Assalaamu'alaikum wa rahmatullaahi wa barakaatuhu Alah sudah sumbayang isya, alah sudah lo makan. Ditapek-i janji.......
Jadi katiko ambo mulo-mulo sakik tahun 86 tu, dek angku dotor diagiahno tabel diet purin. Ado tigo tingkek makanan manuruik kadar asam purinno kecek dotor. Nan aman, jo skala kadar purin antaro 1 jo 10 satuan adolah ayam, talua ayam, susu, keju ditambah jo sayua-sayua nan indak bawarano hijau. Iko nan relatif aman. Lalu skala manangah antaro 10 jo 100 satuan, dagiang, ikan ayia tawa, sayua sarupo bayam, kangkuang (galidi). Nan kecek dotor, nan iko buliah dicubo tapi diinggo. Nan katigo nan klas barek, jo kadar purin antaro 100 jo 1000. Di dalamno sagalo macam seafood, ikan asin, jeroan, karupuak ampiang tamasuak daun malinjo nan untuak sayua asam tu. Daulu tu indak lah bapatuahi bana daftar tu do. Itulah sababno sakali samaso, antah sakali duo atau tigo bulan disipak-anno baliak. Pai lo ka dotor. Diagiahno lo ubek. Baranti lo sabanta. Sudah itu dicubo pulo baliak. Katiko itu bana, rasono iyo basiansua juo datangno. Kok dipatirik-an makan udang galah sungai Mahakam duo hari baturuik-turuik atau disatoi lo gulai sotong alias cumi, capek diagiahno kaba sakali ka pinggang. Tahun 1993 ambo pindah dari Baliakpapan ka Jakarta. Kawan sakantua ado surang sinshe. Kanti-kanti nan bakolesterol tinggi atau bapanyakik asam urek, barubek ka ano. Dianjuanno kami minum pil buatan Cino, Sumalin namono, murah mariah haragono, 5000 piah untuak 100 buah tablet dalam boto. Kawan-kawan ko alah mambuktian kamujaraban ubektu nan dipastikan jo hasia annual medical check up. Lai aman-aman sajo. Sato pulolah ambo jadi mamakai ubek Sumalin tu. Alhamdulillah, iyo lai mujarab. Sampai tahun 1998, buliah dikecek-an indak bapantang-pantang ambo makan, dan indak panah lai sampai indak pandai bajalan. Tapi tahun 1998 tu ubek tu hilang dari pasaran antah dek karano a, indak jaleh. Bakabatulan ado lo kawan maanjuran mamakan daun sambuang nyawo namono. Singkek carito, rajin pulolah ambo makan daun sambuang nyawo ko. Ditanam di pot di balakang rumah. 3 sampai 7 halai tiok pagi dimakan matah. Alhamdulillah pulo, sampai tahun 2004 aman-aman sajo. Makan buliah dikecek-an indak bapantang, indak panah sakik. Aman bana rasono. Tapi rupono tahun 2004 barakhir kaampuhanno tu. Mungkin tubuah ambo alah baransua imun, indak manarimo lai kaelok-an daun sambuang nyawoko. Muloi lo baliak sakik pinggang sarupo katiko di Balikpapan dulu. Sampai indak bisa tagak. Malang no pulo, ubek dotor, zhiluric atau alupurinol namono indak mangkuih. Alergi badan, tumbuah sariawan sapanuah muncuang kalau diminum ubek dotor tu. Barulah sajak itu ambo bausaho sitereng jo diet usali dulu baliak. Namun sakali-duo kali tguliciak juo, maharangan badan dibuekno. Kalau pakaro ubek alah banyak lo macamno nan dikecek-an urang nan ambo cubo sasudah itu. Sajak dari mangkonsumsi sirsak atau durian bulando, maminum rabusan daun salam, teh tianshi jano urang, tamasuak nan tarakhir ayia karambia jo limau kapeh kapatangko. Indak mangkuih do. Baitulah pangalaman ambo, nyiak. Sainggo iko lo dulu. Wassalamu'alaikum, Muhammad Dafiq Saib Sutan Lembang Alam Suku : Koto, Nagari asal : Koto Tuo - Balai Gurah, Bukit Tinggi Lahir : Zulqaidah 1370H, Jatibening - Bekasi ________________________________ From: Muhammad Dafiq Saib <[email protected]> To: "[email protected]" <[email protected]> Sent: Thursday, September 29, 2011 7:00 PM Subject: Re: [R@ntau-Net] Ubek Asam Urek Cah lai dijawab nyiak. Tabuah hampia babunyi, ka pai sumbayang isya dulu sacah. Wassalamu'alaikum, Muhammad Dafiq Saib Sutan Lembang Alam Suku : Koto, Nagari asal : Koto Tuo - Balai Gurah, Bukit Tinggi Lahir : Zulqaidah 1370H, Jatibening - Bekasi ________________________________ From: sjamsir_sjarif <[email protected]> To: [email protected] Sent: Thursday, September 29, 2011 6:52 PM Subject: Re: [R@ntau-Net] Ubek Asam Urek Ee lah batigo sanak awak di Lapau nan panah maidokan marasokan panyakik asam urek ko, Angku Lembang, Angku Fakhren Kasim, [kaduo Ampek Angkek], Angku Pery Burhan [Pauah Sangik Siamang Bunyi]. Lah samo kito danga gejalano, lai ko taraso sabalunno aaa sababno mangko zat asam urat tu mengganggu, pangaruah diet, pangaruah lingkungan? Lai ko mangkasanoi diet apo nan mungkin mamunculkanno? Renny, Buah Labu Siam ko Buah Japan yo? Dulu Maso Japang katu MakNgah aketek-ketek, buah banyak tumbuah kuliliang pakarangan. Banyak urang bakandak untuak ka sayua. Sabalunnyo kami sabuik Japan, tapi dektakuik ka tadanga dek Urang Japang, batuka manyabuikno jadi Labu Siam. MakNgah alun panah makanmatah buah tu lai, tapi aco dipasayua, bauih, tumih, gulai, uwok dll.Di Rantau jauah ko lai banak urang manjua di Toko-toko Asia. Katu tu pulo mandanga takok taki garah, Cino mati Japang tumbuah di ikuano ...:) Salam, --MakNgah Sjamsir Sjarif Sept 29, 2011 -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
