Ma elo pukek....lai ado juo kini da ?
Terakhir ambo mancaliak urang ma elo pukek tapi yo di Si Kabau,
sahambuah dari Ayia Bangih bara tahun nan lalu. Lain pulo ukun urang di
pasia ko, kalau sato kito mamukek, dapeklah kito paragiahan ikan, yo
sabana indah iduik di situ.
Ambo sadang mangalai-ngalai kini di mungko rumah, kabiasaan buruak ko
alun ilang lai, ma ambuihan asok timbakau ko. Kok makan yo alah salasai,
tabayang dek ambo, baa pulo komentar uda kalau mancubo masakan dari
lakek tangan ambo. Kalau nan tadi tu, yo 100 % usaho sorang. Bak kecek
uda, karano iko urusan seni, mako banikmati bana ma hunting sagalo bahan
di pasa tradisonal. Kalau di pasa modern mode Mall yo patah salero ambo,
indak bisa ambo menikmati ikatan sosial pasa tradisonal lai doh. Tapi
iko salahnyo pasa tradisional, tingkek kebersihannyo indak berkembang,
sajak gunuang marapi sagadang talua itiak, nan pasa sayua jo ikan ko yo
gacah. Ambo panah malala di tokyo ka pasa tradisionalnyo, yo barasiah
bakilek. Indak banyak petugas kebersihannyo, tapi ternyata nan
batangguang jawab soal kebersihannyo yo urang toko tu sendiri, kalau
nampak kumuah, jatuah sakali dando dari pamarentah nan indak bisa di
sogok bagai. Pai ambo ka pasa ikan, baru jatuah sajo ayia, lansuang di
pel dek pagawainyo. Badampingan jo kadai ikan segar ko, urang manjua
Sake, yo artistik nyo buek kadainyo. Nan botonyo nyo buek dari keramik,
meskipun kito ndak baniek mambali sake, dek botonyo rancak, tabali juo
akhianyo.
Ha..ha..pitih ba kopor gegek nan uda sabuik, nan tabayang dek ambo film
mafia di TV-TV, kalau urang di kampuang dulu mungkin indak ba kopor,
tapi ba puro, sabalik pinggang puronyo...ha..ha..Tapi alun tantu tesis
uda bana lai, karena ambo alun mancubo punyo pitih sa kopor
gegek...ha...ha..ha...
Salam
andiko
[email protected] wrote:
Palai Bada..antahlah, ateh namo urang minang kok ndak tahu jo palai bada
baranti sajo jadi urang minang
Taringek ambo jo lagu Elly Kasim ko nan madendangkan si Palai Bada, pusako
kuliner urang minang nan barado di pasisia pantai
Pepes kecek rang jawa, palai namonyo dek awak, sarupo nan didendangkan Andiko
ko bana caro mambueknyo, mambaconyo tahampe sakali badan diri ko ka maso dulu
bamain lapeh ka pasia jo nelayan kampuang
Kok lah musim pukek si lauk Bada, lah ka jaleh ambo dapek jatah dari juragan
pukek dek sato maelo katiko pukek cikang, batampuang ko karambia tokeang babaok
pulang,
Bacari si daun pisang batu, bajadi mande manggulimangkan sagolo bumbu jo
karambia nan bakukua, sikarambia mudo talampau, gaek alun
Daun di sangai agak salayang bia layua2 tangguang mudah malipeknyo,
dibungkuih bada jo karambia nan babungkuih, disamek ujuang pangka jo lidi
Dipanggang jo baro tampuruang sayuik2 sampai angek baro tampuruang manjilek si
daun pisang, dikipeh juo baro diambok2 tangguang api baro malayok mambaka palai
bada, disinan pulo mako samparono masak si palai bada, dilua ndak anguih bana
nan di tangah lambok kariang tangguang mahawo sagalo bumbu nan mambuek salero
patah tasentak baliak
Lah anguih daun pisang bagian lua, nan daun pisang bagian dalam rancak layuonyo
barambun tando lah masak si palai bada
Dibuka samek ujuang pangka, dikakah daun tabalingkang rancak talatak si palai bada, sabana pas ongkoknyo
Hawo daun kunyik sabana harum tingkah batingkah raso asam jo karambia nan lah
mangariang padek, lauk bada..sabana manih, lauk pukek kecek urang, padeh
manyentak si ubun-ubun, padeh nan mamakuak di kuduak bana oiii sutan mancayo
Ndak ado lai Sutan, sabana barubek badan diri kok lah makan jo samba-samba
buruak pusako bundo, apolai lakek tangan sorang
Iko ndak labiah masalah seni, masalah cinta..pitih buliah sakopor gegek,
sakambuik buruak..sagarobak tundo bisa awak bali apo nan lamak2 di dunia ko
Tapi cinto jo seni kuliner mancubokan lansuang mambueknyo yo alun lai tabali
dek piti sakopor jo sakambuik tu..
Sekali lagi ini sebuah seni, sebuah rasa yang datang dari cinta
Selamat menikmati palai bada hasil lakek tangan sorang Andiko..layangkan hati ingek Uda
di Pekanbaru ko, nan sadang ado masalah jo paruik senek, dek talalu bahampai bana gulai
pucuak ubi jo "hati rimbo" nan kamek padeh baluah pakek :)
Salam Kuliner "life on a plate
Jepe
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
