MARAWA KINI LAH AMPEK WARNA By Wisran Hadi
Kabagalau, Lembaran STRES Padang Ekspres Minggu 24-04-11 MARAWA KINI LAH AMPEK WARNA Kasudahannyo, Mangkutak Alam adiak dek Sabai Nan Aluih berhasil juo dilewakan galanyo manjadi datuak dengan gala Datuk Kacang Diabuih Ciek, dek karano Mangkutak alun ado kamanakannyo lai, inyo sakaum hanyo duo urang, inyo surang, aciaknyo surang. Itu sababnya Datuak tu bagala Kacang Diabuih Ciek. Indak tangguang lah gadang hati Sabai, dek lai manjadi datuak pulo adiak awak tu. Kalau ka malang, rumah gadang jadi pondok tapi kalau lai kamujua, cirik kudo jadi godok. Baitu mamangan nan acok disabuik-sabuik dek Mangkutak. Kini inyo pulo ka dilantiak manjadi pengurus LKAAM. Batambah tenggi gensi Mangkutak jadinyo. “Minggu muko waden ka dilantiak jadi pengurus. Kami para penghulu nan duduak jadi pengurus musti mambuek baju kabasaran. Dipakai nantik kutiko pelantikan dek Datuk Sayuik,” kato Mangkutak sasudah lapeh tarangah duduak di barando rumah gadangnyo. “Aponyo nan sayuik di datuak tu Mang?” tanyo Sabai takakah mandanga namo datuak nan ka malantiak Mangkutak tu. “Ma jaleh diden apo nan sayuik di badan dirinyo. Tapi itu nan den danga. Nan jaleh kini ciak, waden lah mambuek baju kabasaran,” kato Mangkutak. “Manyo, caliak Ai. Lai saroman baju kabasaran pangulu nan taralah?” tanyo Sabai. Mangkutak mangaluaan baju dari bungkusannyo. Nyo caliak, nyo tenok dek si Sabai. Sabai kaheranan. “Baa kok tacangang bana aciak. Tabulalang mato aciak mancaliak baju kabasaran den. Kecek aciak baju kabasaran ko saroman jo hantu, mako tabulalak bana mato aciak?” tanyo Mangkutak. “Iko baju anak drama, anak randai atau iyo sabana baju pangulu?” tanyo Sabai. “Baa baitu?” tanyo Mangkutak baliak. “Pinggir bajunyo barendo jo pita ampek warna. Merah, kuniang, itam, putiah. Apo aratinyo tu Mang?” tanyo Sabai. “Itu lambang marawa mah ciak. Jadi, baju kabasaran kami pengurus roman ko sadonyo. Bahias jo marawa di pinggir bajunyo. Beko kutiko pelantikan, dipasangkan pulo medali,” kato Mangkutak. “Marawa? Baa kok ampek warna? Nan biaso kan cuma tigo. Merah, kuniang, itam,” tanyo Sabai. “Sakali aie gadang sakali tapian barubah, baitu papatah adat awak kan ciak? Baitu pulo marawa. Pengurus lamo, marawanyo tigo warna. Pengurus baru marawanyo ampek warna. Kalau sempat pulo aciak jadi pengurus, tantu warna salendang aciak ka dimasuak an pulo untuk tambahan warna marawa,” kato Mangkutak. “Kok sempat ampek kali batuka pengurusnyo, tantu marawa awak lah roman warna ula ngiang tu?” tanyo Sabai. “Ula ngiang tu apo ciak?” tanyo Mangkutak. “Ula ngiang tu bahaso Minang. Bahaso urang kini pelangi,” jawek Sabai. “Aciak jaan main-main. Kecek aciak kami pengurus ko anggota-anggota dari Laskar Pelangi? Itu menghina mah ciak,” solang Mangkutak tarabo. “Baa kok warna marawa jo medali nan manjadi persoalan bana dek kalian? Itu nan adat Minangkabau?” tanyo Sabai. “Hakekat adat Minang tu adolah perubahan. Jadi, perubahan baju pangulu, perubahan marawa manjadi ampek warna, pemasangan medali nan disalempangkan di dado roman salempang Uni Uda, itu adolah sesuatu nan sudah seharusnya terjadi. Aciak lai mangarti hakekat adat tu ndak? Kalau indak mangarati, baraja adat aciak ka LKAAM. (WH) Sent from my BlackBerry® powered by Sinyal Kuat INDOSAT -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
