Wassalamu'alaikum ww. Angku Datuak Marah Bangso yang dimuliakan. Satantang panuturan angku datuak, kok bunyi alah samo kito tadanga kok bisiak alah kalampauan. Adopun babarapo buah perundingan nan datuak sampaikan, ambo kambangkan ka alam leba, kok buliah mandapek pemandangan nan lain, nan kiro-kiro di ambo sendiri sbb: 1. Sasuai adat nan bapakai, dikito iyolah manganuik matrilineal, yaitu sako-pusako berdasarkan garih katurunan ibu. Sasuai bunyi pituah: biriak-biriak tabang ka samak, dari samak ka halaman, dari niniak turun ka mamak, dari mamak tibonyo ka kamanakan. Nan kini karono kambangnyo pintu perkawinan berbagai suku saroto bangso, nan adat lamo masih kito pakai. 2. Satantang sako nan dilimpahkan ka kamanakan, iyo baujuang-bapangka, jadi alah jaleh jalurnyo. Khususnyo gala sako datuak, diperoleh dari kulifah mati maupun hiduik, mambangkik batang tarandam, ataupun ado kesepakatan manyibak aia maambiak batu. Jadi memang tidak ado gala datuak kehormatan, atau dibuek-buek baru. Nan sajauah pengetahuan ambo, sabananyo gala datuak itu inisiasi untuak dunsanak nan tuo di dalam suatu kaum, sahinggo pantas ditinggikan sarantiang didahulukan salangkah. Nan latak saudaro tuo biasonyo talatak di bagian pangka rumah gadang. Kok dimaso itu alun ado nan patuik, mako gala sako dapek dilipek dahulu, atau disolang dalam karilaan di lapiak nan sahalai. Kok ado dunsanak kito diangkek manjadi datuak, salain ado nan di ranah, di rantau pun ado organisasinyo, yaitu LAKM (Lembaga Adat dan Kebudayaan Minangkabau), di antaronyo ado Dt. Bagindo, Dt. Perpatih, dll nan sato di dalam. Melalui LAKM iko dapek dijalin silaturrahmi, diskusi, dll basamo datuak-datuak nan lain, khususnyo nan ado di rantau. Baitu talabiah takurang nan ambo tambahkan, kironyo melengkapi penjelasan nan ado. Wassalam, -datuk endang
--- On Fri, 2/5/10, mulyadi <muly...@pusri.co.id> wrote: Assalamualaikum, wr,wb. Dunsanak, apak, mamak, kamanakan, adiak2 dan bundo kanduang di palanta RN kasadonyo nan ambo hormati dan banggakan, nan kok ketek indak ambo sabuik namo dan kok gadang indak taimbau gala, salam jo sambah manyampaikan. Kini alah tibo pulo informasi, kok bisiak alah kadingoan... kok imbau alah kalampauan yaitu satantangan ka diangkek atau istilah kito akan diadokannyo acara "Batagak Penghulu" untuak salah seorang Pejabat / Urang Gadang kito nan manjadi salah satu Menteri di Kabinet SBY babak kaduo ko yaitu Dunsanak Tifatul Sembiring. Kok dicaliak dari namo beliau memang talakek dan mamakai gala dari suku apak nyo yaitu "Sembiring" (Marga di Tanah Karo-Sumatera Utara, dek karano adat di Tanah Karo atau Batak mamakai adat Patrilineal, mako gala bapak malakok ka gala anaknyo nan laki2). Kok disigi dan dicaliak bana ..rupoe beliau adolah bamandeh Urang Agam dan terlahir sarato gadang di ranah Bundo. Kok dibaco dari info nan tatulih bahaso gala nan ka dilakekkan ko bukan gala Kehormatan atau Kebesaran, tapi adolah gala dalam suku atau kaum (kok maminjam istilah di kami nagari Sulik Aie, gala tersebut adolah gala untuak Penghulu atau Datuak Andiko), jadi manuruik ambo ...sah2 sajo ado pembesar atau pejabat nan di lakekkan baban manjadi Penghulu atau Datuak di kaum nyo.... tantu dengan Syarat dan Ketentuan nan balaku disalingka kaum atau nagari tersebut, misalnyo ado Wakil Datuaknyo nan diangkek nan manatap dikampuang tersebut. Nan jaleh beliau memang ado silsilah keturunannyo dari mamak atau keluarga mandehnyo bahaso gala tersebut memang tatonggok dikelompok keturunan rumah gadang nan mampunyoi beberapo ruangan itu. Biso jadi gala tersebut indak tapek bana di ruangan rumah gadang pihak mandeh nyo, misalnyo : gala tersebut salamo ko tatonggok atau barasa dari ruangan nan partamo (biasonyo ruangan pangka), sedangkan dunsanak Tifatul ko ado atau barasa dari kaluarga mandeh nan diruangan kaduo, katigo dan sataruihnyo sampai kaujuang balakang. Hal itu bisa sajo ....asa ... pihak keluarga nan dari ruangan partamo tadi rila dan memang indak ado nan akan dijadikan calon saat itu. Dengan mufakaik bulek kaum nan sarumah gadang itu, gala tersebut bisa baraliah ka ruangan nan lain. Mungkin...dan bisa jadi saroman itu nan tajadi di keluarga gadang Tifatul ko. Kalau pendirian ambo sendiri sebagai seorang Datuak, memang tidak manyukoi atau manyetujui adonyo Gala Datuak Kehormatan tersebut, sebab hal iko akan manyasekkan adat kito (maaf ...bagi nan indak sapandapek). Ambo raso penjelasan Nofend dibawah nan manarangkan bahwa hal iko adolah Datuak Urang Koto, Kanagarian Guguak-Tabek Sarojo.... sudah dapek kito ambiak kesimpulan, antah kok ado nan ka manambahi ........(misalnyo adiak beliau atau urang nan sakampuang) atau Angku Datuak Bagindo jo Angku Datuak Endang Pahlawan nan akan manjalehkan labiah rinci lai... Sanggan itu dulu.....rila jo maaf ambo pintakan kok ado kato ambo nan salah nan indak sasuai jo adat nagari lain, maklumlah kito alah samo2 tahu bahaso "Adat Salingka Nagari" .... lain lubuak lain ikannyo, lain padang lain pulo balalangnyo. Talantuang dek kanaiak dan talendo dek katurun ...agiah ambo maaf. Wassalam, HM Dt.Marah Bangso (53 th -52 hari) Datuak Andiko Suku Limo Singkek - Sulit Air ----- Original Message ----- From: "Nofend St. Mudo" <nof...@rantaunet. org> To: <rantau...@googlegro ups.com> Sent: Friday, February 05, 2010 9:34 AM Subject: RE: [...@ntau-net] Batagak Penghulu : Uda Tifatul manjadi Datuak. (@ Wisata Budaya) > Da Fitr.. > > Ambo raso bukan Datuak rang Minang (khusus soal namo sesuai subjek diateh) > Tapi Dt urang koto, Kanagarian Guguak-Tabek Sarojo. > > Ambo masih ma akui, satiok kaum diranah minang, kalau masih ado nan berhak > Pasti menginginkan niniak mamak mereka urang nan cadiak, terpandang dll. > Dan tantu kesiapan dari calon tu juo tantunyo.. > > Pangalaman diambo babarapo kali dikampuang.. > Dek niniak mamaknyo urang gadang dan terpandang di nagari, dek lai ado > Nan cocok dan samo jo baliau nan alah alm, mako diangkek kamanakan > Nan ndak jauah2 juo dari baliau sebagai cadiak pandai di nagari. > > Bundo kanduang dan sanak sudaro, tantu menginginkan nan tamat sekolah > Ko jadi panghulu dari pado nan indak tamat sekolah yg hariannyo tiok hari > Pai kaladang, kecuali indak ado lai. > > Dan di Palanta ko, ado adiak baliau namo nan tasabuik di subjek diateh > Mungkin keluarga bisa manjalehkan alasannyo, dan ambo caliak kini, alah > Makonyo balakek an, bukan alun jadi malakek an (yg bisa dijadikan ajang > kampanye, dll.) > > Babeda jo malewakan gala nan indak ado ikatan secara adat yang salamoko > acok > Di otakan di Palanta ko. > > Wassalam. > Nofend. -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe