Ondeeh Angku Datuak, Talua, talua ayam ... Sajak ketek di kampuang MakNgah suko talua ayam. Kok lah tadanga ayam bakotat di kandang, MakNgah lah sanang. Sudah ayam tu kalua sangkak, MakNgah lah tibo marangkak. Baambiak talau nan baru kalua tu ciek, taraso angek.
Kalua kandang, ujuang talua di ditokokan saketek mambuek lubang di karabang, dicarak sambia tagak. Ondeh alhamdulillah sodapnyo tibo di rakuangan pambarian Allah ... Takana lo katu ketek, umua ampek, tahun 1939 masih Maso Bulando, dibawo amak ka pasa Simpang Biaro. Mancaliak talua dijua urang, lah mancongkong sajo anak ketek tu surang mancaliak talua dihadokan urang. Diambiaknyo ciek, dilubanginyo seketek, sambia maongong dicaraknyo talua tu sampai kosong, sampai tingga karabang diadokan urang. Urang banyak tacongang-congang, galak-galak mancaliak parangai anak ketek mancongkong surang. Mancaliak urang galak, anak ketek tu pun galak. Urang galak, awak pun galak, indak tahu nan digalakan urang awak. Mungkin katu tu baru pandai Galak Nabi kiyoh ... :) Sudah tu sajak mudo, sajak muloi jadi Guru di ST-2 Jalan Lambau Bukittinggi tahun 1955, MakNgah suko kopi jo talua. Tibo di Rantau Jauah, puluhan tahun kamudian, lah batamu jo alat baru, blender (MakNgah sabuikan "balendeh")namonyo. Tiok pagi, sambia maabuih aia, diisi blender jo kopi, jo gulo, jo talua ciek. Sudah aia manggalagak, blender dionkan. Talua, gulo jo kopi lah basatu baruwok kanai balendeh. Sudah tu dituang jo aia angek manggalagak. Indak tananti dingin doh, lah habih basasok saparampek. Good Morning Alam Semesta ... Tapi, kini sajak barapo tahun ka bulakang ko, sacaro relatif MakNgah buliah dikatokan indak makan talua lai. Kacuali sakali-sakali mancilok kok taragak bana. Jikok dietong-etong barapo biji satahun buliah dikatoan indak makan talua doh namonyo. Baa mangko mantuun? Kolestoral tinggi! Ka gantinyo, kini di Rantau MakNgah ado dijua urang putiah talua sajo. Lah jadi cairan dalam kotak karateh. Itulah nan ditaruah didalam kulkas, itulah ka ganti talua bulek kok taragak talua. Kopi talua pun dibuek jo cairan putiah talua tu. Rasonyo pun lai saraso talua juo. Szalam, --MakNgah Sjamsir Sjarif Di Tapi Riak nan Badabua Santa Kuruih, Kalpornia --- In [email protected], Datuak Arifz <arif_...@...> wrote: > > Assallamualaikum, > > Talua, kayo protein nan bagizi tinggi, murah dan mudah mancarinyo.. > banyak caro untuak manikmati "talua' salain talua abuh :) > > Teh Talua, > Antah darimano asanyo 'minuman teh talua' taraso mewah muloi caro > mambueknyo, penyajian dan caro maminum nyo 'punyo gaya > tersendiri...konon mangocok kuniang talua itiak+ gulo ko punyo teknik > juo, lah samparono kental sahinggo tangkai lidi pangocok ko sulik > untuak diputa..lah tajarang aia mangulagak dimasuak an teh bendera nan > kamek..dituang kagaleh katiko teh bacikaram teh sadang > mangulagak..dibuek duo tigo kali tuyong, bia samparono lengek lenggek > nyo, diambiak tadah ka aleh galeh ko, di racik limau kapeh salayang, > di kisai jo panile salayok untuak paharum n "topping' nyo, disiapkan > sagaleh aia putiah, nan dicilamkan limau kapeh sasaik,..muloi kito > cubo minum teh talua ko jo mahiruik ruok nan malonjang ko, dikacau jo > sendok kaciak...lah agak dingin di hidu hudi kinikmatan > baunyo..didaguik daguik duo tigo hiruik....lah sampai hiruik nan > terakhir di piciangan mato saketek...lansuang disemba limau kapeh > sasaik, dipaluik an ka muncuang, pailang raso anyia nan tingga di > bibia, didaguik daguik aia putiah tigo hiruik...alhamdulillah lah > salasai 'upacara' minum teh talua he he... > mungkin iklan penyajian dan caro minum teh talua ko paralu kito buek > untuak salah satu 'trade mark' kuliner budaya minang nan indak tasuo > di nagari lain :) > > Goreng Talua Barendo, > biasonyo talua ayam atau talua itiak nan baru kalua dari ikua dari > itiak/ayam, kalau nan bataranak ayam/itiak lah biaso 'mancukia' > marosok talua ka ayam/itiak nan lah dicakau, nyalakan kompor, siapkan > minyak goreng +bumbu, Talua 'baru' dipacah ampek buah, dikinco jo > kucai dibari garam jo lado giliang ba bawang putiah balokok > bairih,dicampua jo irisan bawang merah dibari tapuang salayang, > digoreng jominyak mangalagak, langsuang ditokok/tutup supayo 'talua > tacetak bulek'...lah agak kuniang, samparono rendonyo, talua diangkek, > ditirihkan, disalin ka pinggan nan ba aleh tisu untuak manyerap minyak > nyo.. talua siap di santap,..matikan kompor.. > > Talua Pangek Bada Paweh, > dikaluakan 'talua' bada, dibarasiahan paruik bada ko...lah banyaka > talua takumpua, dipodok an talua ko sadonyo kaparuik bada, disamek jo > sambilu...untuak bumbo dan mamasak 'pangek' ko saroman jo nan > taralah, lah biaso di uleh di lapau ko :) > > Talua Saparo Masak, > ..tigo talua ayam kampuang nan lah dibasuah, disiram jo aia > mangalagak, di anok an sabanta duo banta..di pacah talua jo sendok > kacin, disalin ka galeh ketek, dikinco jo garam dibari marica salayang > di siram snek jo kicap asin....mnnnn talua saparo masak...nan > mambangkik 'tanago' kalau tabanyak maricanyo..bisa juo tabik paluah > sasudah malahap talua ko :) > > Randang Talua, Talua Katuang, Talua ikan kod, ...dan kisah "Talua" nan > lain mungkin dapek juo kito tambah kan dimaso nan katibo, insya Allah, > > Wassallam, > AZDtRA, baliakpapan -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
