Assalamu'alaikum ww, Iko saketek carito kuliner ringan dek awak indak baitu pandai mambaoan saroman da Jepe jo St Mancayo.
Barawa dari carito da JePe jo pak Saaf satantang Ikan di Lauik nan diantaronyo disabuik an dek da JePe Ikan Karang, mako sasudah jumaik cako di pibaolah anak bini pai mancari gulai ikan karang nangko. Dek sabalun dapek ide ka makan gulai ikan ko lah dipicari kadai nasi nan kecek urang lai pulo lamak, tapi dek nasib ikan Karang nan alah mananti ruponyo kadai nan dimukasuik alah tutuik. Mako sambia mancaliak suok kida dima kolah ka makan, mako takana ado kadai Gulai Ikan Karang nan bisa dituju dalam ukatu dakek. Alah parkir Cigak Baruak nan baragi Itam tu di muko kadai "Mak Ngah" mako lansuang maluncua mancari tampek duduak. Dek mak kadai diagiah piliahan ka makan bajuntai atau marepok karano kaduonyo lai tasadio. Lah diambiak paretongan jo romboangan mako dipiliah nan duduak marepok tapi lai ado meja randahnyo, jadi indak di lantai sen dilatak an sambanyo do. Lah sasuai pintak jo pasan mako nan diimbau alah ditibo nan dijapuik alah datang, mako di meja lah taidang "Gulai Kapalo Ikan Karang" nan salaweh piriang makan langkok jo goreng jariang balacak jo lado mudo pacah-pacah sarato dikinco dek maco teri. Sasudah itu datang pulo goreang patai jo lado sirah nan di lumun-lumun jo ikan pantau, nan tantu indak katinggalan pulo sambalado goreang jo abuih pucuak paranci. Makan nan sakali ko saketek bapakaro karano anak nan no. 2 nyo sangko lai ado ayam ba lado mudo di sinan tapi tanyato indak ado, jadi baganyilah baliau karano ndak lapeh kandak salero. Lah mulo makan bakuampeh balepak jo balepong mamakan kapalo ikan mako dek amaknyo dibujuak-bujuak juo untuak sato makan. Baru lah dicubo gulai kapalo ikan mako lupo kawan nak baganyi nan jadinyo sato batambuah-tambuah pulo. Singkek carito barasiah ikan dalam piriang tandeh jariang jo patai nan manggaduah sarato karupuak daruak nan mandayo sambia di ginyang silado sirah jo pucuak paranci, mako manangih ayam dipiriangnyo dek indak di janguak jo disapo. Lah balepak saiang balimo baranak nan kanai io 65 sajo nan takajuik urang rumah dibueknyo dek makan sabanyak nanko. Jadi ..... baitulah saketek kulinai siangko nan makan agak balabiah dari biaso, sagan pulo awak manyabuik bara tambuah nan dimakan cako. Wassalamu'alaikum ww Batuduang Ameh (43) -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
