Assalamualaikum Wr Wb,
Dunsanak komunitas r...@ntau-net nan saakidah dan sacito-cito.
Paliang tidak, dalam sakijaok alah anam urang nan mangomentari subject di ateh
basarato pangalaman dan ditambah saketek ruok ini itunyo.
Rancak bana, tu.
Paliang tidak mambuktikan awak lai paduli bake manusia sakitar awak nan
kabatulan banasib indak sarupo jo awak. Alhamdulillah awak lai bisa makan tigo
kali sahari dan bisa refreshing ini itu untuak mampalamak raso hiduik di ateh
dunia nan fana. Sakali lai, Alhamdulillah.
Pangalaman ambo limo baleh tahun sabagai aktivis dakwah di tampaik ambo makan
gaji salamo ko, sabananyo sangaik banyak anak manusia nan baruntuang di ateh
bumi ko nan lai paduli ka anak manusia sakitarnyo, untuak mambagikan razaki nan
wanyo tarimo dari Allah SWT. Namun, banyak pulo nan indak mangarati atau indak
panah amuah mangarati (mukasuik ambo : baraja ka bake urang nan tau, misalnyo
Ustadz dakek rumah atau acok-acok mangikuti pangajian dalam satiok kasempatan
tarikan hangok awak di rumah (ukatu subuah via TV atau radio), atau sapanjang
jalanan manjalang awak tibo ka tampek parkir di kantua, atau manyempatkan
mamasang earphone di talingo kutiko awak ka tampek karajo/ manggaleh naiak
kendaraan umum, dllsb.
Karano 'panyakik ambo' salamoko kalau alah manulih (apo sajo mediumnyo)kadang
acok lupo tagak, mako ambo tulih sistem poin sajo, yaitu :
1)Ijan bapikie duo kali kutiko Dunsanakmbo baniaik ka babuek baiek ka anak
manusia sakitar awak. Baitu takana, dan pitih ado di saku/ dompek/ dash board
capeklah barikan bake urang nan mamintak sidakah ka Sanak. (Ijan dipikia atau
dietong pulo untuang ruginya, bahaso nan mamintak ka sanak tu pengemis palasu
atau urang nan purak-purak miskin. Sarahkan soal panipuan wanyo ko bake Allah
SWT nan Maha Kuaso dan Maha Panyayang). Nan jaleh, sabagai urang nan baiman,
awaklah mambarikan sidakah/ infak sacaro ikhlas. (Allah SWT ka tahu juo, apokoh
Sanak tu mambarinyo RIYA atau sabana LILLAHITA ALA).
2)Patrikanlah di kalbu Dunsanak kasadonyo, bahaso ZAKAT HARATO (upah, gaji,
honor, manang proyek, "dapek durian runtuah", dll) baitu sanak dapek,
langsuanglah kaluakan sakutiko tu juo 2,5 % dari jumlah nan Sanak tarimo.
Ikhlaskanlah. Dan yakinlah sayakinnyo Sanak, bahaso INDAK ADO URANG NAN JATUAH
MULARAIK KARANO ACOK MAMBARIKAN SIDAKAH DARI SAKU ATAU DOMPETNYO nan kadangkalo
wanyo sandiri juo pas-pasan isinyo.
3)Bedokanlah pangaratian antaro KEWAJIBAN SANAK SADONYO dengan TUGEH RUTIN
SANAK
NAN SABANANYO.
Kalau ado adiak kanduang atau induak ayah kanduang nan miskin, bakakurangan di
bumi parantuan ko atau di kampuang halaman awak nun ribuan KM dari Sanak barado
sadang mangaih razaki, IKO ADOLAH TUGEH RUTIN SANAK --kalau ado razaki nan agak
balabiah-- untuk mambarinyo pitih. Ijan "dicampuakan pulo antaro cirik jo aie
kasungai". Mukasuik ambo, banyak ambo mancaliek dan mandanga Dunsanak awak nan
baugamo Islam samanjak inyo lahie, maanggap PITIH NAN DIBARIKANNYO BAKE URANG
GAEKNYO (mother & father) NAN MISKIN MISALNYO, dianggapnyo SABAGAI ZAKAT. Baitu
pulo nan lain, panah ambo maliek & mandanga Dunsanak awak nan tingga di daerah
elite, nan alah mulai hiduik "lu di lu, gue di gue" maanggap pitih nan
dibarikannyo bake adiak kanduangnyo DIANGGAP SABAGI ZAKAT. Salah gadang tu
Sanak.....!
4)Untuak mambari zakat tu ado "aturan mainnyo" di Islam. Ado dalapan tampek nan
buliah awak pakai untuak manyalurkan zakat. Manyangkuik dunsanak dakek nan
kanduang, adolah tugeh awak sandiri untuak rutin mambari wanyo pitih, sakironyo
ado razaki awak balabiah.
5)Manyangkuik anak yatim atau anak piatu atau anak yatim-piatu, ADOLAH
KAWAJIBAN
AWAK KAUM MUSLIMIN UTUAK MANYANYANTUNINYO SATIOK SAAIK. Indak ado tu istilah
manunggu momen nan seremonial bagai. Misalnyo, nan lagi ngetren balakanganko
ambo liek, ditunggu tanggal 10 Muharram baru wanyo mampaliekan kapaduliannyo
bake anak yatim/piatu/ yatim-piatu. Iko adolah pamahaman agamo nan salah Sanak.
Ubahlah panyakik "kebodohan muslim karano maleh batanyo dan maleh mambaco" ko
dari diri awak kasadonyo.
6)Dalam soal dakwah bil hal ko, memang baru niaik sajo alah ditulih dek Allah
SWT (malalui malaikaik Rakid & Atid) bahaso ado "Si Padang" sabanta lai ka
mangaluakan pitih dari saku/dompetnyo. Tapi, sabana lamak dan nikmat rasonyo
kalau basidakah itu alah manjadi aktivitas rutin dalam satiok tarikan hangok
nan
Sanak lakukan.
7)Yakinlah syakin-yakinnyo, untuak sangko ka ateh, bahaso indak ado doh urang
nan acok mangaruak pitih dari saku/dompetnya jatuah miskin manjadi galandangan.
Indak adoh tu doh...! Bahkan kalau Sanakmbo picayo bake Kekuasaan Allah SWT,
samakin acok Sanak mambari sidakah/ infak dan zakat ka urang nan mambutuahkan,
samakin tanang,lapang dan sanang sajo rasonyo hiduik awak tu. Padohal, awak di
bumi parantauan ko (atau di kampuang halaman) razaki pun baagak-an. Indak punyo
simpanan bamiliaran rupiah di bank.
8)Ta akhie, ijan sampai tajadi Allah SWT maingekkan Sanak jo Raso Kasiah
Sayangnyo barupo : otopribadi Sanak tabrakan di jalan tol sahinggo paralu
dibaok ka bengke nan bajuta-juta upah mampaelokannyo; laptop awak nan canggih
nan dilatakkan di jok balakang oto awak, tibo-tibo sajo hilang di tampaik
parkir
karano "dipinjam" Dunsanak awak nan mambutuahannyo; atau tangah malam nan
laruik, rumah awak dimasuak-i "tamu nan indak diundang" kamudian maambiak hak
urang miskin nan beko ka beko juo Sanak kaluakan (akhienyo lupo...!)...
kamudian
baru awak mangaluakan SIDAKAH, INFAK ATAU ZAKAT DARI SAKU/DOMPET AWAK......!!!!
Astaghfirullah al azim.
Allahu Akbar.
Maaf, sabaleh jo kapalo kalau gaya bahaso si m.m ko, (sarupo biaso) banyak nan
mambuek talingo Sanak merah, atau banyak pulo nan maiyokan.... kamudian
langsuang malasanakannyo dalam kasempatan partamo.
Ketahuilah Sanak, dalam soal ibadah atau (katokanlah) dakwah bil hal ko, nan
diparalukan ADOLAH BUKTI NYATO, bukan teori atau ruok di palanta nan tanyato
indak ado nyatonyo.
Subhanallah.
Mudah-2an komunitas r...@ntau-net nan saakidah dan sacito-cito mandapek Hidayah
&
Hinayah-Nyo sahabih mambaco PASAN JUMAIK PAGI DARI Si m.m ko. Amin Ya Rabbal
Aalamin...
Salam horomaik & sayang bake saluruah "Si Padang" di bumi nan fana ko.
mm***
lk-2; >50 th; Bks
Suku : Koto Datuak Tumangguang
Gala : Sutan Rangkayo Kaciek
________________________________
--
.
* Posting yg berasal dari Palanta RantauNet, dipublikasikan di tempat lain
wajib mencantumkan sumber: ~dari Palanta r...@ntaunet
http://groups.google.com/group/RantauNet/~
* Isi email, menjadi tanggung jawab pengirim email.
===========================================================
UNTUK DIPERHATIKAN, melanggar akan dimoderasi:
- DILARANG:
1. E-mail besar dari 200KB;
2. E-mail attachment, tawarkan di sini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi disetiap posting
- Hapus footer & seluruh bagian tdk perlu dlm melakukan reply
- Untuk topik/subjek baru buat email baru, tdk mereply email lama & mengganti
subjeknya.
===========================================================
Berhenti, bergabung kembali, mengubah konfigurasi/setting keanggotaan di:
http://groups.google.com/group/RantauNet/subscribe.
