Selembar Kenangan 3 By : Rina Permadi
Uniiiiiiiiiiiiiiiiiii.................. heboh Si Upiak kaciak, bakatutuahan hujan turun mambaok lari Si Upiak kaciak dilarian kambiang Upiak nan takuik di kuyuik ujan. Dek badan Upiak nan kiluih di umua Upiak nan baru 6 taun tun si Upiak lah bapacik arek naiak di pungguang kambiang. Dipatauik an No kaki jo tangan di badan kambing ko, lah bak cando cobow sajo mandudu balari kambiang ko manuruni bukik. Nan Abang-abang Upiak sibuk malapehan kabek kambiang nan lain nan sadang digulaoan samantaro tu Uni taripa Upiak lah tapakiak-pakiak antaro cameh, takuik jo tagalak mancaliak si Upiak dilarian kambiang. Mulo no mereka ko sarombongan cowboy eh anak-anak nan manggubaloan kambiang di ateh bukik di balakang rumah. Kambiang si Abang Upiak sambuah, sabaleh ikua sadonyo jo anak-anak no nan baru manateh eh laia 2 ikua, sadang pagaluik bana nan duo ikua tun. Si Upiak nan sato lo pai manggubaloan kambiang tun dek pas abang-abang Upiak pulang sakola, nan Upiak baru TK baruh lakeh pulang. Padohal sabalun tun indak nampak ka hujan bagai doh dek hari lai rancak paneh di sore tu. Tibo-tibo lah galok sajo hari, alun sempat mananggaan kabek kambiang kasadoanno lah bakatutuahan ujan tibo. Awalnyo si Upiak mati karancak an bagaya-gaya mode Juki tukang pacu kudo di Bukik Ambacang nan indak jauah dari rumahnyo. Kambiang nan paliang gadang di cubo-cubo marecak ka pungguang kambiang tun. Diimbau-imbau nyo Uni jo Abangnyo, caliaklah..caliaklah..,' kecek Upiak manggaya. Pas sadang di ateh pungguang kambiang tun tibo ujan labek sahinggo si Upiak dek takuik jatuah nyo pacik arek-arek kambiang tun. Alhamdulillah sampai tibo dibawah bukik dakek labuah jalan ka karumah Upiak, lah sato lo Uni no jo kambiang na lain mairiangi dari balakang. Uni Upiak balari-lari sambia tagalak-galak manenteang tarompa Upiak jo tarompa sorang. Lah sampai di rumah mereka ndak barani lewat pintu muko doh, babelok ka balakang rumah pai ka pintu dapua. Amak si Upiak nan sadang di dapua pai ka balakang mancaliak paja-paja nan baru pulang tun. "Pailah mandi,' kecek Amak ka mereka tun. Pas tibo si Upiak nan lalu dakek Amak. "Deh Piak, baun gau laih Piak,' curiga Amak si Upiak. Inyo marecak kambiang turun dari bukik tadi Mak,' kecek Abang si Upiak. " Di lua duluh tagak,' parentah Amak si upiak. Si Upiak dek lah kuncun kadinginan baujan-ujan sarato takuik jo Amak no patuah sajo manuruik, kalua Upiak ka tapi pintu dapua. Ndak lamo sudah tu Amak Upiak kalua sambia mambaokkan aia angek di dalam baskom gadang. Lah kanai mandian si Upiak dek Amak sambia barandam di dalam baskom jo aia angek. Lah mangancah-ngancah si Upiak di dalam baskom tun. Kambiang nan digubalokan Abang Upiak dulunyo hanyo sikua. Dapek katiko juara mangaji di Khatam kaji di Surau. Tiok taun rato-rato ado nan maagiah hadiah kambiang dari sponsor. Hadiah nan biaso ado katu tu adolah : Kambiang, jam dindiang, kaluang bintang ameh, AlQur'an jo Terjemahan, Kain baju, buku-buku jo alat tulis. Sado nan Khatam kajino dapek hadiah. Dek kambiang nan dapek sikua tun kambiang batiahno, dek Apak Upiak dipalakian kambiang tun jo kambiang nan ado di tampaik Haji Kambiang. Kami manyabuik liau Haji Kambiang bukan baliau tun turunan kambiang tapi liau adolah toke kambiang tukang jua bali kambiang nan pai ka makah untuak bahaji. Dari situ 'baranak-pinak'lah kambiang nan saikua tadi tu sampai sabaleh ikua. Maso tu Amak jo Apak Upiak banyak mamaliharo taranak. Ado itiak sawah nan salalu bakuruang tapi makan no salalu disadiokan salain dadak jo campuran siso dapua, itiak juo suko makan cipuik bacancang jo caciang. Pernah sakali Amak Upiak manggalian caciang untuak anak itiak nan baru bara hari manateh. Anak-anak itiak tun salalu manggadudu maikuik i kama pangkua pai. Indak singajo tapangkua dek Amak Upiak kaki anak itiak ko. Tapi itiak no ndak manangih doh, hanyo tapakiak sajo sabanta, dek Amak itiak ko diubek, kaki itiak dibaluik trus itiak ko disuokkan ubek tetrasiklin sakarek ketek kebetulan Apak si Upiak adolah mantari di kampuang no. Lai sehat-sehat sajo itiak ko sampai agak gadang tangguang. Sasudah agak gadang itiak ko di dabiah dek Amak Upiak dibuek Pangek Itiak Koto Gadang, nan si Upiak paliang cangok makan mincaro itiak nan lah bapangek tun. Sirah talingo no mamakan pangek nan sabana padeh tun. Salain itiak Amak juo mamaliaro ayam, banyak macam ayam nan dipaliaro Amak ko, ado ayam hutan bulu kapeh putiah, ado ayam hutan nan mode ayam kampuang biaso, ado ayam karitiang, ayam kalkun, ayam broiler nan pas ditimbang 5 kilo barekno. Ado lo ayam ayam Bangkok nan jangkuang-jangkuang. Ado ciek ayam jantan Bangkok nan sabana bagak, sia nan mandakek ka inyo di galapua. Si Upiak sabana trauma jo ayam nan sikua ko, takileh sajo si Upiak ko di ujuang laman lansuang nyo kaja dek ayam ko. Indak tantu ojok nan kaditojok dek Si Upiak kalolah nyo tintiang lari dek ayam mangaja si Upiak nan mamakiak-makiak maimbau Amak sambia manangih katakutan. Pernah sampai kanai galapuang si Upiak dek ayam ko sampai mambiru badarah kaki si Upiak kanai galapuang ayam ko. Indak si Upiak sajo korban ayam ko doh, urang tukang cataik meteran listrik juo digalapuang no. Acok dikuruang Amak sajo ayam ko di dalam kandang, herannyo kalo jo Amak ayam nan ciek ko patuah sangaik indak pernah Amak di cotoknyo doh. Sabananyo si Upiak sayang ka ayam-ayam ko, sakiang sayangnyo acok nyo baok ayam ko lalok ka ateh kasua. Ayam ko di baduang trus ditalantangan cando paja lalok. Sahinggo ayam-ayam Upiak alah tabiaso dilalokkan talantang dek Upiak. Pernah kajadian ayam jantan kampuang biaso Amak nan paliang dimanjoan Upiak hilang, lah panek mancari kamalah ayam tun paino. Amakpun ibo mancaliak Upiak kailangan ayam kasayanganno, takana di Amak pai mancari ka Pasa. Duo hari sasudah ayam tun ilang, basobok dek Amak ayam ko dijua urang di pasa bawah Kiktenggi. Amak tanyo ka urang tu dima dapek ayam tun . Urang tun berang ka Amak manga batanyoan dima dapek, memangnyo inyo mancilok? Ditaranganlah dek Amak baso ayam tun adolah ayam kasayangan anaknyo si Upiak. Sadari kaciak ayam ko alah diajaan anaknyo untuak dibaduang jo dilalokkan talantang. Kok ndak picayo molah wak cuboan kecek Amak. Rami urang nan mancaliak jadi no sisalak Amak jo urang panggaleh ayam tun. Katiko ayam tu di bukak kabek no trus ditalatangan dek Amak iyo indak manggalapuang-galapuang kakino ka ateh doh saroman ayam taralah. Urang nan lah rami manonton langsuang mangecek,' iyo mah memang ayam Amak ko mah, biasono ayam ditilantangan saroman tun manyipak-nyipak kakino ka ateh, maa namuah ayam dimantunan. Agiahan lah duh,' kecek urang nan manonton. Si Abang panggaleh indak namuah malapehan baitu sajo ayam nan dijua no tu, antah bara ayam tu dibali no ka urang nan mancilok ayam tun. Sahinggo Mama maajak Abang tu ka kantua polisi sajo, dek awak samo indak bisa nampaknyo disalaian. Akhirnyo Abang tu mangalah sambia mintak ka Amak untuak mambayia sakadar untuak palapehan ayam tu sajo dek inyopun mambali dari urang. Jadih malah kecek Amak, walaupun iko bukan awak nak ka mambali ayam tapi samo-samo bakarilahan diagiah dek Amak urang tu pitih limo ribu dari limo baleh ribu nan inyo mintak. Ayam ko tantu lah sanang hatinyo babaliak baliak ka tuannyo, kami mamaliaronyo sampai tuo. Di muko rumah kami juo ado kolam ketek nan dulunyo dipakai untuak mandi-mandi. Tapi pas aianyo barubah mahijau dek kanai matohari, dilapehanlah ikan ameh dek Amak ka dalam kolam tun. Makannyo sambarang sajo mulai dari rumpuik manjala, rimah roti, kadang nasi. Kato Amak maagiah makan ikan indak buliah banyak-banyak, kalo banyak-banyak ikan bisa mabuak trus mati. Pernah pulo kami mamaliaro lele , dari 200 ikua nan dilapehan tingga sajo 30 ikua untuak ukuran goreng nan tingga, dek ado nan gadang ciek lah kanyang sajo inyo malutok i kawan no. Dari 30 ikua tu tingga 12 ikua nan kian hari kian panjang jo ganas. Samo Mamak si Upiak dipulangan ka Abang ka 12 ikua tun trus dipaliaro sampai panjang no ado nan labiah sameter. Makannyo bangkai puyuah nan baru mati. O iyo, kamipun ado bataranak puyuah baiak untuak dagiang atau taluanyo. Sakitu dulu adidunsanak sadonyo, lembar-lembar kenangan Upiak nan ka -3, lain ukatu disambuang baliak, InsyaAllah. Wassalam Rina, 33, batam -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
