Ota Kusie Bendi, Haluan Minggui 24-04-11 MEDALI KUSIE BENDI Oleh: Wisran Hadi Sajak datuak-datuak jo pangulu di Piaman nan dilantik manjadi pengurus LKAAM lah ilie mudiak manyandang medali di lihie masiang-masiang roman rombongan kabau sirah putuih tali kalawan, Muncak indak namuah katinggalan. Inyo kini mamakai medali pulo, walau karajonyo kusie bendi. “Kamanakan baraja kamamak, mamak barajo ka pangulu. Kalau pangulu lah mamakai medali, nan waden tantu harus pulo pakai medali. Itu namonyo maniru manaladan apo nan dipabuek dek mamak,” kato Muncak kutiko Mas Sam batanyo, lah sajak bilo se kusie bendi manggantuangan medali di lihienyo. “Dalam dunia perbendian dan perkudaan, nan pakai medali tu di dadonyo biasonyo memang kudo. Itu bagian nan paliang manonjol dari pakaian kudo salain jambul kapalonyo. Tapi dalam dunia peradatan dan persenewenan budaya, nan pakai medali tu pangulu. Sajak bilo tu? Jaweknyo, sajak LKAAM badiri di Minangkabau ko,” kato Muncak stil yakin. “Yang diberi medali biasanya kan olahragawan. Ada medali emas, medali perak atau medali perunggu. Nah, medali yang Muncak pakai sekarang medali apa? Emas? Perak? Perunggu?” tanyo Mas Sam polos. “Ma jaleh di den. Pangulu pakai medali, waden pakai medali pulo. Sabab mako baitu, dek karano sebagai kamanakan waden musti saparentah mamak,” jawek Muncak. Mas Sam haniang tujuh minik. “Mas Sam jaan bagarah juo lai,” lanjuik Muncak lah sampai di minik ka salapan. “Memang banyak macam medali. Banyak tingkatan medali. Sabanta lai, akan kalua pulo medali untuk pangulu tingkek satu, medali untuk pangulu tingkek duo, medali untuak pangulu tingkek tigo. Bajanjang naiak batanggo turun. Baitu adat nan kewi. Indak lakang dek paneh indak lapuak dek ujan,” jawek Muncak. “Kalau begitu, medali itu begitu penting dalam adat. Muncak, tolong terangkan pada saya. Mana yang lebih mulia, mengurus anak kemenakan atau memakai medali ke sana ke mari pada setiap upacara?” tanyo Mas Sam. “Kini ko Mas Sam, pangulu tu lah tabagi duo. Partamo pangulu ayam kampuang. Artinyo pangulu nan bakureh surang sambia maurus anak kamanakan supayo indak dimakan musang. Kaduo pangulu ayam broiler. Aratinyo pangulu nan suko diagiah makan, banyak vitamin, gapuak, ranggahnyo rancak, bulunyo barasiah, karajonyo cuma bakaliaran di dalam kandang nan dibuek an dek pengusaha ayam untuak batalua-talua sajo atau untuak dagiang-dagiangnyo nan diarok urang nan mamaliharo,” kato Muncak. “Jadi, medali yang dipakai pengulu pertanda apa?” tanyo Muncak liak. “Samakin banyak nan digantuangan pangulu di bajunyo, samakin tinggi gengsi pangulu. Semakin tinggi posisi tawarnyo. Tarutamo untuak pamilu nan kadatang,” kato Muncak. “Apa benar baju pangulu juga dihiasi oleh pita empat warna; merah, kuning, hitam, putih di pinggir bajunya?” tanyo Mas Sam. “Eyayai, Mas Sam. Dulu urang Minang ko indak ado pakai marawa bawarna-warna doh. Akan tetapi, manuruik sejarah marawa, marawa tu baru ado sajak LKAAM badiri. Tigo warnanyo. Kini sajak LKAAM tu lah jadi LKAAM Plus, lah batambah pulo warna ciek lai. Putiah,” kato Muncak. “Kalau nanti ganti pengurus lagi, berarti ditambah lagi dong warna marawanya?” tanyo Mas Sam. “Indak jadi persoalan. Labiah rancak datuk-datuktu sibuk dek marawa, medali, saluak, tungkek daripado manyeso anak kamanakannyo di kampuang,” kato Muncak. *** Sent from my BlackBerry® powered by Sinyal Kuat INDOSAT -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
