Assalamualaikum ww Tabasuik galak ambo mambaco postingan mamak Abraham ko, indak salah kalau Wisran Hadi ko dimasukkan sabagai penulis beken Sumbar masa kini
Soal kunci mangunci ko takana lo ambo sabuah istilah mirip2 poliandri atau manduplikatkan anak kunci ko, kok indak salah namonyo "Salome alias Satu Lobang Rame2" Lain pulo istilah lapangan, ado pulo namonyo "master key" ciek gembok atau kunci kuro2 sangajo dari pabrikan dibuek sapuluah buah anak kunci, hebatnyo anak kunci ko indak bisa diduplikatkan dek tukang kunci kaki limo tu doh, salain bahannyo khusus dan format geriginyo baitu pulo sahingga indak mungkin di akai dek tukang kunci kaki limo. master key ko diberikan kepada personil2 tertentu yang sudah diberi otoritas untuk membuka induak kunci atau gembok master key tu maklum fasilitas nan bagembok tersebut memang harus dalam keadaan terkunci 24 jam Unauthorized Personel Do Not Enter Ado juo Mangkutak lain nan kama pai tagantuang di cawek pinggangnyo "Key Back" sebuah alat pengantung kunci apa bila ditarik maka rantainya akan tertarik keluar hingga lebih setengah meter namun bila dilepas rantai tersebut otomatis memendek tergulung kedalam induknya sang gantungan nan banamo key back tu karano dilengkapi fasilitas kekuatan per dalamnya Dipinggang Mangkutak nan baru naiak jabatan sabagai Head Mecanic (montir kepala) ko tagantuang key back dengan sarenjeng anak kunci sajak anak kunci fence (paga), kunci kantua, kunci lamari kantua, kunci gudang, kunci toolbox, kunci lamari basi di shop dan banyak lain kunci2 nan indak jaleh dek awak untuak apo Kunci sarenjeng dipinggang ko merupakan stempel betapa pentingnya posisi Mangkutak ditampek karajonyo bahkan indak saketek kawan2 sa angkatan baiak nan samo2 alumni STM Padang Gamuak Bukiktenggi maupun STM Muhammadiyah Pakanbaru, baiak nan sa department maupun lain department, sadonyo mamandang salut bacampua bingik maklum Mangkutak kan baru naiak pangkek dek jabatannyo itu Kama pai kunci sarenjeng tu indak pernah tingga bahkan kutiko cuti pulang kampuang kunci sarenjeng tu tetap setia dipinggang Mangkutak, Mangkutak bangga dengan prestasinyo tu, dengan berpenampilan begitu tantu beko abak jo mamak dikampuang akan batanyo "kunci aa tu kutak" dan tentu saja Mangkutak akan sangat senang hati bercerita panjang lebar Apo pulo lah nan tajadi kok basirobok Mangkutak Juru Kunci Ampek Gunuang Marapi, Singgalang, Sago jo Talang tu jo Mangkutak nan dari Duri tu, tantu ba-ruok2 caritonyo wasalam abp58 Pada 29 Oktober 2010 08.05, Abraham Ilyas <[email protected]> menulis: > Ambo copaskan aktivitas Perjukun dari > http://nagari.or.id/?moda=wisran&no=121 > > Telah dibaca oleh: 544 orang.Silaturahmi Juru Kunci Dikarang oleh : Wisran > Hadi > > Sajak baliak dari manghadiri acara silaturrahmi juru kunci gunuang-gunuang > barapi seluruh kepulauan nusantara ko, lah barubah bana gaya Mangkutak kini. > Kama pai, di pinggang Mangkutak bagantuangan babagai kunci, labiah banyak > pulo lai dari kunci garin musajik jamik. > Tiok malangkah, kunci samo kunci balago-lago, babunyi-bunyi roman > giriang-giriang perak anak-anak ketek mulo pandai bajalan. > > Biasonyo Mangkutak nan pakai kupiah itam, manyandang kain saruang puda, > kini lah baganti jo deta kain itam bamaniak-maniak, basarawa itam lapang > senteang kaki, batirawang tapinyo jo banang ameh. > Bajunyo saroman baju pendekar pilem Cino, atau baju-baju pandeka-pandeka > dari Goa Hantu. > Pokoknyo, satiok inyo lalu di muko lapau atau musajik, urang taruih se > malengong ka inyo. Tacangang. > > “Mang. Baa mangko co iko bana waang kini. Ado nan salah samek ndak, mako > barubah gaya waang saratuih sapuluah persen?” tanyo Sabai sambia galak > bagumam mancaliak gaya adiaknyo tu. > > “Waden baru pulang dari acara silaturahmi juru kunci gunuang-gunuang Marapi > saluruah Nusantara. Jadi, memang saroman ikolah pakaian kami sebagai juru > kunci,” jawek Mangkutak. > > “Waang jadi juru kunci? Nomor tigo? Nomor pincik? Bilo waang batandiang? > Apo nan dipatandiangan? Baa mangko dapek jadi juru kunci waang?” tanyo Sabai > mangkatutuih. > > “Waden ko kan urang Minang ciak. Di Indonesia, memang urang Minang ko kini > jadi juru kunci. Urang nan taruih se tagak di nomor pincik. Waden baitu > pulo,” jawek Mangkutak. > > “Saudagar waang? Urang manggaleh waang? Olahragawan waang? Mako babuek bana > acara silaturrahminyo?” tanyo Sabai. > > “Ciak, juru kunci gunuang-gunuang barapi tu mukasuiknyo adolah urang nan > bakuaso, urang nan punyo wewenang mambukak pintu gunung marapi. Kalau indak > ado juru kunci, mungkin tiok sabanta se gunuang marapi tu muntah-muntah, > indak dapek dikandalikan. Caliak dek aciak kunci-kunci den ko ha! Iko kunci > paganyo, iko kunci pintu masuak, iko kunci masuak ka ruang tangah, iko kunci > masuak ka dapua, iko kunci masuak ka biliak ketek, iko kunci pintu kalua, > iko kunci naiak ka tingkek duo, iko ka tingkek tigo. Iko kunci pintu > balakang. Ilang se ciek kunci tu, bisa-bisa gawat saluruah urang nan tingga > di salingka gunuang tu,” kato Mangkutak sambia mambukak kunci-kuncinyo tu > dari pinggangnyo. > > “Jadi, apo tu nan dipersoalkan dek juru-juru kunci tu, mako babuek bana > acara silaturrahminyo? Saroman silaturahmi saudagar-saudagar pulo, ndak?” > tanyo Sabai. > > “O, banyak persoalan nan harus segera diatasi. > Kami juo mambuek SOTK bagai. > Mambuek RPJM bagai. MoU-MoU bagai.Pergumai-pergumai bagai,” jawek > Mangkutak. > > “Pergumai? Apo tu?” tanyo Sabai. > “Peraturan juru kunci gunuang marapi se Indonesia,” jawek Mangkutak. > > “Tapi nan penting, kami saluruah juru kunci alah mambuek kebulatan tekad,” > jawek Mangkutak. > “Ha, kebulatan tekad pulo bagai? Roman partai politik tu? Ka sato pilkada > pulo jurujuru kunci tu? Sia tokoh alternatifnyo?” solo Sabai. > > “Kok sato bana kami pilkada, ciak, indak juo ka manang doh. Sabab kami kan > juru kunci. Di ma talatak kami tatap jadi urang nomor tigo. Nomor pincik,” > jawek Mangkutak. > “Jadi, untuak apo tu kabulatan tekad tu?” tanyo Sabai. > > “Samacam sumpah pemuda lo, ciak. Sumpahnyo roman ko ha. Partamo, saluruah > juru kunci indak buliah manjadi urang nomor duo, apolai untuk manjadi urang > nomor satu. Juru kunci harus tatap posisinya sebagai urang nomor pincik,” > kato Mangkutak. > > “*Roman nasib urang Minang kini mah,*” solo si Sabai. > > “Kaduo, Saluruah juru kunci harus mamasuak an kunci ka lubang kunci, jaan > ka lubang-lubang lain. Katigo, Jaan maninggakan kunci di lubang kunci. Kunci > musti dicabuik kalau lah sudah dimasuakan.” > > “Roman anggota-anggota DPR nan tatangkok basah tu mah ndak Mang,” solo si > Sabai. > > “Kaampek, Jaan mambuek duplikat kunci duo atau tigo. Mukasuiknyo, > induak-induak kunci jaan di-poliandri-an pulo, kunci banyak lubangnyo ciek,” > kato Mangkutak. > > “Indak buliah balaki banyak, baitu kan?” tanyo Sabai. > “Kalimo, pertahankan kunci sampa titik darah penghabisan. Kalau darah > habih, mintak ka PMI, tambah darah. Indak buliah dicampua-campua antaro > darah juru kunci jo darah juru mudi,” jawek Mangkutak manarangkan. > > “O, baitu. Nan waang sandiri Mang. Juru kunci gunuang apo?” tanyo Sabai. > > “O, waden juru kunci untuak ampek gunuang! Gunuang Marapi, gunuang > Singgalang, gunuang Sago, gunuang Talang. Barek tugas den mah ciak,” jawek > Mangkutak. > > “Gunuangnyo ampek kuncinyo ciek, baitu?” tanyo Sabai. > “Takana dek Ai, lalu nan manjadi juru kunci gunuang Panggilun sia Mang?” > tanyo Sabai. > > “Aciak bagarah juo baru lai. Juru kunci gunuang Panggilun tu Walikota > Padang molah,” jawek Mangkutak. > (WH) dari http://nagari.or.id/?moda=wisran&no=121 > > -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
