*Palai Bada*
Jikok jadi Tuan ka pakan
Balikan denai si gulo saka
Jikok tuan salero patah
Cubo makan si palai bada
Urang Rao pai ka Danau
Baok rumpuik si bilang bilang
Jikok tuan indak picayo
Bali sabungkuih baok pulang
Yo palai bada, lamak rasonyo makan baduo
Yo palai bada, lamak rasonyo batambuah juo
Sanak palanta, bugulincam raso parasaan, mode mananti hasil ujian, harok
jo angku dosen, lai ba elok hati, mancogok nilai A di dindiang kampus.
memang mananti karajo nan barek, harok jo cameh baganti-ganti. Bia nak
lengah saketek pangana, pailah malangkah ka pasa darurat di subala
kompleks. hari cerah malakik sanjo, ado bias merah di langik Batam. Nan
pasa alah mulai rami, baganti-ganti urang datang mambali. Sampai di
mungko pasa, tatagak garobak bakso, martabak jo gorengan. Disuok basusun
urang manggaleh sayua, mulai dari sawi sampai kolidi. Lado karitiang jo
lado kuto, langkok sarato jo bumbu dapua. Disabalah kida nanpak tukang
ikan, dari darek diwakili lele, patin jo baluik, kontingen dari lauik di
wakili karapu, udang, jo ambu-ambo. Ditangah-tangah, tasalek saungguak
bada basah, putiah pucek ditimpo ayia. Disinan timbul ide, baa kalau
sore ko dibuek palai bada.
Sakatiko ide batamu, mato mancugan mode alang, mancari sagalo bumbu.
Alah ditangan karambia kukua, lado merah jo saketek lado kutu. Manyarato
daun kinik nan patang eboh di kapik urang di palanta RM, ikuik sato daun
limau. Ndak lupo disemba daun pisang untuak pambungkuik. Sampai di
rumah, di bantang sagalo nan di bali di dapua, di kaluakan sagalo isi
kambuik buruak. Di tumbuak lado jo bawang, garam datang pangasek sajo.
Alah raso gacah-gacah alui, di tunggangkan karambia kukua ka batu
pipisan, basilanteh angan batu lado manumbuak, sahinggo alah satu lado
jo karambia. Lah bapindah bahan dasar ka loyang, dikinca pulo jo bada
basah. Nan bada basah alah dimandikan jo aia asam, asam kapeh
manggulimang manabik raso. Alah bacampua bada jo adonan, di seraikan
racik tapak leman jo daun kunik, sakali lai asam sundai jadi panyiram,
sabalun adonan di bungkuih jo daun.
Dibungkuihlah palai mantah jo daun, alah mananti pamanggangan
tampuruang, baro nan layok-layok lamah. Saciok bungkuih-bungkuih daun
manonggok di ateh baru, lindok-lindok harum tambah kareh, harum nan alah
mulai sajak bahan mantah, apo lai angek baru sato manggiloi. Dek bahan
babungkuih daun, sato pulo mangirim harum, balain kalau di bungkuih jo
aluminium foil. baitu sayaraik mambuek palai bada. Alah di panggang agak
lamo, daun pambungkuih barangkek manjadi masiak, ayia bahan ma-uok ka
langik-langik dapua, baun malantiang ka lubang hiduang.
Indak tahan nasi mananti, sakutiko alah baserai diateh piriang, dek
palai lai kariang, baserai sajo diateh nasi, batimbun bumbu si bada
basah, kini banamo palai bada. Kok rasonyo kadi baco, bialah lagu nan
manyampaikan, pokoknyo sulik maurak selo, alun rila sabalun habih.
**Yo palai bada, lamak rasonyo makan baduo
Yo palai bada, lamak rasonyo batambuah juo
Baitu bana caro seteres di ubek.
Salam
Andiko Sutan Mancayo
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
