Assalaamu'alaikum wa rahmatullaahi wa barakaatuhu
Kampuang nan........ bapangulu, baranak, bakamanakan, Katiko rami carito pakaro batagak pangulu, ingin lo ambo bacarito saketek satantangan pasukuan kami sarupo di bawahko...... Suku kami Koto, Koto Mudiak Balai tapekno, di antaro 7 Koto di Koto Tuo Balai Gurah Ampek Angkek Canduang. Dek kami sa pasukuan lai bakambang, di kampuang kiniko ado 7 buah rumah asa, bakambang dari sabalunno 5 (katiko ambo masih kanak-kanak) nan bakambang pulo dari sabalunno duo buah rumah kamba di akhir abaik ka sambilan baleh / awal abaik ka duo puluah. Nasib jo untuang nan mambao masiang-masiang diri, dari ka tujuah buah rumah asa tu hanyo ciek dan satangah baunyi, ditunggui dek kakak sapupu ambo laki-laki. Baliau surang ko lain nan sabana masih manatap di kampuang. Nan salabiahno, 75 persen anak kamanakan manatap di Jabodetabek, 15 persen di kota-kota Bukiktinggi, Payokumbuah, Padang jo Pakanbaru. Sisono di Yogya, di Banduang jo di Baliakpapan bahkan ado nan di Washington DC dan di kota ketek dakek ka Toronto di Canada. Anak kamanakan sa pasukuan kami ko bajumlah hampia 200 jiwa. Iko nan anak katurunan pahunyi ka limo rumah tahun 50an, sabab dari nan sabalun itu ado balahan kami di Lampuang, di Makkah, indak jaleh amek lai pakambanganno, antah alah jadi bara banyak pulo mareka tu kini. Katiko ambo ketek-ketek, sampai baumua akia balig, kalimo buah rumah asa tu ado bapahunyi walau katiko itupun alah sabagian gadang nenek-nenek jo mak tuo-mak tuo sajo lai nan tingga. Rumah ibu ambo tamasuak nan paliang rami, sabab kami baranam badunsanak. Rumah-rumah nan lain biasono rami katiko anak sikola pakansi sajo. Bakumpualah kami jo dunsanak-dunsanak nan pulang dari Padang, dari Payokumbuah. Rami kampuang sabanta, misalno di bulan puaso. Sajak tahun 70an, katiko ambo mulo-mulo pai marantau ka Jawa, baransua batambah langang kampuang. Adiak-adaik ambo manyusul ka rantau ciek-ciek, ibu ambo tingga surang sajo lai di kampuang sampai babarapo bulan sabalun baliau mandaulu tahun 2002. (baliau maningga di pakan Baru bulan Desember 2002). Ibu ambo ko ‘nenek’ nan paliang kudian tingga di kampuang. Di rantau, di Jakarta masih ado tigo urang nenek sampai kini. Nan paliang tuo baumua 90 tahun, nan paliang mudo 85 tahum. Tipak di nan laki-laki, nan paliang tuo baumua 71 tahun. Nan di Jabodetabek ko, sakali tigo bulan kami bakumpua, arisan bak caro urang di Jakarta ko. Jadi sarupo itulah. Lah tingga kampuang. Namun sakali samaso didatangi juo. Ambo sandiri kadang-kadang dalam sataun bisa sampai ampek kali pulang. Kampuang nan tatap dicaritoan ka anak kamanakan sabagai tampek asa usua niniak muyang. Sawah pusako satampang baniah lai juo dijadian urang di kampuang. Ado di antaro kami nan masih mauruih bana satiok sawah jo padi nan pulang tu. Tapi ado pulo nan alah bakarilahan sajo. Dek hasiano banyak nan pai pado nan pulang. Pitih bali pupuak lai dimintak-an urang juo, tibo di hasia ado nan indak bakajalehan amek. Antah di maa lah salahno, tapi indak lo jadi pamikiran bana. Pangulu kami Datuak Bagindo. Pangulu terakhir, Djamin Datuak Bagindo berpulang ke rahmatullah tahun 1994. Ambo adolah calon pangganti baliau, untuak manyandang gala pusako itu. Tahun 1995 sakitar bulan Agustus rencana mulo-mulo kami ka baralek managak-an gala pusako ko, tapi takdir Allah mangatoan lain, babarapo bulan sabalun itu, rumah gadang kami nan dihunyian urang lain maso itu, tabaka. Indak jadi baralek managak-an datuak sampai kini. Tapi nan ambo sandiri alah talanjua jadi ‘mamak’ dalam kaum, ka tampek barundiang jo baiyo. Lah ambo kao-an lo sa barapo talok. Walaupun indak resmi bana jadi Datuak. Alun sampai marabahan kabau untuak malakek-an gala. Di Koto Tuo Balai Gurag, urang nan sarupo kami ko banyak. Banyak rumah nan bacarian urang ka maunyian. Banyak nan tingga di kampuang kini pandatang dari nagari lain. Antah dek karano itu pulo, dek anak nagari alah abih larek ka rantau, kiniko indak surang juo Datuak di Koto Tuo tu. Bahkan di kanagarian Balaigurah mungkin hanyo ado surang jo baduo. Lai tadanga di ambo babarapo suku nan baragaj-ragak ka managak-an pusako nan alah lamo balipek tu baliak, maangkek Datuak. Tapi sampai kini nangko bana alun ado nan kasampaian. Baitulah sakadar carito Wassalamu'alaikum, Muhammad Dafiq Saib Sutan Lembang Alam Suku : Koto, Nagari asal : Koto Tuo - Balai Gurah, Bukit Tinggi Lahir : Zulqaidah 1370H, Jatibening - Bekasi -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
