Assalamu'alaikum wr. wb. Maaf, manyalo pulo saketek, karano kebetulan waktu ketek dulu ambo suko pulo ba inai ko... :) ,
Wakatu ketek-ketek dulu, ambo rajin bana manyamaikan bijo inai ko di halaman. Kadang lah panuah se tumbuah bungo jo batang inai tu di muko rumah, sabab tanahpun subur. Kalau luko se kuku kaki atau kuku tangan agak saketek, kato ibu atau nenek, inai kan lah kuku tu, supayo capek sanang. Kuku nan di inai labiah kuat dan ndak gampang patah, sadangkan ujuang jari juo haluih dibueknyo. Saingek ambo waktu ketek-ketek acok ba inai dulu, makin tuo daun inai nan ka ditumbuak, makin hitam daun tumbuaknyo, dan makin pakek kuning ka merahan pulo lakeknyo di kuku. Jadi kalau lah ka ba inai, ambo sangajo memetik daun inai nan lah agak tuo. Inai nan tuo bisa tahan di kuku sampai sakitar 2 bulan, atau sampai kuku nan kanai inai tu lah abih sajo dek ba potong karano kuku lah panjang. :) Manuruik nenek-nenek dahulu, inai tu akan lakek rancak di kuku, kalau dilakekkan tangah malam ka lalok. (Mungkin supayo ndak taganggu lai kami ka sumbahyang, sabab kami alah sudah sumbahyang Isya... :) ). Malakekkan inai di kuku rancaknyo juo dalam keadaan tatutuik supayo gatah inai ndak capek kariang, sahinggo proses peresapannyo berjalan baik. Jadi dahulu tu sasudah inai nan lah batumbuak atau bagiliang tu dilakekkan ka kuku, kuku langsung dibungkuih jo daun pisang, mirip mambuek lapek.. Lalu dikabek, mangabeknyo indak buliah pulo dek urang tuo jo kajai / karet doh, sabab takuik terlalu ketat sahinggo peredaran darah jadi taganggu, jadi bakabeknyo jo tali dari daun palapah pisang tu pulo. Kalau ba inai samo-samo jo kawan manjalang ka lalok tu, kami saling mambantu mangabekkan tangan kawan nan lah babungkuih jo daun pisang tu. Kalau indak, cukuik mintak tolong ka nenek atau ka ibu. Jago lalok, sabalun maambiak uluak ka sumbahyang subuah, bungkuih jari tu di bukak, dan nampaklah kuku tangan jo kuku kaki nan lah kuning rancak... :) Tapi itu ba inai sahari-hari. Kalau 'malam ba inai' tantu prosesinyo balain pulo .. :) Salam, Rita Lukman - - - takana pengalaman lamo pulo... :) ---------------------------------- Pada 23 Juni 2010 21:19, sjamsir_sjarif <[email protected]> menulis: > Oh, di sinan tasuruakno kato Inai Itam tu mah yo? > > Satantangan Bareh Kunyik, dahulu nan takana ado lagu P.Ramlee nan rasono > ado kato-kato "disiram si air mawar" dan "ditabur beras kunyit". Lupo > lirikno. Amb alun panah mangalami upacara lain jo Bareh Kunik ko. > > Tapi, ambo alah mangalami pribadi dilakukan ka ambo wakatu sampai di Natal > bulan Agustus 1945. Kami baduo jo kawsn ambo (Ridwan Asky,anakMedan Aceh) > disambuik Keluarga di Natal dengan upacara manabuakan "bareh kunyik" ko. > Kami baduo duduak di tampek terhormat, urang kampuang nan hadir diateh rumah > datang ka kami surang-surang baganti-ganti manyiramkan aia mawar dan beras > kunyit tu ka kapalo kami dan badan kami. Ambo tacangang-cangang, > tamanuang-manuang, dipangakan urang lah awak ko eh? MUngkin juo dek awak > masih panek dan tapana-pana sasudah palayaran jauah dan barek tu. > > Rupono upacara tu manyambuik kami jo duo tema: > > 1. Karano kami balayia dalam kesengsaraan pelayaran dari Aia Bangih ka > Natal. Seharusno jo cuaca elok, palayaran kami cuma akan makan wakatu > salapan jam jo parahu ketek tu. Tapi, kami dilando badai antaro hiduik jo > mati sahinggo kami sampai di Natal limo hari jadino. Sampan kami indak > taruih ka Natal doh. Kami manyubrang dari Pulau Tamang ka Batahan di daratan > dan bajalan kaki siang malam ka Natal dikawal urang rundo. Mandanga > pangalaman kami tu, ruopono acara tu dilkukan untuak "mambangkikkan aruah" > kami nan lah taganggu dalam pangalaman palayaran barek tu. > > 2. Nenek dari Ridwan Asky kawan ambo ko rupono Urang Natal nan indak > pulang-pulang sajal pai ka Aceh maso gadihno dahulu. Kini tibo-tibo cucuno > sampai di Kampuang di tengah-tengah keluarga di Natal. Urang Kampuang > basyukur sakali karano amakno pun alun panah ka Natal, kini cucuno tibo di > tangah-tangah mereka. Jadi upacara beras kunyik jo air mawar ko marupokan > penyambutan kembali si Anak Hilang nan disaratokan pulo jo pangalaman barek > kami dihantam badai dalam palayaran. > > Salam, > --MakNgah > Sjamsir Sjarif > Takana pangalaman lamo... -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
