Andiko Sutan Mancayo, lah kini lo manampuah jalan didarek sabendi, lah kini lo kito balayia dilauik sabiduak, baa kecek Sutan busuo rueh jo bukunyo, kok bagaluik jo bagarah dikuliner ranah minang lah saulah bana, dek lai sahobi dek lai sa paisokan samo rokok nipah nan batimbakau no 9 nan digaleh anak urang pikumbuah
Dek saulah tu bana tantu Sutan Mancayo tahu bana baa ambo mamulun jo malintiang rokok nipah ko, ibaraik gaek manahan untuang jo parasaian mandanga rabab , duduak manyanda diujuang bando nan paisok nipah ndak tahu api lah padam namun nan paisok dikulek juo di ujuang bibia jo lidah taraso mamaik nan rindu ditahankan juo mandanga kisah si tukang rabab nan mangabakan parasaian kasiah si jepe jo sutan pai marantau ha ha ha Parasaian jo cinto nan indak putuih2 jo samba samba buruak si bundo kanduang, Baa nan Sutan sampailkan juo ka ambo, taraso bana kok lah badan bakureh dirantau urang karajo babelok, aha dima duduak dibuka juo lapiak buruak ko, digesek2 juo rabab tampuruang tuo ko sambia manunggu kapa marapek mambaok ambo ka pulau rupat Indak kadiarok bana benggo lamo ka dicampakan urang diateh lapiak buruak nan ambo kambangkan, nan diarok yo mandanga dendang kuliner Sutan Mancayo sambia mangalai2 diateh lapiak buruak ko Lah Sutan dendangkan pulo si gulai jangek..oiiii Sutan masih ingek jo garah ambo dilapau ko Kok di suku mandailiang karajinan rotan indak maju2 jo bakambang dek ulang abih pucuak rotan nan disabuik Holat ka dipaulam suku mandailiang Baitu juo. Di ranah bundo tacinto sagalo karajinan kulik mulai dari sipatu, tas, dompet sampai gantungan kunci lah manangih dek suliknyo dapek bahan baku si kulik jawi jo kabau, Lah sudah dipalosoh dek urang kajadi karupuak jangek masuak lo apo nan sutan dendangkan si gulai jangek Baitu juo dikampuang lah batuka kini tabuah jo sirine di musajik kok masuak wakatu shalat fardu, kok dulu tabuah nan di guguah kini sarine nan marauang indak tahu ambo apo dek kamajuan jaman atau kulik jawi ka jadi tabuah lah abih dibuek dek urang lapau nasi karupuak jangek jo gulai jangek :) Samantang baitu, onde Sutan lah tabayang bana baa bakuntimtamnyo gulai jangek ko didalam muluik, mati juo lah rasonyo lidah ditikam raso, ndak rarak juo lah gigi mangulek jangek nan gaca indak liekpun tido, lunak-lunak tangguang sakali gigi lansuang putuih (kecuali rang gaek ndak bagigi....ahaaa..ambo raso diunyuik juo gulai jangek ko masih badendang kulek gaek ko makan jo gulai jangek :) Yo samparono bana urang awak maolah kulik jawi ko, kok di jawa kajadi wayang kulik nan rancak tibo diranah tahidang lamak manjadi gulai jangek. kulik jawi nan tagang nan ambo bayangkan limo disuok limo di kida mamacik kulik jawi nan baru takubak ko lalu diegang jo urang basitungkin lomba tarik tambang indak ka putuih, tapi katiko manjadi samba pusako dek niniak2 kito Wayauuuuu jaan disabuik lai jaan kan diegang jangek nan digulai ko, dibinjek lalu ditakan jo ujuang jari dicipia sajo lansuang putuih jangek ko dek lambuiknyo.. Antahlah sutan, baa kaji sutan, walau sutan indak badendang dimuko ambo bahadok hadokan tapi dendang sutan dari jauh jo kuliner pusako ranah minang, jo bayang sajo mati ambo kanai tikam, manusuak bana ka ujuang lidah, pangka garaman, manyipak langik2 muluik jo karangkuangan rasonyo gulai jangek nan sutan dendangkan Molah bilo2 kito jajaki jangek dari umbilin nan tahidang di kadai si kumbang jati, ndak pansan juo lah ambo deknyo mancubo si gulai jangek ko :) Satantang gulai bungo juha nan Sutan dendangkan yo alun pernah ambo manginyamnyo baa kok lah rasonyo, Jiko paik jo kambe kecek sutan, indak lansung ka ambo muntahkan, paik nan kajadi ubek mah sutan, samakin dilumek di muluik bungo juho ko samakin manih ambo raso dek bagalintin jo kuah gulai di tingkahi pulo jo samba lado uok..samakin szeroohhh mah Sutan Ingek juo ambo ka pasan mande Jiko yo paik si bungo juha jaan lansuang dimuntahkan nak kanduang, diraso-rasoi dulu siapo tahu nan paik tu ka jadi ubek ka badan diri Baitu juo nak kanduang oiii jampang kok manih jaan lansuang dilulua sajo, jaan tapidayo jo raso manih, siapo tahu nan manih tu kajadi racun dalam badan Itu dek ambo dulu Sutan Mancayo, speedboat lah marapek, ambo segeh dulu, lipek lapiak buruak ko, dsandang juo rabab tampuruang tuo ko, di desa Titi Akar Rupat ambo kambangkan baliak lapiak ko sambia parintang hari manjalang ka ranah hari Kamis Salam"Dendang Kuliner" Wass-Jepe Sent from my BlackBerry® smartphone from Sinyal Bagus XL, Nyambung Teruuusss...! -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe
