Dek dikandak an Jepe yo bakaoan juo
Lah tigo hari Apak ko di rumah anaknyo. Baliau ko datang dari Simpang kalilawa,
Lawang Tigo Balai, Kecamatan Matur, tampek saka banyak dibuek urang.
Mujua ndak dapek ditangkok, malang ndak dapek dilapehan, sanjo kapatang
bajalan-jalan lah liau ko di parak ketek di balakang dapua rumah anaknyo ko. Di
siko ado rambutan Binjai, durian, balimbiang tunjuak, batang pisang, cangkeh,
cubadak, naneh, batuang, daun tapak leman, pandan, lado merah, lado kutu, ubi
jala, ubi kayu, ado pulo baruak bakabek di batang paraweh. Dek asik
mancaliak-aliak ase nan tumbuah di sinan tapijak paku bakarek sampai tabuak
tarompa swallow nan dipakai liau ko. Tarompa ko memang lah tipih bana dek lamo
tapakai. Aleh nan putiahnyo pun alah biru saparo karano tandeh dek bapijak i.
Sabananyo ka dicampak an tapi sayang juo karano masih bisa untuak kadi
pakai-pakai mancangkuang di kakuih. Akibatnyo badarah tapak nan kida. Dek hari
lah sanjo baagiah sajo ubek sirah, bisuak kadibaok ka rumah sakik. Malamnyo iyo
mandanyuik, sakik ndak bisa lalok. Sampai-sampai liau ko ndak talok maambiak
aia sumbayang ka tahujud. Jadi tayamumlah baliau.
Kumua-kumua setek jo aia masak.
Pagi-pagi batanyo minantu nan lah siap-siap barangkek karajo. Suliang masuak
babunyi pukua tujuah. Jadi sakurang-kurangnyo jam 6 saparampek harus lah
barangkek. Bendi nan diracaknyo bendi tuo pulo: opel taun 58 warna hitam.
Katiko tu kiro-kiro taun 75.
"Baa pak.. samolah jo ambo pai ka rumah sakik"
"Ee pagi bana baru," keceknyo.
"Pai se lah waang, rumah sakik dakek ka dianta-anta lo den. Kopi, angek juo
baru ko ah"
Memang RS nan di jalan Melur Pakanabaru ko dakek dari rumah di Gang Jati. Ndak
sampai 5 minik bajalan kaki.
"Takantuik den di siko, tadanga ka rumah sakik tu mah," keceknyo manunjuak ka
arah RS sambia manduduik kopi nan lah diaumbuih-ambuihnyo sajak tadi.
"Iyo lah, kalau baitu pai lah ambo dulu."
"Yo.. Pai lah"
"Pokoknyo apak sampai di rumah sakik langsuang malapor."
"Wa aden ndak usah ang aja-aja lo lai," keceknyo gagah.
"Ketek bini ang tu lai, wa aden lah manggaleh babelok ka Tanjuang Pinang,
Dumai, Kiktinggi, Padang, Lipek Kain, kuok, Kampar, Jambi, Bangko," keceknyo
manyarocos.
"Pokoknyo lah hampia sado daerah Sumatera Tengah ko den kacai," keceknyo
basumangek.
"Tau ang galeh den?"
"Aa tu Pak?"
"Barang-barang smokel dari Tanjuang Pinang, den jua ka daerah lain. Jo itu den
gadangkan bini ang ko"
"Aa ndak itulah Pak harilah jam 6 lewat sapuluah, pailah ambo dulu, beko awak
sambuang baliak," solo minantunyo tagak sambia maluruihan sanding sarawanyo nan
agak kusuik dek duduak tadi.
Manjalang suliang makan siang babunyi, si minantu dapek talepon.
"Halo"
".............," antah aa kecek si panalepon.
"Haah! Alun pulang lai?" keceknyo takajuik.
"..............," nampaknyo talepon dari rumah, mungkin dari bininyo.
"Jam bara apak tadi pai?"
"..............,"
"Kinilah ampia jam 12," takato dalam hati. Dicaliaknyo arloji Rado di tangan
suok.
"Jadi lah 4 jam, alun juo Apak pulang"
"..............,,
"Yolah beko Uda ka sinan"
Ruponyo iyo talepon dari bininyo nan sadang cameh, takuik apanyo sasek pulang.
Baitu sarunai mamakiak dipaculah sedan Opel tuo hitam tadi ka RS.
Sangah satu sampai di sinan.
"Alhamdulillah... Apa lai ado juo di sinan ma akuak-akuak dek takantuak,"
tampak dek inyo dari jauh.
"Pak!" Baliau tagalenjek.
"Alun lai?"
"Alun"
"Jadi dari tadi alun taimbau?"
"Alun"
Minantu ko sabana heran, masaklah langang co iko alun juo taimbau, aa lah nan
salah.
"Apak lah mandaftar di loket?"
"Alah!"
"Baa keceknyo," tanyo minantu panasaran.
Wakatu den malapor nyo batanyo:
"Sakik Pak?"
"Iyo," kecek den.
"Nan ma?"
"Nan kida!"
"Naankiiidaaa," nyo ulang kecek den sambia manulih di karatu kuniang.
"Disuruahnyo wakden duduak manunggu"
"Jadi ndak ditanyo nyo gai namo Apak doh"
"Indak"
Pailah minantu ka loket. Urang ndak ado di sinan. Nampaknyo sadang istirahat.
Satalah loket bukak mancogok gadih manih muko barasih babaju putih. Tinggi
semampai, bulu mato lantiak, ramah, balasuang pipik pulo.
"Ada yang bisa saya bantu Pak?"
Ondeh mak suaro pun lembut puloooo.
Sambia marandahan kapalo supayo muncuang pas di lubang kaco, lansuang batanyo:
"Dik, kok Bapak saya belum di panggil-panggil padahal udah dari pagi daftar"
"Siapa namanya Pak?"
"Bapak Djamaris St. Pamenan. Tapi kata beliau tadi namanya ga ditanya"
"Pasti ditanya Pak kalau tidak bagaimana kami memanggilnya."
Sambia mambaliak-baliak karatu kuniang jo jari-jarinyo nan lantiak panjang
basuolah ciek karatu nan alun ado urangnyo.
"Ni ada nama Nankida yang udah dipanggil berulang-ulang orangnya ga ada"
"Coba saya liat dik," ndeh tasenggol pulo jari maniahnyo. Maramang lo si
minantu ko.
"Ma kasih dik!" Kecek minantu mamulangkan karatu tadi.
"Tau ambo tau ambo dima salahe" agak tagalak dalam hati.
Nampaknyo patugas loket batanyo: "Nama?"
Apak mandanga: "Nan ma?"
Makonyo dijawek: "Nan kida"
Ei yai yai...
Wassalam,
ZulTan,
L, 49+, Bogor
Akses email lebih cepat. Yahoo! menyarankan Anda meng-upgrade browser ke
Internet Explorer 8 baru yang dioptimalkan untuk Yahoo! Dapatkan di sini!
http://downloads.yahoo.com/id/internetexplorer
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
