inyo tarimo Dek urang banyak indak taraso. Tangih nan indak batampakkan tapaso Mandeh mambaruik dado. Baralah ka Ibo Hati Mandehnyo, bak bunyi pantun saroman iko: Layang-layang Nak Rang Cingkariang Putuih nan tabang ka Kototuo. Iyolah malang baranak sumbiang Mandeh takangkang galak juo... Salam, --MakNgah Sjamsir Sjarif Di Tapi Riak nan Badabua http://www.santacruzsentinel.com/localnews/ci_12030675 --- In [email protected], andikoGmail <andi.ko...@...> wrote: > > *Seri Dendang Kuliner VI : Gulai Jangek jo Bungo Juha Balimbiang* > > > Pisang si kalek-kalek hutan > Pisang timbatu nan bagatah > Koto Piliang inyo bukan > Bodi Caniago inyo antah > > Padiah tasansam pagi nangko, mananti Garudo maraok ka landasan. > Dipandang-pandang sajo deretan kapa, malintang-lintang di parantian. > Kamalah pangana manguok pagi nangko, yo ka Balimbiang sanak, ka sinan > jajak ditikam, takana ranah bako. Itulah nagari Balimbiang, batang > bangkaweh nan mambalahnyo, lareh nan panjang manjadi pilihan, ka nagari > tuo sangketo di bao. > > Bagamuruah batang bangkaweh > Ditundo hujan dari hulu > Rusuah datang manjadi uweh-uweh > Takana maso jo niniak dahulu > > Dawi namo niniak ambo, > manggaleh gulai ka pakan-pakan, > kasiahnyo bukan si padi ampo, > tapi sungguah dalam mancukam. > > Kalaulah sanak pernah ka pasa Batusangka, toko batingkek di imbauan > urang. Toko tuo ba abih maso, ba tujuan urang ka sinan. Hari Kamih hari > pasanyo, banyaklah urang manggaleh lamang, manggaleh gulai jangek jo > bungo kayu juha. Itu dendang nan ka di baco. > > Gulai jangek, gulai jangek jawi tabungan, dilapeh angok mangkonyo > tangga. Disinan bacarai kasiah jo urang gubalo, jatuah manitiak aia > mato, jawi kasayangan dijua bapak, mati di dabiah si tukang bantai. > Sakatiko angok tabang, mode manari pisau si rauik manangga kulik, jangek > bacarai jo badan diri. Katiko jangek tangga, alah manunggu si matohari, > masiak tagang kajadinyo. Itulah nan jadi pokok galeh niniak ambo. > > > Jangek bajapuik ka pasa Ombilan > Kadai banamo si kumbang jati > Jangek di katam manjadi licin > Baru disinan unggunan mananti > > Sahari jangek di kuduang, dibaka manghitam di unggunan, ndak lamo arang > dikikih, barulah di anok di parandaman, disinan jangek manguniang, jajak > nyalo si lidah api. Cukuik hari ka tigo, disinan kancah alah di tungku, > dijarang sagalo pamasak jo lado, cukuik sarato jo santan pilihan. > Antahlah bara karambia nan hilang, asa gulai indak manjadi jalang. > > Bialah den tanam mumbang > Mumbang kok lai ka jadi kalapo > Bialah den tanam kasiah jo sayang > Sayang kok lai ka manjadi cinto > > Jo kasiah niniak kadapua, sajak sanjo ka tangah malam. Bia nak dalam > raso dalam mancugam, disinan gulai jangeknyo manjadi kaninan. Dek di > balango tanah gulai di kincah, disinan santan jo bumbu manjadi padu. Kok > jangeknyo, jangeknyo layuah-layuah tagang, taba saukua cukuik pangganja > gigi, lidah sato mamalunnyo. Dek gulai yo sabana santiang, batahun urang > mambali, manjadi karinduan patang jo pagi. > > > Sa iriang jo gulai jangek, disinan bungo juha sato di gulai. Antahlah > apo namo latinnyo, kayu juha urang imbauan, tumbuah tinggi elok ka > sarang alang, tampek manyuruakkan di buluah parindu. Kayunyo kareh elok > di takiak, bahan ramuan rumah gadang tuo. Kok bungonyo, bungonyo kuniang > ketek-ketek, dikarang tampuak mangkonyo ndak baserai. > > Katiko juha alah digulai, paik manjala di ujuang lidah, paik dan babedo > jo paik kambeh, ampia badakek jo paik bungo sirangak. Tapi usah maludah > dek paiknyo, paik ka paubek si damam kuro. Lamak batimpo santan jo > pamasak. Banyak urang nan manjadi suko. > > > Gulai jangek jo bungo juha > Di gulai nak urang Balimbiang > Lado pagi tabali maha > Galak baserai si urang sumbiang > > Sakian dulu sanak dendang gulai jangek jo gulai bungo juha, kapa alah > maraok, diansua masuak ka ruang tunggu. > > Salam > > Andiko Sutan Mancayo > > Dendang Kuliner : Melestarikan Resep Makanan Khas sambil Mempertahankan > Seni Bertutur Ranah Minangkabau -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe
